(beta 公測版本)
< 返回

《你老母》

日期:2014年11月9日

你老母。
頂,今日先記得,原來今日就係deadline要交港語學個比賽篇嘢。
唉,其實冇乜心情寫,因為女神仲未追到手。
咁,冇成功故仔,只有五個失敗例子可以比大家,特別係細個啲嘅毒L,真係唔好比自己咁多籍口呀。

故事一
經過咗幾年嘅和尚寺(唔講名啦)生涯,我去咗一個地方叫黃刀市。呢度,你google下就發現,真係荒地中的市鎮。最正嘅係,好Q凍。呢個地方,冬天長到呀媽都唔認得,仲要有埋北極光,係呀,差在未見到野生灰熊。喺度我明白其實自己想要啲乜。由於毒L性格,識朋友真係我weakest link(最弱一環),結果呢,都叫做有少少朋友啦,仲要有個女仔成日同我講嘢。我其實又冇話想點,但鬼妹喎…不過最後,我都係過唔到自己嗰關,因為,好快我就要走,我仲留人地做乜?
好記得佢同我講,「有個男仔想追我」(in English)嗰段說話,就大約係我搵咗佢做我prom date(即係畢業晚會個舞伴)之後…唉,年少無知? 之後去到機場等轉機,其他交流生問我,我同佢其實係點,原來全部人都覺得我地有嘢…

故事二
之後回港入返一間男女比例正常嘅中學,學校整體比例正常,但理科班同文科班就一啲都唔正常,呢樣大家都知架啦。而我又要係理科班喎。不過當中最大問題係,咁又點? 唔代表有合適對象架。結果當中又出現兩件事。第一樣我明白朋友的對象不能拿來做對象,第二樣,就係做好自己先。喺嗰度我有2個人要提起。第一個係成日同我轉達其他人對我睇法嘅人,佢幫咗我好多。另一個係朋友個朋友。
朋友個朋友呢,就係朋友A 嘅 cosplay朋友。嗰時其實我唔知係我PK定盲無,應該估到朋友A(我簡稱佢咁容易啲講)對呢個朋友個朋友(簡稱朋友B)係有啲意思。點知,後來朋友B單獨約我睇卡通片喎。咁我又真係想睇嗰套卡通,咁咪去law。點知睇完佢又kiu我手喎。作為一個無主見嘅雙魚座,我又竟然由得佢喎。咁都冇嘢架。點知…
點知就喺嗰個沙田某大商場度,打到正咁比化學個阿sir面對面咁見到。明明佢家住東涌,點解會入咗沙田架? 佢後來有講過,因為沙田方便…我唔知佢點定義乜叫方便啦…但佢一定大細一齊咁出,應該係ja車?點都好,呢個阿sir應該之後爆咗我出嚟,因為唔夠幾日全班都知呢件事,而嗰個朋友A見親我都好似見到仇人咁…我當然依家知我嗰時幾咁PK。
當然最後轉達比我聽嘅又係嗰個異性朋友C。最後我地都只係朋友,但佢應該係成間學校同我講過嘢最多嘅異性,而佢之後亦同另外一個同學拍施(不過好似係畢咗業之後嘅事啦)。

故事三
其實同朋友B 嘅故事未完,到咗我大學之後,咁我上莊啦,當然上莊又係另一個奇怪決定影響我好多,但當中出現一個插曲又係同朋友B有關。上上下莊,朋友B突然又連絡我,之後又睇戲啦等等,點知,佢直頭問我,「不如我地拍拖啦」…以我拖拖拉拉加上嗰時又冇任何對象在心中,我竟然會開始考慮…
結果呢,我發現,原來我係接受唔到快餐。

故事四
其實可以講好長,但簡單咁講,我今次係第一次鐘意人而有所行動嘅一次。點解咁講呢,因為以前我有feel都係無行動過(故事一次嗰啲我直情唔想寫啦),而今次行動係故意失敗。點解呢? 我份人有個問題係,唔可以喺心頭上放太多嘢,而感情嘢係會特別重。所以一有想鍾意嘅人其實同每日打我幾拳冇分別。
結果我鍾意咗一個人,佢係我下莊,而我都係無意中發現自己對佢有意思。咁我當時真係幾PK,又唔去了解人,又唔試下做朋友先,結果呢,就用自殺式方法令自己死心。即係點? 令到對方對我反感,令自己死心,話幫佢做嘢又遲到啦,又表白啦,結果當然求仁得仁。
我知道咁做係好唔啱,所以之後都冇再做過啦。

故事五
吓,仲有咁多單? 係呀,如是者我畢業都在等待,因為呢,我讀嗰科本來就男多女少,兵多觀音少嗰啲E字頭嘅科。咁我除咗上莊之外又冇乜點參加義工,咁當然朋友少,對象自然更少啦。咁如是者,喺某地方要幫手接待外國學生,咁學生即係有男有女啦。咁我啲同事有個就好中意同啲異性同學「交流」嘅,咁我跟住佢自然都識到幾個人。但係得嗰幾日只不過能成為點頭之交,要上到朋友,或者以上,其實真係好難(以我呢種人而言快餐真係唔得),結果呢咁就完咗幾日。
之但係,係其實係要再接多另外一堆學生。中間雖然有repeat,但係玩開嗰幾個大部分都係大陸過嚟,咁下一站係上海佢地當然唔會有興趣join啦。咁個問題嚟啦,咁即係又要由頭識多啲人。點知又真係Q,當中有兩個原來之後都喺上海,咁又可以玩多一個星期啦。咁就煩啦,唔知邊個喺度話我同其中一個有嘢,咁我個人就係咁,有人話我反而會覺得自己係咪有鬼…由此我又明多咗自己一樣嘢,而朋友都係keep返朋友,特別係異地嗰啲。
之後佢差啲會嚟香港讀書,如果真係嚟我就真係唔知點啦…

故事六
DiX,仲有故事六? 其實冇。因為仲寫/發生緊。呢個又係一個聰明有趣又得意嘅好女仔(鬼唔知情人眼裏出西施)。唯一可以講,我唔想好似故事四咁,因為怕辛苦反而做咗啲傷害人嘅嘢,而且我都幾肯定我係鍾意佢(人地鍾唔鍾意我呢樣嘢,我睇算其他人係咪鍾意人但睇唔算自己target)。希望佢睇唔到呢篇嘢,唔係佢實知係我寫。至於嗰啲話點解識人要咁耐先決定喺唔喺埋一齊嗰啲朋友,我只可以話我呢類人係要好確定先會進一步。
咁我唯有努力,亦望各位有情人終成眷屬。不過如果想支持下,都可以投我一票,以示鼓勵!

全文 1802 字 (唔計英文、空格、標點)
備註: 港語學第一屆廣東話徵文比賽作品
作者:Chiang Sze Cheuk