(beta 公測版本)
< 返回

《喂,隻雞翼未熟喎》

作者:雞絲陳
日期:2014年6月18日

有時候討論嘅困難係,我同你講咦喂隻雞翼未熟喎,你就話:「我啲雞翼巴西空運到港咖!」我話:「但係真係未熟喎...有血喎...」你就話:「咩呀?我啲雞翼係貴嘢黎咖囉!啲雞喺巴西走地咖!你咪再亂講!」我再話:「但真係好生下喎...」你就拍哂枱話:「好喇喎!城市佬!養禽業嘅嘢你識條毛咩?你再講我告你誹謗!」隔離枱仲要有人搭嗲:「好心你啦!隻雞翼咁肥美睇落啖啖肉,你仲喺度阿吱阿咗!」咁......未熟就未熟咖啦,關我識唔識養雞同隻雞邊度黎咩事...我同你講舊食物嘅生熟程度、入唔入得口、會唔會食到痾,你同我講啲材料還原返拼湊成原隻再死而復生前係點樣愉快地喺在無邊的農場中生活......我就開始懷疑我講緊鴨話而你只識聽雞話。@@「討論」左一大輪,隻雞翼仲係未熟,雖然佢有巴西血統。

我只係聽到友人分享經歷有感而發...我近排好乖,冇批判,冇格鬥,溫和到不得了...閒時睇下呂律書陶冶性情。♥ 我只係諗左呢個雞翼問題好耐,到底人可以九唔搭八到一個咩地步,到底正視一下隻雞翼嘅血回應下佢未煮熟嘅問題係咪咁難。我想不透的事實在太多。

「你咁唔gurr我啲巴西進口雞翼,世界盃都唔好睇丫笨!下屆奧運都唔好睇丫!杯葛巴西丫嘛你!」下...哦。@@

全文 413 字 (唔計英文、空格、標點)