(beta 公測版本)
< 返回

《島城夢》

日期:None

夢想好廉價,但係追求夢想就好昂貴。 ⋯⋯

我係阿傑。 我只係一個普通人,家底唔係特別好,不過都未使攞綜援,好彩。我一直以來都有個夢想,就係出版一本屬於自己嘅書,做一個作家。 呢份工其實都唔算辛苦,難就難在堅持。我每個禮拜都有幾日天地堂,呢段時間我就會留係宿舍,對住部電腦係度打字。睇住自己一步一步走向夢想係開心嘅,但一諗起自己生活係香港呢個唔重視文化創作嘅地方,就會開始為未來擔憂。

「你真係想做作家?」

「係呀,古語有云:冇人話你唔得,係你自己話自己唔得。堅持實有回報嘅!」

「你都弱智,呢句明明係熊仔頭講嘅?」

「差唔多啦。」

佢係我宿舍同房嘅死黨,雖然興趣唔同,但係就好投契,因為⋯⋯我哋都係有夢想嘅人。 臨走前,佢問我:「你前一排唔係去咗投稿咩?宜家點呀?」

「兩個幾月啦,都冇消息,我諗都唔多掂架啦。宜家咪再諗下點改囉。」我話。

「哦⋯⋯加油呀!撐你㗎!」然後佢就去左上堂。

⋯⋯

我叫阿朗。我好鍾意唱歌。

由細到大,身邊嘅老師、朋友都話我好唱得,天生就係一個歌手,而呢個亦係我細細個已經有嘅夢想。

曾經參加過一啲歌唱比賽,然而我唱成點都冇用。賽果根本內定!生得靚嘅,識人嘅就贏,我呢啲?邊有人理吖⋯⋯

之前亦都試過係街頭表演,但係後來我發現,根本冇人在意。冇人在意香港嘅音樂、歌手,所謂「香港樂壇已死」只不過係因為冇人支持。的確係唔公平,係令人無奈,但係我冇能力改變。依家,我仍然熱愛唱歌,得閒就會由牀下底拎番支吉他,一個人走上天台度唱歌,自己唱俾自己聽⋯⋯但係,至於做歌手,就冇再諗過。

我宿舍有個好兄弟,叫阿傑。當我一知道佢嘅夢想係要成為一個作家,我嘅心情就好複雜。

作為朋友,同時作為一個同樣有自己夢想嘅人,我當然希望佢能夠有一日,可以當住所有人面前大嗌:「我得左啦!」

因為夢想成真係每個人心裡面最渴求嘅野。

但係,作為一個放棄左夢想嘅失敗者,我反而希望佢都會好似我咁,終有一日感到無能為力,放棄追逐左好耐嘅野。好想佢嘅結局可以話我知:「其實夢想都唔係真係好重要遮⋯⋯」「其實冇夢想都冇咩所謂呀⋯⋯」

我只希望有個共犯同我一齊面對失敗,接受失敗。講真句,當我知道阿傑投稿失敗,我真係鬆左一口氣。

⋯⋯

其實我作為阿朗嘅朋友,我睇見佢失敗,氣餒,然後放棄,我都同樣覺得難過。

佢放棄,係佢嘅決定。我唔敢肯定自己到最後能唔能夠成功,我未必可以藉著自己嘅經歷去同佢講:「堅持就一定會有回報。」

但係,至少,我希望我嘅經歷,可以話比所有人知:「唔跌到遍體鱗傷,都冇資格放棄夢想。」

⋯⋯

故事嘅結局有兩個。 一個係失敗、失敗再失敗,然後搖搖頭,將夢想變成玩笑。 一個就係失敗、失敗、失敗、失敗、失敗⋯⋯ 然後最終成功。 你想呢?你嘅結局又係點?

全文 927 字 (唔計英文、空格、標點)
備註: 港語學第二屆廣東話徵文比賽作品
作者:林智鋒