(beta 公測版本)
< 返回

《給天上嘅爸爸》

日期:2014年11月9日

親愛嘅阿爸,請原諒我咁大個女都未試過寫信俾你。直到你離開呢個世界已經兩年喇,到依家先至肯扚起心肝,認認真真咁寫封信俾你,對你講出一直藏喺我心底廿年嘅說話。
其實我一路以嚟都好感激你,因為冇你嘅養育,就唔會有今時今日嘅我。所以我要喺到好衷心咁講句:多謝你。
以前冇講,並唔係因為我以前一啲都唔感激你,而係因為面子問題。嗰時我仲細,心智仲未成熟,心裡面一直覺得,如果同你講多謝,就等於認低威,特別係喺我哋鬧完交之後,就更加唔會同你講聲多謝,因為我唔想喺你面前認輸。
我記得每當我哋嘈交,傾唔掂數嘅時候,你都會撻一句「唔係我養你,你會有今日?」嚟要我收聲。我每次都好唔忿氣,我唔明點解,明明我哋講嘅嘢係完全唔關我識唔識感恩嘅事,但你係都要講啲咁嘅說話,講到我好似唔識得飲水思源咁。即使我心知道我唔係忘本,我會感恩,但係我都總會因為你呢句說話而搞到唔開心。
就好似有一次咁,你要阿媽終止收費電視嘅合約,但係阿媽搞唔掂,你就即刻鬼殺咁嘈。當時我心諗,其實冇咩大不了啫,最多咪簽多一年約。但你係都要發爛渣,係都要搞到家嘈屋閉,係都要阿媽自己執手尾。嗰陣時我忍唔住咁鬧咗句:「有咩事起上嚟,你剩係識得喺到嘈,大家一家人嚟架,點解唔可以一齊解決問題,而剩係將責任推嚟推去?」到依家諗返起,我都覺得我講嘅嘢唔係冇道理,但係當時嘅你只係覺得我喺到搞事、駁嘴,根本咩都聽唔入耳,所以你又係用嗰句嚟鬧返我轉頭:「咩都要加把口!唔係我養你,你會有今日?」
對於呢件事,我一直都耿耿於懷,即使喺你過咗身之後,我都仲係有啲唔忿氣。但直到經歷過佔中呢件事,先令我有機會從另外一個角度去睇呢件事。
因為佔中,唔少年青人同父母反晒面,互相指摘。大人就話班年青人唔識飲水思源,未捱過就出嚟阻住地球轉,剩係識搞風搞雨;同一時間,年青人就話如果唔係班大人唔肯出嚟爭取,使乜搞到佢哋出嚟瞓街、搞抗命。一睇到呢個情境,我就不期然咁諗起我哋鬧交嘅場面。
我當然係企喺年青人呢邊啦!因為我好清楚,我哋出嚟抗爭都係為咗追求我哋心中嘅理想社會,一個平等、自由、和平嘅社會,而唔係為咗擾亂社會秩序,摧毀香港。就正如我駁你嘴,都只係想幫手解決件事,而唔係挑戰你一家之主嘅地位。
所以我一直都好唔明白,究竟我哋做咗啲乜嘢而令到你哋覺得我哋唔識飲水思源 ?
就喺呢段時間,我睇到有唔少嘅評論,係鬧啲大人不分青紅皂白,只顧自己嘅利益,甚至講到賺錢為頭家係一件好不值一提嘅事,相比起佔中嘅意義簡直係差天共地。喺呢一刻,我開始明白到點解你成日都覺得我唔識感恩喇,係因為我咁耐以嚟都冇做過任何嘢,或講過任何嘢去令你知道其實我係好感激你嘅養育之恩。我以前甚至會衰到為咗啖氣,為咗拗嬴你而抹殺你嘅功勞,講到你去賺錢就只係想我唔好駁嘴,鞏固自己一家之主嘅地位。但係其實我好清楚,你咁辛苦搵錢都係為頭家,係為咗令我哋過啲更好嘅生活。
我唔係話要比較邊樣嘢嘅意義大啲,因為我哋都知道喺每個人嘅心目中,都有一把唔同嘅尺,根本就冇得拗同唔需要拗。而係大家需要嘅係尊重唔同聲音 (唔包括意氣用事、違背良心嘅說話)。
事實係,大家都係好錫對方嘅,只係有時因為意氣用事,而唔肯放低成見,甚至用啲好難聽嘅說話去傷害對方,最後搞到不歡而散。即使我到依家都仲係接受唔到你鬧我唔識感恩同忍受唔到你啲臭脾氣,但係另一方面,我亦都會諗,如果我可以用一啲比較禮貌嘅語氣去同你講,我講嘅說話你或者會聽得入耳,最後件事未必會搞到咁僵。
不過一切已成過去,我依家應該要做嘅係用一種好禮貌、謙虛嘅態度去同啲反佔中嘅大人講聲:
「我哋就係因為感激香港呢個咁美好嘅地方,感激你哋過去所付出嘅努力,先至咁拼命咁去爭取民主,追求一個更平等,更自由,更和平嘅社會,令香港人活得更開心,更有尊嚴。出嚟抗爭,除咗係為咗自己,為咗下一代,更加係為咗答謝你哋。所以我好衷心咁希望你哋可以支持我哋,因為你哋嘅支持,其實對我哋嚟講係好重要。」
而我都好希望阿爸你都可以喺上面全力咁支持我,俾信心我,等我更有勇氣去追求自己嘅理想,等我第時上天堂嗰陣都有面目見你呀嘛!

全文 1491 字 (唔計英文、空格、標點)
備註: 港語學第一屆廣東話徵文比賽作品
作者:利海怡