(beta 公測版本)
< 返回

《身在福中不知福?》

日期:2014年11月3日

爸爸媽媽,嚟到呢間學校已經個幾月喇,我真係好後悔當初嘅決定。自從屋企嚟咗個工人,佢係都要日日朝頭早仲未訓醒就叫人起身,係都要幫人換衫、刷牙、洗臉、梳頭、係都要喂人食早餐、幫人綁鞋帶、係都要……日日都當我公仔咁玩,我真係忍無可忍!我本來嚟呢度係為咗體驗自由嘎嘛,但係真係令我好失望啊!
呢間學校真係好落後啊。一間資優嘅學校點會咁樣嘎!明明就係市區嘅金融路段,本來應該周圍都可以見到名貴嘅跑車,啲空氣應該混雜塵土同汽油嘅味道嘎嘛。但係呢度竟然落後到連架單車都見唔到,啲空氣清新到好似原始社會咁。地面上本來就乾淨到一啲垃圾都冇嘎,但係仲要啲學生日日朝頭早掃地,你哋話呢間學校係咪好過份啊!仲有啊,咁大間學校,居然連棟水泥同混凝土嘅宿舍都冇,但係啲宿舍又周圍都係。我簡直唔敢相信!呢度啲宿舍原始到用埋啲奇奇怪怪嘅塑膠布同鐵絲支撐而成,一有啲咩風吹草動,我都好驚佢會冧咗落嚟,嚇到我晚晚都冇覺好訓,你哋話我係咪應該翻屋企啊?
同埋呢度啲老師真係好冇自尊嘎。呢度啲老師一啲學者風範都冇嘅,個個入到嚟,啲學生好嘅壞嘅都係咁教。有位老師啊,佢明明就係教英文嘅,教教下話放個小息休息下,居然同啲學生坐係度食嘢,一齊講阿詩同阿明,仲要一齊唱埋佢哋啲歌,我真係覺得我份學費俾蝕咗。佢哋連身份地位都冇,點樣教我以後出來做達官貴人啊?一啲架勢都冇,以後仲邊會有人跟我揾食?怪唔得啲人話嚟得呢度,以後米洗指意出去為人民服務喇!
仲有呢度啲同學好蠢嘎,佢哋一啲商業頭腦同偉大理想都冇嘎。我啱啱嚟到呢間學校嗰陣,一個人拎住幾大抽嘢,有個同學三唔識七走埋嚟幫我拎,仲有同學問我需唔需要佢哋幫手。我哋去餐廳食飯都要加一服務費喇,佢哋蠢到連小費都唔收,搞到我仲以為自己去咗雷鋒時代。 仲有啊,呢度啲同學真係好冇商業頭腦嘎,間學校附近都冇咩商鋪有日常用品賣,本來係校園度開間鋪頭仔賣呢啲嘢嘅話,實發到豬頭咁嘎嘛, 點知佢哋自發搞埋啲咩物資捐獻站,任有需要嘅人拎喔,你哋話佢哋係咪冇生意頭腦啊?講到理想,我自細就唸住大過之後要做一個大官,但係呢度啲同學仔呢,個個都冇咁嘅偉大理想嘅。佢哋成日都淨係係度批評啲官員,佢哋話呢啲係佢哋嘅公民責任喔,連啲偉大嘅理想都冇,仲同我講點樣做個合格嘅公民?同條鹹魚有咩分別!佢哋個個都傻嘎,日日亂咁講埋啲自由民主嘅嘢,呢度咁落後,啲人又咁蠢啊,講呢啲嘢有咩用?講錢先至實際嘎嘛。我最頂唔順嘅係學校見到嗰啲報紙,簡直係亂咁嗡,當秘笈!邊有報紙唔精心加工過就出街嘅姐?仲要報埋啲「警察同黑幫合作,聯手攻打市民」嘅言論,成日睇埋啲咁嘅報紙,唔怪得呢度啲人咁蠢喇!爸爸媽媽,「近朱者赤,近墨者黑」,你哋係咪要快啲嚟帶我翻屋企?
「生命誠可貴,愛情價更高。若為自由故,兩者皆可拋。」我嚟呢度本來就係為咗體驗自由,但係,我連去個廁所都要排一條又長又曬時間嘅人龍,企到攰死咁攰!點解我唔可以直接沖上去? 我親愛嘅爸爸媽媽,你哋話我係咪真係身在福中不知福啊 ?

全文 1095 字 (唔計英文、空格、標點)
備註: 港語學第一屆廣東話徵文比賽作品
作者:殷琦