(beta 公測版本)
< 返回

《車仔。屋仔。人仔》

日期:None

係咪覺得好可愛呢?充滿愛呀哩?咁多細路仔單車擺埋一齊,如果一齊拎出去踩,一定好開心。

咁諗係冇錯既,邊個細路踩單車唔開心?仲要咁細個就踩,一定有個大人响隔籬遞水遞毛巾,爽皮呀哩?

但有冇諗過,點解咁多細路仔單車泊响度呢?又唔係單車舖,又唔駛駁腳去火車站,點解泊咁多細路仔單車呢?

憑觀察推想,大概係因為附近太多劏房,劏房入面冇空間擺單車,所以惟有泊出街。咁樣聽落係咪有D淒涼?未算,當你想像一下,點解佢地要住劏房,點解唔租間靚D大D既屋等個細路就算唔可以响屋企入面踩單車都可以泊架單車,點解個細路老竇老母又唔係唔返工但係儲極都唔夠錢畀首期,年年都要驚住被業主加租迫遷,公屋又等極未有耐,點解?係咪佢地唔努力呢?唔捱得?一日做未夠廿八粒鐘?

曾經,上一代都係咁捱,結果捱到有層樓,等我地慢慢大嗰陣有瓦遮頭。好喇,到左今時今日,到我地捱喇,點解好似望唔到終點既?係咪我廢呢?又好似唔只我喎,身邊D朋友都咁上下,莫非我地呢代廢?所以畀人話廢青?可能我地畀人話廢都抵既,如果講既人當年都要面對唔食唔洗十九年先買到樓既話……

其實心情真係好差,望住幅相自然勾起上面既思考;但令我更加唔開心既係,因為咁同我老竇嘈左一鑊,本身開開心心一家三口坐埋响酒吧摸下酒杯底之後去食飯,最後終止對話不歡而散,我自己一個閒閒蕩到去太安樓都冇心機食。

可能,我面對唔係我老竇,面對既係佢地成功經驗,佢當年咁樣捱過過黎,得左,自然覺得咁樣係得既,你唔得係你既事;又或者,當年佢都冇靠政府,一樣得,所以你而家瀨政府係唔應該既。真係so99y,我作為年青人唔係要瀨或者怨個政府,係希望個政府做番佢地本份,幫市民安居樂業,而唔係乜都瀨落個自由市場度,自己撒手不理,任由市民日以繼夜營營役役,到最後公屋又申請唔到樓又買唔起。點解咁基本既道理都要講到口水乾都講唔明?仍然相信政府有做野,OK,我唔係話佢冇,係唔夠丫嘛!結果,係我瀨落政府埋怨政府加自己唔夠努力,個感覺衰過當年打king fight畀人perfect炒三。

雖然張相帶出黎既討論係唔多開心,不過張相都有令我窩心既部份。就係明知住劏房,經濟相對唔係咁充裕既日子底下,父母依然願意為自己仔女買一架單車。呢份愛,令我諗起當年我都有一架單車,壞左鬆左,都冇丟到,係我(以為)幫緊老竇手一齊整番好既。好似冇影相,但係我記得,架單車係紅色既。

多謝你,老竇。

全文 850 字 (唔計英文、空格、標點)
備註: 港語學第二屆廣東話徵文比賽作品

作者:霍凌鋒