(beta 公測版本)
< 返回

《香港嘅科技界最需要乜?》

作者:Jimmy Wong
日期:2015年11月24日

香港嘅科技界最需要嘅唔係咩提高lT人薪酬福利待遇同社會觀感呢啲傳統左膠理念,更加唔需要政府製造多啲工作機會。科技本身就係用來消滅低生產力工作機會嘅工具。科技不斷向前發展嘅潮流浩浩蕩蕩,順者昌逆者亡。所有行業,特別係科技行業,不進則退,唔好同我講你而家仲做緊一間細公司仔嘅sys admin expect朝九晚六同高人工。你管理嘅mail server,我可以一個月俾幾千蚊Google, Mailchimp同Sendgrid。公司個Wordpress website仔我可以一個月俾百零二百蚊俾世界上任何一間hosting公司。問人攞錢之前唔該問下自己過去十年八載到底係一路增值定係貶值。

香港科技界最需要嘅係一啲有遠大目光嘅人才,一啲可以將一間公司發展到有國際大企業用十億百億收購或者上市嘅人才,一啲上左位之後會繼續投資返本地業界嘅良心人才。只要有呢啲人才,先至會有人肯大手筆投資。要有人大手筆投資間公司先可以以高於市價請最一流嘅人才。你要有最一流的人才先可以幫助公司以幾何級數成長。你要間公司可以以幾何級數成長到俾人收購或者上市你嘅share option先會值錢。你要有一間真真正正嘅startup嘅share option值錢,咁先至會引發到其他人才效法。當有一定數量嘅公司嘅share option為員工提供極大利潤回報之後,先會吸引到更多嘅一流人才攞自己嘅青春來作賭注。要有呢種經濟誘因先會有年青有為嘅星級人馬不斷發揮潛能,繼而上位,上位之後做投資者,貢獻翻個業界生態圈。

睇完咁多嘢之後,政府嘅角色除咗提供更多一流的人才之外,仲有乜嘢?你想喺創科局身上攞着數?嘿,你真係掂嘅,李嘉誠早就投資左你啦。你夠膽攞我就夠膽鄙視你。

全文 558 字 (唔計英文、空格、標點)