(beta 公測版本)
< 返回

《我究竟同廣東話個距離係遠定係近?》

日期:2014年11月9日

我究竟同廣東話個距離係遠定係近?
我自己都唔知。
我哋平時講野,梗係會用廣東話啦,唔通你會用自己好普通嘅普通話黎同人溝通咩 ?
但係我地由細到大都係學點用書面語寫文,而唔係口語。你諗下如果小學果陣同你講:「小朋友,快啲用廣東話嚟作文啦。」。你會棟左係到,心諗:「個『嘅』字點寫?個『唔』字可以寫出黎架咩?」。
講真,一開始我見到呢個廣東話比賽都打左個突,仲以為係有人惡搞,作呢個比賽嚟整估人。但之後睇落,又唔係喎,睇落個比賽係堅架喎。
其實自己都好鍾意作文,當然寫得好唔好係後話啦。平時寫文都只會用書面語,最多只會係平時whatsapp傾計嘅時候用下口語,但真係唔會用口語嚟寫散文,感覺.......其實真係好奇怪。
究竟係咩野令到口語唔可以登上大雅之堂?
係20世紀初期,胡適提倡用白話文寫文,令中國人由寫文言文變成寫白話文。你而家覺得寫白話文好正常同好有文化啊,但係以前嘅人覺得寫白話文好無文化、好核突。點解會有咁嘅變化?因為寫白話文變得普及囉。
而家啲人覺得寫廣東話好無文化,就好似以前啲人覺得寫白話文好無文化。我諗點解寫廣東話比人感覺無文化嘅最大原因係因為用廣東話寫文唔夠普及。
你可能會唔同意我嘅講法,話:「啊大姐,點會唔普及啊?個個whatsapp, Facebook 都係打廣東話啦,你大我呀?」
冷靜啲先,你諗下你有冇係一篇見過論文用廣東話寫嘅?係課本呢?係餐牌呢?係冇呀!冇呀!即使係雜誌上嘅專欄都好少會見到。係唔係冇聲出呢?我都知我講得啱架啦,但你可能會問:「點解用廣東話寫文唔普及?」。呢個問題,就等我嘗試答你啦。
語文嘅出現,係為左方便人與人之間嘅溝通。即係話你用廣東話寫餐牌、路牌,可能有人會唔明,特別係老一輩。佢地細個一定會學點寫書面語,但係佢地未必會識寫口語,係咪?
其實我覺得寫口語都可以好有文化,你仍然可以用到唔同嘅寫作手法同修辭手法去寫文章。語言唔粗俗,只係用佢嘅人好粗俗啫,佢地永遠都唔會用呢啲手法去寫文。
我真係好鍾意廣東話架,因為用廣東話寫野講野好傳神。用廣東話搞爛gag 同玩食字真係人生一大樂也。
打完成篇文,我都仲諗緊究竟其實我同廣東話嘅距離有幾近,又有幾遠。

全文 756 字 (唔計英文、空格、標點)
備註: 港語學第一屆廣東話徵文比賽作品
作者:木易