(beta 公測版本)
< 返回

《港式情信》

日期:2014年10月31日

身邊好多朋友表白、示愛嘅時候都會寫情信,佢哋果時就會古人上身,明明平時冇咩墨水,都會變成大文人。但係,有無諗過,收果個人會有乜反應呢。
「我對你的愛有如滔滔大海,如果你是太陽,我就是太陽餅;如果你是月亮,我就是月餅…」
咁嘅文筆都想溝到女?似玩嘢多尐喎!我諗:如果我係個女仔,收到咁嘅行貨,真係唔會對個男仔有好感,反而覺得佢玩緊自己囉。好啦,收斂番少少,加番丁屎咁多修辭技巧:
「在黑夜的大海中,你是我的指引明燈;在茫茫的沙漠裡,你是我的北斗星…正所謂:兩情若是久長,又豈是朝朝暮暮。」
你嗡乜呀?指引明燈,北斗星?我有無咁偉大呀?我連自己想點都未知,點指引人呢。同埋好地地講乜文言文,識你老鼠咩!原諒我比較無詩意,唔識乜叫做比喻,更加唔好同我講意象,你估考試咩,重要我填「作者在這裡運用了什麼意象」嘅白痴問題。
係咁講落去,咁咪唔洗寫情信囉…但係人哋想浪漫下呀嘛,一係咁啦,情詩!一嚟可以show到我嘅文學氣質;二嚟,又可以冧到女,完美。咁我想問下,你係咪張愛玲?定係你係徐志摩?啦,唔好同我講你係納蘭性德。大佬,平時連詩都唔睇多首嘅人,重要同我講作詩?你估你喺天才咩!最怕詩就作唔好,反而自尊心就比人踩到渣都無得淨。其實有無諗過,用廣東話,簡簡單單寫出自己感受重好呢?起碼符合番自己性格,同埋夠真先啦。
「是咁的,其實第一眼見到你就唔多順眼,但係相處落又覺得你份人幾好wo。我唔識乜野甜言蜜語,我可以同你講嘅只喺我鍾意你…」
見到呢啲咁嘅信,相信你第一個反應係「wow…有人同我表白呀」,咁咪夠簡單,夠直接,一嘢就帶到入主題啦。得啦,覺得太簡單,show唔到你果份浪漫氣質出黎呀嘛…咁你有無睇過高登潮文?知唔知點解會有咁多人追呀?隨左佢劇情夠好,符合番社會議題之外,重要嘅係,佢哋嘅文筆上面多左一份港味。
台灣人寫情信,北京人寫情信,到香港人寫情信,你覺得同樣嘅書面語,邊個會寫得更好?人地就「我手寫我口」,我哋就「我手寫他口」;人哋用錯字就系專登,我哋用錯字就系狗屁不通。係咁現實架啦,鬼叫你母語係廣東話呀!正因為咁,我哋要運用番我地本身嘅優勢,同佢地決一死戰。
「你知唔知呀,其實同你做咗咁耐朋友,一直都有句嘢想同你講,或者你一早就估到,只喺唔想踢爆我,留番條後路比我…」;「你知不知道,跟你做那麼久的朋友,其實我有一句說話一直想對你說,也許你早就猜到,只是不想拆穿我,給我留一條退路…」同樣嘅說話,用書面語寫出黎,無加任何修辭,幾咁「別扭」呀。廣東話比香港人嘅感覺系夠自然,點解要用唔熟嘅嘢黎抒發自己情感呢?
用廣東話嘅語言夾雜住英文,我哋會覺得理所當然;用書面語夾雜住英文,我地就會覺得不倫不類。我哋成日以為廣東話好cheap,但信你又知唔知,廣東話嘅歷史比普通話更遠呢?如果當年人大常委會投票果陣唔係差一票,我哋呢家就唔洗學普通話啦。不過正正因為其他人覺得廣東話低一級,所以就算夾雜住其他國家嘅方言,都唔會覺得奇怪,甚至會覺得咁嘅組合信理所當然,天作之合。呢個亦正正信一個新元素加入喺情書嘅裡面,可以帶出果種fresh得黎,又帶有少少浪漫色彩嘅感覺。而且我哋重可以用廣東話大玩文字遊戲,等對方估下你想點,例如唔好咁悶寫“I love u”,而系寫“艾粒u”;唔好直接寫“I miss u ”,而喺寫“艾搣u”。除左英文,我地重可以玩埋其他國家嘅方言,例如韓國嘅“莎郎嘿哟”;意大利嘅“提啊麼”等。咁就可以喺情書入面加番少少港式情趣得黎,又感受到你嘅用心。
其實廣東話除左本身有好強嘅包容性,可以混合其他外來語使用之外,佢本身好多字都係由英文演變而黎,例如雪糕、警察果尐。可能你會講,一早就知啦,香港喺雜種文化,語言梗喺雜種架。又唔好睇到廣東話咁水皮,經過演變,其實廣東話已經好有本土特色,甚至同我哋日常生活形影相隨。好似電視劇嘅對白都會成為我地嘅日常用語,比人廣泛咁用。講呢尐,你唔係教緊人寫情書咩?我只喺想講,其實我哋都可以用番呢種獨特性系情書入面,例如加入尐現實嘅題材,好似最近果套《愛我×留言》,有需要都可以運用下架。舉個例子,喺TVB某一套劇集有講:
我張一健願以你范子妤為我合法妻子,無論富貴貧窮,快樂悲傷,健康疾病都願意一生一世愛護你,守護你,終生不諭。你仲猶豫d咩?驚我會後悔?驚我是一時衝動?驚我要一世照顧你?其實結婚既誓詞,如果只係循例咁讀出嚟,係無意義,一定要實行落去。後生個陣,又靚又健康,當然"愛"啦,但係,當對方年紀漸漸大 ,又老又有皺紋,越來越多病痛,甚乎睇住對方老死...唔通咁就唔愛咩?既然將來,唔會離棄對方,宜家都應該一樣。如果因為對方有病就唔愛嘅,就唔係真正嘅愛。無人知道生命既長短,就算我地做醫生既,都唔可以保證自己長命百歲。所以結婚誓詞裡面無話到"白頭到老",係就要保證,無論健康疾病,都要係埋一齊。你明唔明呀?
理性尐,又有另一個例子:
多謝,我發現嘅新函數可以幫助天文學家,去計算太陽的生命周期,只要七十億年,太陽就會膨脹爆炸,然后熄滅死亡,亦即係話只要七十億年,地球就會飛灰湮滅。理性的思維,令得我可以拆解好多科學嘅難題,我由細到大都認為,世間萬物都可以用理性去分析,去計算,但是今日我話比大家聽,我徹底否定自己之前一切的諗法。
只要你經歷過愛同被愛,你就會知道原來世間最珍貴嘅野,只可用心去感受,去領略,唔會有任何計算方式,愛一個人,可以令你徹夜難眠,失去所愛,世界會變得漆黑死寂,因為我以前嘅執著,我失去咗我至愛嘅女朋友,我哋最后果次見面係喺澳洲,當晚我一個人離開,我行到河邊,望住滿天嘅星星,我系度諗,如果老天肯比我同佢喺返埋一齊,如果真系有輪回,如果我哋可以生生世世點樣相愛,我都只可以愛多佢七十億年,不過呢D都是我自己胡思亂想,在座咁多位學者前輩,又有邊個可以話比我知,在我有生之年,有咩可能做一部時光機,等我可以追番之前,重新開始,再愛佢多一次!
啦,係咪好浪漫呢,比我係女都冧啦。
但系…下下都抄人,人講我又講,都冇自己嘅個性ge!加插咁多潮語落去,咁咪顯得我好mk,好粗皮!就算你同我講佢幾勁幾叻又好,總之已經比人有一種咁嘅feeling,講乜都冇用啦;何況,人地第一眼睇嘅係情書,而唔係歷史書,鬼知你咁多咩。但喺我講左咁耐,都信講一樣野,最重要係你自己嘅心,你有心,人哋點都會feel到。何況,冇人叫你喺情書入面講粗口,或者用尐粗俗嘅語言呀嘛,我地可以廣東話得黎,又好斯文嘅!所以不如搵次親切尐,用番本土語言,增加下新鮮感,用咁多別扭架書面語,你都悶啦,試下轉變,可能會有意外驚喜呢。
其實除左書寫上面你寫得順暢尐之外,用廣東話寫情書,喺人哋讀出黎嘅時候,都會有一種韻味,最重要係會有現場感。
廣東話有九個聲調,喺語音嘅上面多左尐變化,而普通話嘅四聲,係源自廣東話嘅,所以用普通話讀古詩嘅時候,會有尐甩咳,例如「尋尋覓覓,冷冷清清,悽悽慘慘戚戚」,用普通話讀嘅時候會好易咁咬親自己條利。詩講求嘅係節奏,音律,而用廣東話作詩,讀詩,就會無形咁帶出果種韻味。另外,廣東話入面,好多同音同義字,咁就唔洗睇落咁悶啦,舉個例子:“講呢尐”、“講呢啲”、“講呢d”,睇落都有唔同啦。再者,呢家好多香港詩人都會選擇用番港式用語黎寫詩,例如《金毛吟》,所以廣東話絕對有佢嘅文學價值,我哋唔需要再用人地架語言先可以寫出一首好情詩,用番廣東話,你都可以作番首好詩送比女仔,最起碼唔會有人捉到你錯文法,意象模糊果尐先啦。
廣東話嘅句子上面會有好多嘅語氣助詞,例如:嘅,呢,啲,嘛……呢啲正正系表達出自己情感嘅渠道,憑住尐語氣助詞,就可以知道你心入面諗緊咩,「好唔好呀」、「好唔好je」…兩句想表達嘅意思雖然相同,但喺從後面粒字黎睇,亦睇得出佢地嘅差別。前者係正常朋友會講嘅,而後者就帶有撒嬌嘅成份。加上,有咗呢尐語氣詞,喺人哋睇你篇文章嘅時候,就會有一個錯覺,覺得你係同緊佢講嘢,平時你啲講嘢習慣,一一浮現喺佢嘅眼前。咁樣做,就唔洗驚比人以為係代筆寫ge,同埋喺呢尐咁細微嘅位,如果你都有留意過,有執過,咁試問你又點會唔成功呢。
唔係話用書面語寫情書唔好,只喺覺得點解要用唔擅長嘅嘢表達情感?有時候,用番自己嘅語言,反而會令人有多尐親切感,咁成功嘅機率都會大尐啦。其實最重要都係自己個心,而喺交出心嘅同時,我地點先能夠推廣埋自己本身嘅語言同文化,呢個係值得我地思考嘅地方。

全文 2903 字 (唔計英文、空格、標點)
備註: 港語學第一屆廣東話徵文比賽作品
作者:莊詠儀