(beta 公測版本)
< 返回

《橙與朋友》

日期:2014年11月9日

主旨 :
借橙來說出友誼嘅可貴, 再反映近期由佔中事件而引發嘅unfriend潮, 係幾咁無謂。
老實講, 我自己對於食橙呢件事, 感覺比較平淡。不過, 我都好想借橙嚟講講橙與朋友嘅關係。更何況, 我身邊有朋友好鍾意食橙, 直頭係會日日都食, 當橙好似係自己嘅好朋友咁。
其實, 都唔難理解點解有D人會同橙friend得咁緊要。因為, 橙, 在我嘅觀察裡面, 係幾似一個有血有肉嘅人 - 從內到外, 非常有層次、非常有內涵。
首先, 睇吓橙嘅外表, 有光澤嘅橙色皮膚, 就好似一個充滿正能量嘅人, 渾身陽光, 渾身開心, 好似識笑咁。而且, 橙皮有厚有薄, 就好似人類嘅保護罩, 有人性格輕鬆, 比較容易會相信別人; 也有人性格偏向小心翼翼, 披上厚一點嘅保護罩(厚橙皮), 需要長D時間先能夠相信別人。
識朋友, 真正去認識一個朋友, 咪好似食橙咁, 要花D時間, 花D耐性, 退去橙皮, 然後去了解橙肉是否甜? 酸? 多汁? 乾水? 純真? 保守? 嚴謹? 不拘小節? 風趣? 樂觀? 悲觀? 有責任感?...... 等。
除此之外, 被剥下嘅橙皮仲可以放入雪櫃裡面, 做良好嘅吸味劑。就等如當我哋覺得好凍, 人間無情嘅時候, 最好搵朋友傾訴一吓, 讓朋友偶爾做做自己嘅吸味劑。
當剥開橙皮之後, 我吔仲會見到入面有一層近似透明既衣, 才到橙肉。呢層衣, 好似人類嘅真皮咁, 好有用處 。因為呢層衣有豐富嘅植物纖維, 食落肚後大大幫助排便, 清除毒素。我哋試諗吓, 朋友其中一個重要功能, 就係幫手聽聽苦水, 幫我吔清走心靈深處嘅毒素。如果我無朋友, 我諗我好容易就會發毛生菇!
而家講到去橙肉啦。身為一個香港人, 我吔其實幾幸福架。因為我吔有機會品嚐到來自亞洲、中東、歐洲、大洋洲、美洲、甚至非洲(如果有)嘅橙。無論個橙係嚟自乜嘢地方, 乜嘢背景, 味道都係離唔開橙味。同樣地, 我吔可以跟來自不同地方、不同背景、擁有不同味道、擁有不同意見嘅人, 做朋友, 做好朋友。
一棵橙樹, 所生出嚟嘅橙, 都無可能粒粒甜、酸度一樣。但係大地、雨水、空氣、陽光, 係唔會因為某D橙無咁好味, 而將佢地unfriend, 扼殺佢哋正常嘅成長權利。
更何況, 橙肉含有豐富維他命C。維他命C有美白作用, 所以我哋食橙, 起碼可以令皮膚靚靚。而一個人, 定期搵知心友見面, 可以得到認同感、溫暖感, 面上泛起一種I am Not Alone嘅滿足和喜悅, 好過茶好多好貴嘅什麼品牌護膚產品。
喺橙肉裡面, 我咃仲會見到橙核。因為聖人都會犯錯, 所以, 呢D橙核就好似一個人嘅性格陰暗面咁。就算喺一個好甜嘅, 一個聲稱無核嘅橙入面, 其實都會有核, 有一D好細粒, 食落肚無傷害性嘅核。我哋要食完成個橙, 必定要接受橙肉入面同時有橙核 - 我哋去認識一個人, 必定要包容佢性格入面同時存在嘅不足之處。
而一粒橙核, 畀我哋掉走咗之後, 若果它有緣遇上泥土, 係分分鐘會生番一棵橙樹, 令到呢個橙嘅精神延續下去。而一位好朋友, 佢嘅良好精神, 就算佢己經死咗, 依然可以長存於我哋嘅心坎入面, 永遠延續下去。
一位好朋友, 一位認識多時嘅好朋友, 係會隨住我哋對對方嘅了解越多, 而越知道對方所散發出嚟嘅獨特韻味。當我哋跟一個人做咗知心好友, 我哋會好想將呢位朋友介紹畀其他人知道, 甚至係畀家人知道。好得意地, 當我哋去食橙, 身邊嘅人好自然會聞到, 知道有人食緊橙。就算我哋已經食完個橙, 洗埋手, 橙味仍然會在手上、在口腔、在衣服、在空間裡停留好一陣子, 畀當時喺附近嘅人知道所以, 我哋unfriend咗一位朋友, 一位曾經用心相交過嘅好朋友, 在生活軌跡上, 真係可以咁容易就抺走咗?容易到好似在電腦面前撳一個undo制咁簡單?
一棵豐盛嘅橙樹, 可以同時兼容甜橙、酸橙、多汁橙、乾水橙。一個進步嘅社會, 可以同時接納叻人、蠢人、靚人、丑人。一個色彩燦爛嘅人物, 可以同時認同性格平和、激進、積極、消極嘅朋友
雖然我同橙呢個朋友, 目前講唔上好friend。但係我最近食多咗生果, 當然亦會比以前食多咗D橙。我諗, 我對橙嘅態度, 已經漸漸由unfriend變咗friend。希望......下一步, 我同個橙, 會由status : friend, 變成交往中咁關係密切啦。

全文 1346 字 (唔計英文、空格、標點)
備註: 港語學第一屆廣東話徵文比賽作品
作者:甄朗瑜