(beta 公測版本)
< 返回

《一個常態城市》

日期:None

『一個常態國家,政治的責任在成年人,年輕人的興趣都在體育,娛樂,結交異性朋友;而在變態的國家,政治太腐敗,沒有代表民意的機關存在,那麼干涉政治的責任必定落在青年學生身上。』 胡適

<Joshua fit the battle of Jericho?>

呢度係某個平行時空。

晝長人靜熱屎辣辣,冷氣又壞鬼左,成個班房好似個蒸籠咁。有人講野,但氣氛唔多熱鬧。窗外啲蟬不停咁『唧唧唧唧』,好似剩係得佢地對同學講嘅野好有興趣, 想講埋一份。咁嘅環境留心上到堂就有鬼。

“Chinese,Moral, Civic and National Education must be introduced…..”

睇到第一句就差啲嚇到叫左出黎,你問我咩事?黃之鋒同學話香港要有國民教育呀。

個阿蛇代一日課,諗住整場英文辯論。聽左第一句內文都未開始讀,佢成塊面白哂,心入面猛咁諗:

[國民教育殺到嚟香港九龍新界冇得避要化身玉皇大帝打救蒼生國民教育殺到嚟香港九龍新界冇得避要化身玉皇大帝打救蒼生國民教育殺到嚟香港九龍新界冇得避要化身玉皇大帝打救蒼生國民教育殺到嚟香港九龍新界冇得避要化身玉皇大帝打救蒼生國民教育殺到嚟香港九龍新界冇得避要化身玉皇大帝打救……]

成場辯論完左,阿鄭SIR都未平伏到。本來想深入分析吓個課題,但時間過得真係快,又係時候講拜拜。

“Goodbye Class”

“Gooooooooooood byyyyyyyyyyye Misssssssterrrrrr Cheng”

阿蛇走得仲急過啲同學仔。

[嗚呀~點解係我~]

睇嚟打擊好大,你班學生俾佢抖下得唔得呀。

個課室好臭。出面三十幾四十度,天花板個風扇開到好行,機頭俾塊葉啲離心力整到左搖右擺好似就嚟跌咁款。啲風扇係好努力,但到頭嚟都只係將啲熱風呀汗臭味呀吹嚟吹去,得個桔。

男同學流晒大汗,件襯衫濕到透晒,唔駛睇都知佢地已經熱到個八月十五同條底褲痴埋合咗體,進入左『人褲合一』嘅境界。佢地成面暗瘡,一路執野一路講講到面紅耳熱,當周圍嘅氣溫無到。上堂就死鬼咗,落堂又生猛番。

『梗係伊東千奈美啦,仲波多野結衣!』

行家喎,真係要直豎拇指俾個LIKE你。

『Seed呢屌。』

蔡先生聽到實好開心,呢位同學居然咁有科學精神識得小心求證。

『剩係留意演員係一種盲目,咁啦,我俾個編號你,SIRO…..』

呢三條友以前SHARE過閃卡,而家仲睇埋同一堆片,不如桃源結義吧啦。

好遺憾男生就係一啲咁嘅生物,想搵個唔咸濕嘅,去產房會易啲。

除咗呢條友。

黃之峰已經收拾行裝準備走啦,其他同學講嘅野佢都冇咩興趣,當耳邊風就算。佢好趕時間,大把野做。

『今晚七點等啦。』係自己個GROUP度留個訊息,就正式出發。

之鋒嘅第一站係模型鋪,留意左好耐嘅獵魔終於都出,又武士刀又大矛鎚,Raise the flag~差啲就唱左出嚟…

雖然1:144係細部啲又冇咁精細,但有技術有架生嘅話就完全唔係問題。行(衝)入間鋪,高達嗰邊,搵到目標,攞起去櫃枱度俾錢找錢,禮成。輕輕的去輕輕的來,不帶走一片雲彩。

拎住盒模型又唔係番屋企,而係走去出面迷你倉。咪睇佢係學生哥就以為佢冇乜錢,利是零用加做下兼職儲埋儲埋都夠租一個大大地嘅倉,坐得落一個人咁,可以係入面砌模型擺下啲作品咁。著住校服入去個倉度焗已經係一個習慣,開頭係費事俾屋企人聞到的噴油味,但耐左就覺得好自由做乜都得。其實模型呢個興趣真係可以係一個無底深潭,當你有時間有錢嘅話。

<冇普教中,有英教通 >

收左工,鄭SIR衝咗出去食牛肉麵,見啱啱有人食完就入去坐低,大台播緊新聞。 片入面見到當年嘅戴桌爾風風光光係人民大會堂走出嚟,同李先念趙紫楊講多幾句就上車返歸。

而香港嘅命運就咁決定咗-主權歸中國,治權歸英國,一九九七年六月四日生效。

突然諗番起今日上通識堂嘅情況,就上維基查下馬拉拉同朴延美,有啲感慨。

都係九十後啫,點解……唔得,咁諗好唔公平。

馬拉拉·優素福扎伊,精通三種語言,企出嚟為當女性爭取教育權利。廿歲都冇就攞諾貝爾,正苦屈佢係美國間諜,又俾恐怖份子Head Shot;朴延美,脫北者,出過本自傳引起外界對佢地嘅關注,當年為左走路,母女俾人侵犯,仲要行戈壁沙漠。

龍應台都試個上上下堂個阿蛇俾憲兵射死左,共諜喎。

今日上嗰班細路,唔好話攞咩獎、上TIME封面、受訪見報乜乜乜,叫佢地係城市論壇蒲頭都偷笑啦。上堂通識都係背資料,叫今日正反雙方對調,一樣講到野。

香港係英國同大陸中間左右逢源,好似兩條仔追一條女咁,攞晒著數。正如啲後生繼續做世界仔。國民教育?無所謂呀。

獅子會將仔女推落谷底,迫佢地成長。

又諗起之前唔知邊個國家啲大學生示完威之就後俾大毒枭活埋。

惡劣嘅環境十個死九個,留低一個叻人;舒服嘅環境十個都保得住,但就個個都平凡啲咁囉…

『要啲咩?』

後生仔就係快手快腳,呆一陣就執好枱招呼我。

『都係平凡啲好。』

<四眼哥哥>

我屌(HI)吖。我問你食乜呀!平乜春呀!我忍!

『係?』

條友好似知道自己柒咗。

『兩碗牛肉麵,鹽酥雞,整碟油菜,呀係啦,嚟一份腸仔蛋。』

乜L野腸仔蛋呀,叫啲餐牌無嘅野點收你錢呀間鋪我架?

我以為自己睇緊<耐人尋味>。

眼前呢個四眼佬騎騎呢呢,話佢似老夫子又肥咗啲,大蕃薯呢又瘦得濟,估佢都係IT狗。

做樓面要識得當啲客係SEVEN HEAD,咁就唔駛嬲豬。

冇希望就冇絕望。

廚房臨臨地檔,特登唔執張枱等啲人冇咁快走入嚟。啦大佬,係條友玩野咋,我入單咪又屌鬼呀?

『腸仔賣晒啦…依家仲有滷水蛋,試唔試下?』

冇腸仔蛋食係一個BAD NEWS,所以要立即分散佢注意力。

『哦好…要兩粒。』

唔,兩粒蛋蛋。

『飲啲咩?』

『有咩飲?』

吓吓吓吓吓吓吓吓吓!!!!!!!?????????有咩飲?有咩飲?有咩飲?有咩飲?有咩飲?有咩飲?有咩飲?有咩飲?有咩飲?有咩飲?有咩飲?有咩飲?有咩飲?有咩飲?有咩飲?睇MENU啦 HI ANUTIE。大大張最頂寫住飲品嗰頁呀!咁都問你不如問我呢度有咩食?

『奶茶咖啡鴦鴛檸茶檸水檸蜜華田柯力熱杏霜,汽水就可樂雪碧。』

急口令,佢咀已O。

『凍鴦 …』

『OK… 兩碗牛肉麵,鹽酥雞,油菜係菜心,兩粒蛋…滷水蛋,飲凍鴦。』

『係』

原來真係冇聽錯,係兩碗,幾擦得喎。

『多謝(笑)』

落單耐左,出菜位已經隊爆咗。 檔已臨。

我感覺到事頭婆係你後面,佢好慶 。

Recap:Your boss is behind you,she is furious.

你條HIHI真係害人害物……

<龍門陣 >

『立法會主席李柱銘引用《議事規則》第92條終止辯論,成功剪布。《提供市政服務(重組)條例草案》,三讀以36人贊成,21人反對下通過。』

港督提出市政局改革,強化職權之餘,推行全面地區直選。民建聯主席曾鈺成喺鏡頭灰頭土臉,指出市政服務有必要改革,但認為推行操之過急,應該從詳計議。但好遺憾,親英嘅港同盟聯同自由黨快刀斬亂麻,投贊成票嘅親共議員返唔切嚟。

『一天都光晒囉。嗰個曾鈺成政棍嚟架,一睇就知係大陸啲人啦,喺到搞屎棍!』

麵館入面啲阿叔成日一路睇新聞一路…呃…論政。其中有幾個大概四五十令歲,手揸被稱為報紙嘅廢紙,入面啲專欄都有一個鮮明而統一嘅立場 —『搵食大晒』。例如石老師會話『大國勃起啦,快啲賴啦』;有屎觀點嘅地產佬,成日講『你窮肯肯定係因為你廢』;自稱係親子作家嘅林屈氏,讚揚 『個女因為食過狗飯而感恩有人飯食而開始識得珍惜』、批評 啲人批評人地/政府、話學生搞學運唔應該攞個身份嚟做擋箭牌,但自己俾人鬧兩句就示弱話自己係個師奶仔慘慘豬…唔好意思,靈舍覺得林屈氏啲文督眼督鼻,鬧多咗。

總之,有立場嘅人睇啲相同立場嘅野,只會令自己愈嚟愈固執,以為自己啱晒。其實人人都有自己立場,好似每個心靈有唔同形狀咁,當人地講個 『圓形』想法出嚟,如果我地得個狹窄嘅三角形心靈,就會將訊息由圓形屈做圓錐形什至係唔知咩形。

溝通溝通,到頭嚟溝左都唔通。

心靈同腦筋需要訓練,正如大隻係要練番嚟嘅咁。基本上睇多啲書,去多啲唔同地方見識下,之後諗下同消化留自己嘅所見所聞會係一個好方法,又或者…環境迫成。

睇番麵館入面啲阿叔,可能因為每日搵食要打拼用晒所有力量,番工放工食玩屌訓,身心都冇咩鍛鍊發展。頂住個啤酒肚,四肢冇咩肌肉,相信個腦都係咁上下。咁大聲講啲冇咩POINT嘅政見出嚟,可能只係想SHOWOFF 引人注意,同啲囡囡自拍放上網係同一個心態。

無視佢地唔係一啲太大嘅損失。

<鐵血…呀唔係,流汗的學民 >

人基本上都係充滿惰性嘅,好人好姐冇動機唔會特登走去練啲乜乜物物。就算去練,無環境迫吓都唔會俾咩心機。

之鋒係學校都算係一個學霸,成績幾好。佢當咗讀書係一份工,要打好份工先做到鍾意嘅野,所以就將部份嘅熱情放喺學業度。

例如,通識科TIP題將會考國民教育應否推行,於是就正反利弊通通都背晒,用英文。

得到嘅報酬就係呢一刻可以安安落落咁砌模型。

個倉入面有啲焗,焗住要開少少風扇向上吹。個頭挷條毛巾吸汗,個身艦條圍裙。SET好個Alarm.

好,開波。

先研究一吓說明書。獵魔、巴巴托斯。堅硬嘅Gundam Frame,雙重爐心代表多一倍嘅出力,近戰機種專門埋牙打過…

哦哦哦…一個字,Man!

靠住氣勢,今日就搞掂個骨架!

磨水口、去披風、補畢地。大部份骨架都會俾裝甲遮住,但『睇唔到就求其』係邪道,認真啲啦。

[骨架算係金屬關節,試吓用平時用開嘅啞色油,唔得就溝一溝…載口罩載口罩…又用晒,

用條汗巾…好臭…]

每一個動作有如行雲流水,成套合埋就係一套儀式。一套做過好多次,經歷無數洗練改良嘅儀式。

<滔 ,全部都係滔 >

毒L 滔,仲玩緊POKEMON GO。

有時係條街度,心血來潮就會攞部手機出嚟捉精靈,玩得唔多,亦唔課金。

因為佢啱啱同女朋友儲夠錢,準備結婚買樓俾首期。

[錢,唔係亂駛嘅,哈哈。]

我絕對唔會葡萄一個黑古甩特嘅ENGINE毒男居~然搵倒女朋友仲要拉埋天窗。

咩話!?佢喺迪迪尼做工程師覺得有意義又做得開心!?

妖!現充!偽毒!

港女滔,扭扭擰擰好糟糕!

『你好,我係Andy 。』

接過經紀張卡片,望一望

Chan Ho Tin ,Andy(以下略)

同女朋友睇咗十幾廿個單位,個經紀有啲頂唔順…

『陳生,你大概想要啲咩類型嘅單位?』

『個個單位都幾好,但我地仲想再睇多幾個,哈哈哈。』

『…』

真心滔,個人有啲神經刀!

點解咁講,我唔直接答你,陣間再用例子答你。

其實『毒L 滔』『港女滔』『真心滔』都只係一個叫做陳澤滔嘅後生仔嘅其中一面。

佢唔出名,亦唔想出名,更加唔應該俾時勢呢樣野迫佢去出名。

<我不是河童>

[始終都係唔夠時間,啲油未乾渗唔到線。]

無辦法,要收檔走人。

迷你倉大廈有單車倉,個老闆整左啲沖涼格吸引啲單車友。

沖個涼換返便服,再出去買個包食。冇錯,佢特登攞套衫返學換。

唔知點解,黃之鋒著便服個樣好似河童。明明只係淺藍色短T加條卡其短褲,配合埋佢五官同身形…喂喂,警察叔叔?我見到有隻河童喺條街度走,我見到,我真係見到。

佢本人就一於少理,著得舒服未得囉,反正冇人留意。

曾經有個日本人寫咗個河童故仔。

河童媽媽就生嗰陣,河童爸爸會蒐住老婆個肚問入面個B想唔想出世,如果個B嫌世界難撈答唔想嘅,河童醫生就打支針落阿媽個肚,阿媽個肚就會好似氣球漏氣咁平番,當冇事發生過。

有幾難撈?冇咩嘅,冇工開嘅河童會俾同類劏嚟食咁囉。

順便講埋,個作者最後睇唔開,自殺死咗。

隻河童貪方便係地鐵度食野,但冇人理。

佢今晚要去網吧同人對賽,趕時間嘛。(好孩子切勿模仿)

佢地隊TEAM叫香港眾志,型呀哩。

< Don’t read any stuff with BL content>

尋晚上網刨LOL斯溫走上路心得嘅時候,有朋友SEND咗套同人漫畫俾我,咩LOL<草叢三基友>咁。

我問個Friend 『咩嚟嘅』,佢話『睇咗先啦,記得睇嗰時附近唔好有人。』

估個內容都係關於蓋倫同嘉文四世同趙信點升點用走咩路。睇下先…

Yooo,咩料呀…

趙信由中路走去上路時發現草叢有動靜,俾蓋倫一招Q技沉默咗,跟手俾嘉文一個R技圍住…我繼續睇落去 YYYYYYYOOOOOOOOO!!!!!!!!!!!!!!!!!!!!!!!!

『哈哈哈哈,不要給他停蓋倫。我要睇吓趙信俾你抱住會唔會興奮XX呀。』

YYYYYYYYYOOOOOOOOOOOOOOO!!!!!!!!!!!!

『呵呵呵,我要食OO呀(心)』蓋倫出R技大絕

佢地入咗草叢我又忍唔住講YYYYYYYYYYYYOOOOOOOOOOOOO!!!!!!!!!!!!

我睇緊啲乜Q野。

呢本野一定係撒旦嘅傑作,我停唔到落去。

YYYYYYYYYYYYYYYYOOOOOOOOOOOOOOOOOOO!!!!!!!!!!!!

嘉嘉嘉嘉文佢開招E技加攻速 。跟住…跟住…

YYYYYYYYYYYYYYYYOOOOOOOOOOOOOOOOOOO!!!!!!!!!!!!

『哈哈哈,吞咗啦吞咗啦!!!趙信,你現在感覺如何,感覺如何呀?』

呢…呢個咩玩法,內容嘔心到嚇死人但係我仲睇緊!仲睇緊!

連嘉文都加入埋,THREEEEEEEEEEE!!!!!!!!

大佬三條友呀,THREEEEEEEEEEEEEEEEEEEEEEEEEEEEEEEEEEE!!!!!!!

『蒂瑪西亞,救我呀!!!!!! (趙信開W技)』

趙信你你你回血做乜鬼野呀,想玩耐啲呀!!!!!!!!??????????

再睇落去我真係會上唔到天堂啦,靈魂賣咗俾路斯化啦。

“First Blood”

意識由回想回歸番嚟現實,我喺網吧度同啲朋友組隊玩緊LOL。

好死唔死啊Alex佢用蓋倫(上路)、Lexter用嘉文四世(上路)、隊長Nathan 用趙信(中路)…

『搞咩呀你,集中精神啊周庭。』

我同Joshua走下路,集中唔倒精神,係咁送頭做肥料。唔駛多講,打輸咗。

所以我同你講千祈唔好睇咩咩咩<草叢三基友>。千祈唔好,我同你講咗架啦!

<鄺神義演>

約咗人食飯,時間未到,就喺旺角行吓打發時間。

我發現我寫嗰篇<草叢三基友>俾粉絲改成漫畫,大受歡迎。

呵呵呵,勁呀!唔好再叫我柒禎啦!叫聲禎爺先啦!

能成為密友總帶著愛,君子之交淡如水。

男生同男生之間嘅友誼係純潔嘅,手足情深,兄弟同心。

好PURE,好TRUE。

“Alexter”呢個梗開始厭啦,係時候發掘啲新素材。曾鈺成(受)X長毛(攻)都幾有潛質,但政治嘅野冇人睇囉…

嗯…萬物皆可耽美,開始取材。

旺角係一個幾得意嘅地方。呢邊係新淨嘅商場,隔離居然係殘舊嘅住宅;夜晚人多車多行都行唔到咁濟,朝早反而靜英英,人都唔多個;呢度咩都有得賣:遊客先至會留意嘅疑似充滿香港味嘅手信、俾潮人穿戴嘅衫褲皮鞋手袋銀包、文青必備嘅閒書、毒L收埋係屋企唔敢俾屋企人知嘅迷物…呀,仲有少量電器鋪藥房金鋪俾上面落嚟嘅同胞。

咩都有得賣,即係乜嘢人乜嘢群體都有。一家大細、現充情侶、單身狗,都嚟哩度行街買野食飯睇戲。我見到有細路哥兩隻手捉住爹地媽咪隻腳,頭向上望住佢地都晒咀扭晒計』不停『買啦買啦』咁嗲;某間野食麻麻嘅餐廳排晒長龍,出面啲情侶好似連體嬰咁雙魚以沬;信和門口總係有啲咩住背囊 著住格仔衫/T恤/牛仔褲/卡其褲嘅四眼仔出出入入,好似某啲神秘組織咁…

唔講唔得嘅就係呢度有好多人表演。一對男女係街道嘈晒交七情上面郁手郁腳,放心,佢地演緊話劇咋。有啲人畫緊素描,作品SHOW晒出嚟任睇唔嬲,某啲情況下仲會幫你畫番張。成條街都俾樂器聲佔領咗,呢度有隊BAND唱BEYOND,嗰度有團樂團奏古典(有時啦),仲有個阿伯坐住輪椅揸住個結他清唱聖詩,唔好聽冇人理但日日都出嚟唱。有次我仲見到有人係馬路上播Billy Jeans扮MJ Moon Walk ,又有次係另一個人,係馬路中心擺POSE定格唔郁扮石像。好危險?唔會,嗰度改咗做行人區好耐啦,係個紅綠燈仲係度咁解者。

『嘩!!!鄺神呀!!!』

哦,今日個HIP-HOP社工又嚟跳舞。

『好靚仔呀!!!』

『鄺神!!!我愛你呀!!!』

又係呢條女叫春,咁點得架,你黃花閨女嚟架。

望住跳緊HIP-HOP嘅鄺神,佢本擺係攤位前面嘅新書,同埋嗰個尖叫嘅 『囡囡』…

靈光一閃,有梗。

《愛你,若只如花見》

鄺神(攻)X如花(受)

多謝你呀, 鄺神。

<愛是不保留>

約咗人食飯,時間未到,就去書店打書釘發時間。

死人阿禎成日話反正都係姓鄺嘅,不如都試吓出書。咪玩啦,其實唔係逢親姓鄺嘅都會有共識個囉。你估姓張咩…

旺角大大話話有成十幾間樓上書店,有幾間幾有特色。其中一間仲有養貓嘅,細細間但係有位坐,耐唔耐仲有坐談會。賣嘅書除咗主打文史哲外,仲有啲內容比較特別嘅,連中學範文嘅廣東話譯本同埋我的奮鬥精讀本都有得賣。

不過今次我想轉吓口味去第二間。呢間啲書就大路啲。一開門未入去就出現係你面前嘅,係一啲暢銷書,本地名人啲新舊散文呀咁。入口右邊係收銀櫃枱,面向櫃枱右邊係一啲食譜同健身嘅書,左邊係旅行書咁樣。呢啲位通常都有人塞住,我好少過去。

打開本《愛你,若只如初見》嚟睇。

『所以呢,我嘅意思係你唔好將標點符號之類嘅野放啱位。』

哈,諗起《麥田捕手》入面有句咁嘅對白。

個主角好唔係路,因為啲大人長輩更加唔係路,做唔好榜樣。

佢投訴人生係場唔公平嘅比賽。

『仲有球證、旁證、足協、足總、足委,全部都係我嘅人,點同我打呀?』

可能星爺都有睇《麥田捕手》。

『世界高興但我不怎快樂
要我遵照遊戲規則束縛
誰也躲不過
由社會發落 …』

有聲嘅喂。

有番意識嘅時候,發現自己向咗左行,睇緊《麥田捕手》。

『常聽說世界愛沒長久…』

有時係度會聽到樓下Michael把聲,佢日日都唱<愛是不保留>。

『那裡會有愛冇盡頭…』

繼續順時針咁行。過咗啲財經書就係歷史書。望住一本寫英國嘅殖民地歷史嘅書,係喎,聽日六四回歸喎。

『塵俗的愛只在乎曾擁有…』

歷史記載,如果英國就黎失去一個殖民地嘅時候,會製造一啲問題出嚟得走咗之後爆。記得印度巴基斯坦佢係咁玩野,以色列巴勒斯坦又係咁玩野。

就連我地某個親英嘅才子都話過,英國係個『怪異新客』,有個怪癖好,明明離開咗就係你有你生活我有我忙碌,但就係唔想俾以前嘅殖民地好過。唔知道英國冇咗香港佢會對香港做啲乜。

『一刻燦爛便要走…』

差唔多夠鐘,真係要走啦。最後望左一眼,都係中史書同人物傳記,《鄧小平(1904-1983)傳》咁。

落到樓下真係見到Michael,照舊坐住輪椅揸住個結他清唱聖詩。

話時話,<愛是不保留>係一套真人真事改篇電影嘅主題曲。個女主角同我一樣都係做醫生架。

劇情係兩公婆都係基督徒,後尾個老公血癌死咗之類嘅生離死別嘢。近排我見過佢真人,睇得出佢個人好堅強,係個好醫生。

我繼續行,Michael把聲嚟我愈來愈遠,心裡面不期然咁哼住首副歌嘅另一個版本,送俾謝醫生:

『明日幻變天地無法猜得透,也許風雨盡蓋掩滿天星宿;
有你在旁將真愛盡傾流,寒夜漆黑一片也未去擔憂!
長路就算多漫長似沒盡頭,你總緊靠著我、輕挽我的手;
那怕歲月一飄去未可留,能夠找到真愛已足夠!』

<熱血公民>

(鏡頭一轉,睇吓四眼哥哥搞啲乜?)

返完牛肉麵館,就趕去某間潛艇三文治專門店打工。試過朝早做麵包,下晝做麵館,夜晚就整潛艇三文治,打三份工。

好出奇咩,香港人打三份工,鬼叫你窮呀頂硬上。

近排計過打兩份都夠,就冇做麵包鋪。嗰個曾鈺成拉唔成布之後,而家立法會講緊重新檢討最低工資,應該會加人工啦。開支方面,因為住屋企租金封咗頂,業主再加唔到租,穩陣。

又收工啦,將剩番嘅材料整咗件潛艇拎番屋企食。件潛艇細細件,睇落似熱狗。

實不相瞞,諸君、我喜歡熱狗。

熱狗可以一隻手食,空出另一隻手嚟做其他野。番到屋企就一手熱狗一手筆記,一路食一路溫書。差唔多夠錢到澳洲讀書,希望順利啦。

返屋企搭港鐵途中車站月台面聽到有人大嗌有色狼。

嘩,咁仲成世界嘅 ,即刻穿過班花生友,走到案發現場。

眼前嘅係一個後生仔,黑黑瘦瘦咁,一面無辜係咁講對唔住。

另一邊嘅係一個…大媽?

吓???大媽??????????????????

嘩頂,乜你咁識食呀?

『無呀…掛住打機唔小心掂到咋,哈哈哈。』

條友一副想洗手嘅樣,我唔想知佢掂到個大媽邊忽。

『咁即係有掂即係你認你揩我油啦,!』

喂喂,你講吓道理好喎喂。

『呀哈哈,對唔住。』

條友俾人烚到上心口都唔反抗,我睇唔過眼,走上前同個大媽理論。

『喂!人地都話係唔小心咯,咁野蠻嘅你!』

死啦,行得太前,個大媽塊面又腫,差啲錫咗落去,嘔。

『咀佢』『咀佢』『咀佢』『咀佢』『咀佢』『咀佢』『咀佢』『咀佢』

啲花生友之前又唔出聲,而家見好玩又起控。

另外嗰個當事人,企咗係原地捉精靈,有冇咁鍾意玩POKEMON呀你。

『咀佢』『咀佢』『咀佢』『咀佢』『咀佢』『咀佢』『咀佢』『咀佢』

好煩呀,喂唔好影呀…

過程好混亂,最後個大媽敗走。

各位,聽日youtube見…

『呀…唔該你呀。』

『唔駛。』

好灰。

『我係迪迪尼做,可以免費帶人入去,當係報答你吖。』

反正聽日放假…就去玩吓當係好人有好報啦…

<六月四日>

今日係公眾假期。『全港市民熱烈慶祝回歸』,十隻字唔只得『回歸』兩隻字係真嘅。

香港眾志成隊人尋晚中晒箭,今日去晒之鋒屋企開檢討會,搞到佢冇得砌模型住。

四眼哥哥去咗迪迪尼同班FRIEND玩咗成日。

真心滔終於諗定買邊個單位,開始準備入伙啲野。

鄺醫生照常工作,今日唔係好忙。

OL禎爺佢係寫字樓扮工,打緊佢篇巨著。

輔導緊人嘅鄺突然打咗個冷震,起晒雞皮。

六月四日,一切風平浪靜,無事可記。

全文 6496 字 (唔計英文、空格、標點)
備註: 港語學第二屆廣東話徵文比賽作品
作者:萬曉暉