(beta 公測版本)
< 返回

《賭城》

日期:None

島城呢個名字令我即時想起賭城,所以我想將文章題目改成賭城。

賭城又令我諗起我既死鬼老豆,因為佢生前教識我幾樣野,第一係單車技術,第二係蒸魚技術,第三係賭術,呢三樣野最後成為我在外國生活求生技能。因為呢度既電視台悶死人,又無tvb 劇集,又無中文字幕,每日望住節目主持人齋talking 。好彩呢排成日有恐怖襲擊,電視台的新聞無咁悶。講番轉頭,

點解老豆教我三樣技能係呢度好有用呢?

首先係單車技術,如果我唔識用單車,呢度每次罷工,公共交通工具都癱瘓晒,如果唔識單車,我只能行路,或留係屋企等餓死。

好彩我識蒸魚技能,因為呢度d魚多係雪藏又唔新鮮,又淡又無咪,對我地食慣鹹的廣東人,簡直係折磨。

最後係賭術,因為呢度既外國人無我地廣東人咁爛賭,好彩我識打麻雀,玩啤牌,只要係手機安裝應用程式,就搵到人同我玩。我真係好想將香港的賭術介紹比呢度既外國人,因為呢度既人只愛飲酒,食煙,睇電視和聽音樂,無咩娛樂。香港導演王晶咁多講賭既電影咁賣座,都係受香港人爛賭的風氣影響。香港人數口咁好,香港黑社會講數咁叻,都係拜香港人的賭術精煁所賜。

如果呢度既人識打麻雀,開多d麻雀館就無咁多人失業。無咁多人失業,就無咁多人係街上攪事造成恐怖襲擊。學打麻雀仲可以學中文,講廣東話,鍛煉腦筋,就唔會患老人痴呆症和思覺失調,慳番唔少醫療開支。

講左咁耐,究竟大家知我而家係邊個國家?想知我而家係邊,比獎品我就話你知啦!唔比獎品我唔梗要,最梗要係我facebook 專頁比個讚我。

全文 538 字 (唔計英文、空格、標點)
備註: 港語學第二屆廣東話徵文比賽作品
作者:野馬