(beta 公測版本)
< 返回

《罅中生機》

日期:2014年11月9日

前排有晚係樂富搭巴士返沙田。架車埋站果陣,車內右邊既燈係熄左的。
咁浪漫既(九巴又冇錢幫巴士維修?) 。我上到上層,望兩望,見到右手邊第二排有個窗口位。窗口位就快坐晒,呢個位又唔洗比人頂腳,一於坐呢個位。
一坐低,放低個袋係地下,咦?架車行緊,做乜車窗外有啲野好似係度吊吊揈既?
呢個時候,架巴士全速駛入獅隧。(唔,那夜我登上了前往沙田的九巴) 而借住隧道內既燈光,我可以睇清楚呢舊吊吊揈既物體究竟係乜東東。原來係一棵草。呢棵草,就係車窗同車窗邊既膠框之間生出黎。唔…用”爆” 出黎會貼切啲,事關棵草個莖部,係將車窗同膠框果個極狹窄既空間撐大幾倍再一野伸出黎,咪話又有幾分霸氣。
當然,巴士車窗邊果條罅就唔係設計到可以生草既,而且日日穿梭繁忙道路,果條罅應該係裝滿塵,實在冇乜可能會生到草。但就係呢棵草,呢棵充滿生命力同毅力既草,排除萬難,” 爆” 左出黎接受大家既欣賞。
我願做呢棵草。今時今日既香港,既係烏煙瘴氣,更加係箝制多多。而我作為一個即將走上DSE不歸路既中六學生,我明白到呢代人背負住香港既未來,角色亦都更顯重要。
(寫於14年8月頭。)
(同年11月9日後記:係8月至今香港發生左好多事。我更加了解到今日香港年青人、學生要願做一棵衝出框框既一棵草。)

全文 449 字 (唔計英文、空格、標點)
備註: 港語學第一屆廣東話徵文比賽作品
作者:林永彥