(beta 公測版本)
< 返回

《邊一個站》

日期:None

「喂,你喺邊呀?」

「我咪喺銅鑼灣港鐵站囉!」

「搞錯呀!我約你喺天后站等,唔係銅鑼灣!」

「去崇光梗係銅鑼灣啦!」

「幾時話去崇光呀!我話去維園呀!」

「無喇喇去乜維園呀!」

「頂!今日七一呀!」

「七一唔係應該去灣仔金紫荊咩?」

「睬你都傻!」

我立即收線,唔想同佢再嘈。講真,我同佢嘅立場咁唔同,真係仲可以繼續行落去咩?

呢一刻,我諗起你!

上一站‧天后

記得你靜靜咁同我講過,自從兩鐵合併後,港九新界就連成一體,呢度嘅城邦文化就更加鞏固。

的確,鐵路已成為呢個城市嘅血脈,不停咁運送住幾多代人嘅夢想、血汗同回憶,由舊時送到今日,由冇雷公咁遠帶到自己身邊。

你,每次都坐住地鐵經過天后站果陳,腦海除咗浮起黃偉文所填嘅《下一站,天后》嘅歌詞之外,更諗起你心目中嗰位永恒嘅天后──梅艷芳。梅姐成名嘅年代,就係你嘅黃金時代。梅姐嘅百變形象,同你嘅靈活變通,同出一轍。

嗰陣時,你聲名遠播,各國好友都爭相仿傚,學你嘅衣著,扮你嘅談吐,總之你嘅一言一行、一舉一動,都散發住迷人耀目嘅風采。嗰啲日子,紙醉金迷係你嘅代號,璀璨繁榮係你嘅武器。我緊貼你嘅步伐,雖然氣喘如牛,但內心就湧出一陣嘅興奮莫名。沾你一分光,分你一杯羮,你話係幾咁美好、幾咁奇妙呢!你喺朋友中做咗典範,梅姐係你嘅天后,而你,就係我嘅天后!

我因為你而感到驕傲!

你係我嘅天后,唔止係因為你有綽約嘅風姿,更因為你擁有可貴嘅風骨。

一九八九,二零零三,有人話呢兩組數字係魔咒,又有人話係包袱,咁你認為係乜嘢呢?

講返轉頭,嗰度只係兩組數字,兩組牽動成千上萬人嘅數字。前者為呢度帶嚟一百萬,後者為呢裡帶嚟五十萬,都係創舉,都係前所未有,都係為咗理想。

你嘅魅力,牽動咗我萬千嘅神經,你係我嘅偶像,我係你嘅粉絲,在閃光燈嘅閃耀下,我要為你擊節讚揚。

有咗你,我先至有夢想,我嘅心靈先至可以充實同滿足!

「我真係唔明,你跟住啲人係咁行行行,有用咩?啲官會聽你講嘢至奇。」

「呢啲係我地嘅權利,即使暫時睇落嚟未必好有作為,但留喺屋企涼住冷氣又有用咩?」

「咁起碼我用咗全身嘅汗水嚟話畀呢個社會嘅人知,我仲係好愛呢個地方,我好想呢個地方變得更好。」

「你會唔會覺得只係你一廂情願?」

「睇吓有咁多人一廂情願,我覺得都值得囉!起碼你都願意陪我。」

「睇在你上次送畀我嗰隻鑽戒嘅份上咋,我先至唔嬲你。而家我仲陪你遊行,算係咁啦!你快啲諗吓一陣送啲乜嘢畀我做補償啦!」

好一個正宗港女,唉!望住佢,我不禁反問自己,佢就係我嘅未來,我嘅人生嗎?

呢一刻,我又諗起你。

呢一站‧金鐘

曾幾何時,你話畀我知,你長大嘞,要講講真嘅理想。無奈嘅係,你遇上咗一道圍牆,一道又一道厚厚嘅高牆。嗰一刻,你疑惑嘞,淨係覺得前路茫茫,搵唔到自由,搵唔到方向。

曾幾何時,你企喺街邊,走上街頭,流晒汗水同淚水,為嘅就係嗰份近乎天真嘅理想。「點解要畀我遇到呢道牆呢?」你喊住咁問。而我,就沉默咗,唔知點答。或者,人活喺亂世,最渴望嘅,就係尋求真相。

從來冇諗過會同你喺金鐘擔遮行路,從來冇諗過會同你喺夏慤道嘅天橋上紮營露宿,從來冇諗過會為你崇高嘅理想同未來,公然咁去抗命……但係,呢一切一切,嚟到二零一四年,就一一實現嘞。

或者就係呢個年頭,你覺得你自己成熟咗,所以要再同呢個世界大談理想、爭取理想。但係,圍牆嘅力量同幅度實在好大,佢好似喺度問你︰「朋友,你諗住企響邊一邊?左邊?定係右邊?係高牆呢邊?定係雞蛋嗰邊?」

偏偏圍牆喺度冷笑,好得人憎,好令人心寒。幾多人感慨緣份已盡,黯然離場,你靜雞雞問我︰「應該企響邊好呢?」

我淨係可以答你︰「就企喺呢度,呢度叫金鐘!」

就喺臨別嘅一刻,你我互贈雨遮,呢種情景,真係令我羅羅孿!

曾幾何時,我北望神州,唔係都有住呢份情懷咩?但點解而家乜都拋諸腦後?或者我應該振臂高呼︰「唔怕冷箭刺痛,當你嚟戴月,我就去披星;唔理愛同信仰仲喺唔喺度,總之喺鐵牆厚幕之下,我仍然願意為佢送上溫馨。」

你昂首企響度,一副唔信命嘅款。聖雄甘地、馬丁路德金、曼德拉……幾多先賢前輩喺寒雨中扭轉逆境,依靠嘅咪正係內心嗰一團未熄過嘅咩?

啱嘞!就畀金鐘成為未來偉大嘅中轉站,由佢將理想嘅種子,傳送到各城各省各縣各村喇!如果夢想可以成真,你同我今天義無反顧,用手用腳用行動造出嚟嘅「呢一站」,好值得呀!或者,就係因為「呢一站」,可以畀夢想真正咁照入心靈!

「做乜事無端端返內地呀!我鍾意去日本喎!」

「咪淨係掛住買嘢,有時認識一下祖國河山都好有意義。」

「你係咪傻咗呀!上次你遊行嘅時候,明明大嗌政府無能,咁做乜你仲返大陸呀!唔通你變咗節,做咗當權者隻狗。」

「我鍾意你,除咗鍾意你個人,亦要尊重同關心你嘅屋企人,咁樣先至係一份完整嘅愛。同樣,我地屬於國家嘅的一部分,即使我有好多地方都唔認同佢,但唔代表我就要造佢個反。要反對自己嘅人認同自己,就一定先要自己去瞭解反對者嘅心思。」

「唉!都唔知你講乜,無你咁好氣,一陣過關後,唔該搵間高檔啲嘅餐廳坐坐先,我要醫肚。」

醫肚固然重要,但我認為,醫治人嘅心,更加重要。所以,我又再諗起你。

下一站‧羅湖

孔子話︰「三十而立,四十而不惑。」你碌大隻眼係咁望住呢度大小住宇嘅價格,然後細細聲咁話︰「三十難立,四十更疑惑。」

我不斷點頭。的確,要喺呢度企得住腳,講就易囉!

講民風淳樸,呢度唔及台灣。論規劃完善,呢度唔及新加坡。論經濟騰飛嘅速度,呢度唔及南韓。喺四條小龍中,你呀,排晒包尾呀!我叫你移居第二度,但你總係搖頭拒絕。你嗰句「血濃於水」,再加多句「愛得深,責得切」,令我啞晒口,冇嘢講。

骨肉分離本來係痛苦嘅,但骨肉重聚所衍生嘅協調同磨合,原來都好痛苦。或者你同我都要向東西德嘅人民學吓嘢,學吓人點樣融合文化差異,學吓人點樣和而不同。今日兩地之間嘅矛盾,或者就係成長嘅歷練啦!邊個講人大咗就唔駛受磿難?我地除咗指出人地唔啱嘅地方,其實更加要反思一下自己係咪都屬於嗰種「憎人富貴厭人貧」嘅衰人呢?北靠神州,係大勢所趨;下一站係羅湖,都已經係冇得拗嘅事實。最重要嘅是,你,能唔能夠生活得好似一枝筆?

筆之所以可愛,在於佢書寫嘅時候,能順滑流暢。同筆一樣,喺過去嘅日子,你雖然遇過多次金融危機、禽流感同沙士侵襲、政治爭拗……但憑住你嘅智慧,互諒互讓,求同存異,最終都能幫大家暢順過關,譜出光輝嘅盛世。

筆之所以可靠,在於佢嘅墨水能夠源源不絕。同筆一樣,喺過去嘅日子,你嘅善心從冇間斷。唔理係華東水災,抑或係汶川地震,總之邊度有難,善心同善款就會源源送上,盡晒國民、盡晒家人嘅一分力。

筆之所以可貴,在於佢時刻都腰板挺直。同筆一樣,喺過去嘅日子,你為《中英聯合聲明》克盡己職,為一國兩制、高度自治堅守原則,為爭取民主自由風雨不改。

人生有幾多個年頭呢?但願呢三筆,好似蓮花咁,中通外直、不蔓不枝,長存人心,直到永遠。或者到了年月嘅盡頭,你同我會相逢喺架列車上面。當你或者我忽然忘記應該喺邊一個站落車嘅時候,你或者我都能夠毅然咁提示對方︰「邊一個站?當然係香港!」

或者,就係嗰陣,夢想可以真正咁降臨喺你同我嘅心裡面!

全文 2432 字 (唔計英文、空格、標點)
備註: 港語學第二屆廣東話徵文比賽作品
作者:物非