(beta 公測版本)
< 返回

《島城的夢》

日期:None

「夢想,於漆黑裡仍然鏗鏘,仍然大聲高唱,仍然期待世界給我鼓掌……」 聽住呢首Super Moment嘅歌,我嘅心好似就返到廿年前。

廿年前,我仲係一個中學生,對住呢個社會好多好多嘅期望,心入面亦有好多好多嘅抱負,無論啲人點講社會入面幾咁黑暗都好,我都覺得呢啲野同我一啲關係都冇,我相信,我一定可以實現我嘅夢想嘅,只要堅持落去,邊有野係冇可能架!

但係,當你踏入社會之後,你就會發現“你想”同埋“理想”嘅分別。

我叫陳一心,讀緊一間唔算太出名,但係又算係Band1學校嘅地區名校。每日嘅目標,除左返屋企打機之外,就剩返參加Joint School,出去識女仔。

你想問點解識女仔要參加Joint School而唔喺自己學校識?傻啦!男校哪有女,有就好啦!

依加韓流襲港,四周都係啲偽韓仔,偽韓妹,我都唔例外,因為韓星而剪個齊陰,著off white嘅衫,得閒跳下K pop嘅舞,聽下佢地嘅歌,日子好快就過去。

至於夢想呢樣野……喺香港生活嘅人,仲有夢想可言咩?

不過,喺每一個人心入面,應該都有一個屬於佢自己嘅夢想掛。

「啊仔!係時候溫書啦!」

「知啦!溫緊數學啊!」

望住手上面嗰個厚到阿媽都唔認得嘅File,入面裝住見到都想返學校跳樓嘅數學工作紙,睇下明星好過啦!

「你又喺到睇埋D咁嘅野!知唔知你依家F4啦!仲有兩年就要考DSE啊!你知唔知我日日辛苦返工為左啲咩啊!係為左你可以有個好啲嘅環境,讀好啲書佢,跟住入大學,出黎做野嘅時候就唔洗好似我咁辛苦!我知你想同我講,大學好難入,但係唔難嘅話就個個都入到啦!入到大學係一張入場卷……」

頂!又係講呢啲,我夠知入到大學好啦!前提係入到先得架!我天生都唔係讀書嘅料,點入U啊!

「知啦知啦!我開始溫啦!」放低部手機,將啲未做完嘅工作紙攞晒出黎,慢慢開始做,雖然表面上做緊工作紙,但係其實釣緊魚,腦入面全部都係啲同數學冇關嘅野。

啲韓星同埋啲打機選手到底點樣搞掂佢地阿爸阿媽嘅呢?如果我依家同阿媽講想去學跳舞,之後去韓國做練習生嘅話……俾佢打死都似!如果同佢講我想去台灣訓練之後做一個英雄聯盟嘅職業選手嘅話……結果應該都係藤條燜豬肉,算數啦!

「大家記住,描述數據嘅時候,如果你淨係將資料入面嘅數據寫晒出黎,你只係做到最低層次嘅答案,0至1分……」望住好似多啦A夢嘅阿sir喺黑板前講解考試技巧,真係悶到想嘔,腦入面除左K pop之外,就得返英雄聯盟嘅技巧,佢講嘅野完全都聽唔入耳。

「陳一心!」多啦A夢突然叫我嘅名,嚇到我一下彈左起身,呆晒咁樣望住佢。

「你又喺到釣魚?你知唔知你得返幾多時間啊!你得返一年半咋!依家啲F6已經走晒,F5就得返半年,半年之後你地就係呢間學校最大嗰form啦!你唔係以為你仲有好多時間啊嘛?依家LS呢一科係最唔洗讀書嘅,只要你有啲Common sense同埋小小skill就可以考得好嘅科,你都唔聽書,咁你想點啊?唔好話入U,IVE都無你份啦!知唔知入U只係一張入門卷黎架咋!如果你連入門卷都攞唔到咁你出到社會點算啊?住公屋攞綜緩,做一個廢青,社會嘅寄生蟲?定係有啲志氣做M記養自己?」

我冇出聲,都冇得出聲。

佢講得啱,我揀商科為左咩?都係因為商科有錢途姐。但係……我都係想做一個明星,喺舞台上表演,發光發亮,或者做一個職業選手,喺game入面同人搏鬥,享受成功嘅時候嗰種成就感,同埋台下觀眾嘅歡呼聲。

乜想追尋夢想都有錯咩?我唔知。我中意享受人地嘅歡呼,我覺得掌聲係對我嘅一種肯定。運動又好,跳舞又好,唱歌又好,但係呢一切都俾我周圍嘅環境所影響,導致我只可以係一個所謂嘅……正常人。

大家好,我叫陳一心,今年三十六歲,喺香港一間中型公司做管理,朝九晚九,為左交首期,日夜奮鬥,渴望升職加人工。

依家先發現,細個嘅時候,夢想係前方嘅蛋糕,手向前一伸就可以觸摸到。

成年之後,夢想就好似相入面嘅前女朋友,雖然腦海中仲有同佢嘅一切,但係佢同你,已經形同陌路。

有時諗起細個嘅夢想,心中點都會有D遺憾。

後唔後悔?

我連追尋夢想嘅勇氣都冇,我又邊有資格去後悔?作出左選擇就要為自己嘅決定負責任。

廉價嘅夢想,昂貴的路。

你又肯唔肯為左夢想,付出未知嘅代價?

全文 1375 字 (唔計英文、空格、標點)
備註: 港語學第二屆廣東話徵文比賽作品
作者:終焉之夢