(beta 公測版本)
< 返回

《小豆釘, 攪到你好驚 ?!》

日期:2014年8月14日

到底豆釘由兩歲開始步入幼兒園好, 定係三歲先至踩入幼稚園好呢 ?
相信有好多媽咪喺呀B未出世之前已經諗爆頭.
有啲人就話兩歲呀B奶咀都未戒, 咁早就的佢入學校會唔會早左啲, 有啲就會話成三歲先番學又會唔會蝕左呀 ???!!
其實兩歲幼兒班最主要係令啲 奶咀豆釘開始學習群體生活, 學識同人分享同最主要係學下人生最重要嘅課題 – 自理.
學習群體生活, 學識同人地分享 ---- 大部分幼兒班最主要都係比啲小朋友從遊戲中學習跟朋輩相處,例如要交換下玩具玩, 我用完嘅文具比你用, 你用完嘅野又借比我咁, 從中學習一個交換物件, 互相禮讓嘅概念, 尢其現今家庭大部份都只生一個, 一個豆釘喺萬千寵愛之下成長, 未必識得跟同輩相處同埋跟其他人一齊分享.
人生最重要嘅課題 : 自理 ----大部分幼兒班都有廿幾卅人, 老師得嗰三兩個, 基本上唔會亦都冇可能好似喺屋企咁比照顧者人釘人, 又或者群星拱照住一個細路. 豆釘要學會自己用工具食茶點, 用柸飲水, 食完野就自己抺咀, 落堂前要自己執好書包食具同埋自己去厠所 (當然最初會有老師從旁協助). 自己的事自己做真係好重要架. 現今太多豆釘喺屋企就只會攤開一個”大”字就飯來將口, 衫來將手, 比人抱住唔駛落地走 !!
當然豆釘剛開始番學時一定會有啲抗拒, 例如拒絕著校服, 拒絕刷牙洗面. 比你霸王硬上弓著好校服又點, 將近行到學校門口黎個一哭二鬧三上吊. 大哭典地扭抱較剪腳夾實家長雙腿我通通見過, 衣個時候家長只要狠下個心, 將豆釘掟入學校轉身就走即可, 切忌同佢地喺學校門口拉拉扯扯抱頭痛哭好似送機咁難捨難離. 咁樣只會令豆釘覺得番學係一件好傷心難過嘅一場生離同埋死別嘅事咁.
相信極少幼兒班會要求小豆釘背誦床前明月光加默寫 one two three four five 啩.畢竟兩歲豆釘都只係一個大寶貝. 對佢地黎講,學習點樣”生活” 比學習ABC更為重要啦,所以請大家相信老師, 相信自己嘅小朋友, 比佢地開開心心咁上幼兒班啦!
另外, 尋日又聽到一件趣事:
同事乙一面火咁同我講 : 我屋企有好多”炸梁 “ !!!
我R哂頭, 你呀媽買左好多炸梁比你食晏呀 ??!!
原來佢話喺屋企教仔, 一屋都係”架梁” !
同事乙個仔交比自己呀媽照顧, 外家兄弟姊妹又奇多, 每次教仔屋企就好似開辯論大會咁, 分正反兩方, 一方撐同事乙, 另一方就力撐亞仔. 同事乙一邊話” 唔得唔得” , 另一方就話” 得得得 “ .
同事乙:食飯唔好跑黎跑去啦, 唔落格呀 !
保護團:由佢啦, 肯食就得啦…..
同事乙:唔好食咁多糖同零食呀 !
保護團: 由佢啦 ,食嗰的咁挅冇所謂啦....
同事乙:唔好爬上窗台啦 !
保護團: 哎呀, 男仔梗係比較活潑架啦, 有我地 目及 住冇問題播..…
相信好多在職媽咪都身同感受, 有過以上嘅經驗, 妳一邊教緊仔,身邊就有一個甚至一群”炸梁” 喺你耳邊呀芝呀左. 你自己勞氣之餘, 個細路亦無所適從, 有啲持著有人撐腰更膽生毛, 為所欲為, 儘情發揮馬騮本色. 我愛做我鍾意嘅事, 你又耐得我何?
所以喺孩子管教方面,父母家人, 特別係所有照顧者一定要有共識. 一方管教時另一方必須配合. 咁樣啲 豆釘先至識得分辨是非黑白, 唔會無所適從, 究竟你地邊個先至岩, 我應該聽邊個講先好!!
希望大家屋企唔洗晚晚開壇 !

全文 1104 字 (唔計英文、空格、標點)
備註: 港語學第一屆廣東話徵文比賽作品
作者:梁念慈