(beta 公測版本)
< 返回

《夏夜》

日期:2014年11月9日

天文台啱啱發出今年第一個酷熱天氣警告,冷氣機就罷工。
將屋企所有嘅窗開到最大,迎面而嚟陣陣又微又熱嘅風,由隔離屋部冷氣機吹過嚟。算!有總好過無。搬出封塵嘅風扇,一路吹住又微又熱又有塵嘅風,一路催眠自己:「心靜自然涼……自然涼……涼……」。
「囁……囁……囁……」 擘大眼,望一望手機,半夜一點。屋企靠山,山上種樹,樹上有蟬。蟬版既喜愛夜蒲喺出面播緊。大量嘅蟬不停咁叫「我喺度!我喺度!上我啦!上我啦!」充滿激情同愛慾嘅叫聲,叫到我心都煩、人都熱。好彩,蟬嘅生命美妙而短暫。一個鐘頭之後,所有嘅蟬都靜左落黎,外面淨番低沉而有規律嘅冷氣機聲,我身心都慢慢靜番落嚟。
「你老味!做乜乸野咁撚貴架!」
「屌你!過海係咁貴架啦,你蘭桂芳番觀塘喎!」
「搶錢呀!的士佬搶錢呀!」
擘大眼,望一望樓下。一個醉酒佬、一個的士佬。
喺醉酒佬同的士佬相互問候對方、對方嘅器官同全家大約半個鐘後,兩個實Q扮急急腳咁走出嚟。「先生,冷靜啲!細聲啲!而家好夜㗎啦!」
係呀,好夜啦,三點啦,先生你咪嘈啦!

「你、你老味!咁撚多人出黎做咩呀!我有交管理費架。」
係呀,你交左錢,人地而家咪出黎管理你囉!
「人多大Q晒呀!?我好撚驚呀!我報警㗎!」
實Q應該比醉酒佬更加驚,因為佢地一早已經報左警。醉酒佬都仲摷緊電話果陣,差人已經到啦。
「差人呀!咩呀!差人大撚晒呀!」
又係你話要報警。
「差人掹槍呀!你地咪行撚埋黎呀!我報警架!」
又報警!?
就喺呢個的士佬、實Q、差人都唔知點應付呢個被害妄想醉酒佬嘅時候,越黎越多人比醉酒佬嘈醒,個個都挨晒喺窗邊睇戲。就喺呢一刻,高處傳黎一把強而有力嘅聲音。
「屌!開槍啡撚瓜佢啦!」
一捶定音。醉酒佬跌左喺地,差人輕輕將佢扶起,押上警車帶走。的士佬同實Q靜靜咁散去,挨喺窗邊嘅人都將佢地嘅頭縮番入屋。頭先成個鐘嘅鬧劇好似無發生過咁,淨番低沉而有規律的冷氣機聲。

「啪!啪!啪!啪!」
擘大眼,朝早五點。樓下公園有個阿嬸喺度做早操,揮動雙手拍打自己大脾兩側。肉做既大脾拍出極之響既聲音。嘗試當數綿羊咁,跟住拍脾聲數數目。
「啪!啪!啪!啪!⋯⋯啪啪!啪!啪啪啪!啪啪!啪啪啪啪!啪啪!」
阿嬸加速?望一望樓下,阿嬸一分為二。慢慢,兩個阿嬸開始配合對方既節奏,同步。
「我個新抱呀⋯⋯啪!佢又做乜呀!⋯⋯啪!整壞左個飯煲呀!⋯⋯啪!搞錯呀⋯⋯啪!買左個新野又唔好用⋯⋯啪!」
起身。「啪!」刷牙。「啪!」換衫。「啪!」買冷氣機。「啪!」

全文 793 字 (唔計英文、空格、標點)
備註: 港語學第一屆廣東話徵文比賽參賽作品
作者:黃嘉文