(beta 公測版本)
< 返回

《黃埔》

作者:Jimmy Wong
日期:2015年11月24日

其實黃埔自古以來就係開平仔嘅勢力範圍,我細細個就好鍾意同同學仔落去嗰度蒲。當時我覺得黃埔簡直係一個天堂。乾淨企理,又有足球場又有泳池又有遊戲機中心,人流又唔複雜,好玩過旺角十陪。嗰度一向俾我嘅感覺就係一個中產區,好多老豆老母都係公務員。住喺嗰度嘅同學都知書識禮,而且視野廣闊,可以話個個都見過下世面咁。我記得唔知中二定中三嗰年,我上中史堂讀大中華膠史觀讀到上晒腦。有一次我同個女同學傾計傾傾吓我真係膠到走去問佢「你係唔係中國人?」。個有幾分自尊嘅女同學當然答我:「唔係,我係香港人」。可想而知當年港英餘孽家庭出身嘅同學思想幾先進。

好可惜,唔知係因為佢哋都搬走晒,定係自由行或真係共產黨清洗人口嘅原因,自從我去咗外國讀書幾年返嚟之後,個個舊同學都唔肯同我落黃埔玩。我問佢哋點解,佢哋個個都話:「好多大陸人」。當時已經成為一隻大西洋左膠嘅我心諗:「唔係咁大鑊呀,TBB都話大陸依家好進步,香港啲正義良心又叫我唔好歧視新移民,係你地普通話渣,唔抵得人哋唔同你講廣東話啫」。既然冇人陪我,咁我隻身走落去重溫美好回憶啦。吖,點知落到去,發覺啲嘢真係貴咗好多又難食咗喎。買嘢又冇乜好買,書局同仙跡岩又摺咗,機鋪都摺埋。仲有因為個爛鬼紅灣半島,理大宿舍同埋一連串嘅屏風樓,連海景都冇左大半。話雖如此,當時黃埔的確冇我同學講咁多大陸人,最多都係海逸洒店出面多咗幾架旅遊巴。不過多咗一樣嘢-好多港媽同幾歲細路仔講英文。

琴晚我見到巴治奧個post,見到蕙禎BB只差一百票就可以踢走鼠王芬。我以為黃埔東嘅村民終於醒覺喇,可以光復黃埔喇。我即刻飛的落去幫蕙禎BB影相。一落到去,哇屌你吖,冇來幾年黃埔做乜搞成咁。啲樓嘅外牆污糟邋遢,樓齡差唔多成40年都唔維修。街邊又因為要起地鐵站,到處都整路,搞到烏煙瘴氣,行又唔得企又唔得。建制派搞「地區工程」,搞「大維修」唔係好叻嘅咩?啲港媽唔係以為鼠王芬做得好吓話?
吖,點知蕙禎BB都係要輸300票,今晚黃埔個隻毫無品味可言嘅石屎船下面仲俾人影到一隻過街老鼠走過。唉。

全文 741 字 (唔計英文、空格、標點)