(beta 公測版本)
< 返回

《我唔想》

日期:2014年8月14日

行到半路,就突然落雨。其實咁既天氣,我真係唔係好想出街。
啲雨水好似拳頭咁樣一拳又一拳打係石屎地面,又好似巴掌一巴一巴摑係河流水面。沙沙嘅雨水聲,嘩啦嘅流水聲,令人覺得好煩。仲要突然有聲轟隆嘅行雷聲係後面傳尼,真係嚇死人。
過左坐廟,我急步行到去巴士站,岩岩好有架小巴尼到,就上左車。今日起小巴又加左價啦,一加就加五毫。點知開車之後,雨就停左。不過小巴上面傳尼比雨水聲更加黑人憎既噪音。
唔知幾時開始香港好多專線小巴都無曬收音機聲,取而代之係無限重播既電視聲,搞到我真係唔係好想坐小巴。啲節目來來去去都係果啲:一啲都唔新既「now新聞」都算啦,仲有果啲咩樓盤、投資嘅節目同埋廣告,係一個星期內重覆又重覆。但係最黑人憎嘅係果啲所謂既音樂MV。成個月播尼播去都係果啲「流行歌」。節拍無規律,旋律無格式,和弦又唔和,又無複音又無對位,樂器來來去去都係電子琴、結他同埋鼓,唱果條友又唔識得橫膈膜呼吸法。
終於到咗西貢市區,落左車,就發現條街好多人。我先醒起今日原來係星期六。每逢周末都好多人湧入西貢,尤其夏天,好多人入尼游水、坐船、行山、露營、食飯之類,搞到搭車無位坐,食飯無位坐,行路無位行。
我真係唔係好想行過碼頭。人多擠迫,又嘈,真係好難頂,一啲都唔似以前嘅西貢。碼頭果邊周圍都係遊客。有啲坐住舢板嘅漁民,將架舢板泊係岸邊,向岸上嘅遊人兜售新鮮捉番尼嘅海產,有撻沙魚、鮑公魚、紅星梭子蟹,甚至馬蹄蟹。碼頭泊左一隻又一隻來往離島嘅大眼雞,載滿遊客;有啲係去游水,有啲係去行山,有啲係去釣魚。因為星期六人太多,留係碼頭釣魚嘅人反而比平日少。
碼頭附近係一間又一間海鮮酒家。即使只不過係中午,依然有好多人去飲茶食飯。海水味同魚鯹味可能嚇走唔少唔識食魚嘅鬼佬,不過就吸引左好多香港人,同埋強國人。佢地果種吵鬧聲,仲恐怖過小巴上面電視螢幕播嘅MV。係英國,如果係係海邊、廣場、公園依啲地方,通常都會有人唱下歌,彈下結他,用音樂去為風景潤色。但係係香港,即使係西貢,街頭賣藝一樣會比人拉。無音樂潤色之餘,依家西貢依一年多左好多強國遊客,吵吵鬧鬧嘅聲音,推推撞撞嘅身影,令西貢嘅海浪聲、山歌聲、雀仔聲、狗叫聲,完部都甩色。
我真係唔係好想見到今日嘅西貢。轉入內街,人少左,但係鋪頭都少左。前面先見到一間咖啡屋落左鐘閘,貼左一張大紙,寫住「租/售」。再過幾間雜貨鋪,就見到間文具鋪貼出大字,寫住「租約期滿,結業清貨」。去到前面嘅街口,一間法國餐廳都執埋笠。鐵閘上面一句法文都無,就只有好多中文嘅海報,大大隻字寫住「租/售」,將成個鐵閘淹沒。
穿過荒廢左嘅學校,橫過馬路,去到一個廣場,人雖然都唔少,但起碼無碼頭咁擠逼。廣場嘅中間係一座亭,側面有個細嘅遊樂場,有滑梯之類。有啲鬼妹鬼仔係果度玩,亦都有係附近放狗。亭裡面有啲阿伯係度捉緊棋,又有啲阿婆係度講是非。再遠啲就有個好細嘅籃球場,十幾個後生仔係度打緊籃球。亭後面同右面有幾間咖啡廳同埋西式餐廳,全部都有露天座位果啲餐廳間間都係起碼八十幾蚊一個餸,但係唔知點解啲鬼佬好似好有錢咁,成日都一家大細咁去幫襯。我依啲偽文青就當然無錢入去坐,只能夠去隔離間咖啡室裡面飲咖啡。
攞住杯拉鐵咖啡,飲左啖,明明都落左糖,但係依然覺得好苦。我望出落地玻璃窗外出面依片西貢市區僅有嘅寧靜。我真係唔想見到有一日成個西貢徹底改變。打開部電腦,想打譜作曲,但係諗左好耐都寫唔出野。我只係望住出面嘅風景,腦袋一片空白。
過多十幾年之後,果啲阿伯仲會唔會係度捉棋?啲阿婆仲會唔會係度講人是非?啲鬼佬鬼婆仲會唔會係度食野?啲細路會哈會再係度玩?仲有無人係度放狗?有幾多間餐廳同鋪頭會留得低?我唔知,我亦都唔想去諗。西貢公路好快就會開始擴闊工程,會有愈尼愈多大陸人入尼幫襯。到時啲文具鋪、雜貨鋪、咖啡廳,甚至西式餐廳裡面,唔知有幾多間要變做金鋪、名店或者藥房呢?
又突然落驟雨啦。一落雨,外面嘅人就四散。天氣變得好快,西貢都一樣。點解一切會變左咁多?我都只不過係去左英國一年姐,返到尼西貢,已經面目全非。地產霸權將一間又一間舊鋪同埋小店推倒;周圍都係粗聲粗氣嘅大陸自由行旅客。英文法文同德文愈尼愈細聲,客家話消失,普通話就愈尼愈大聲。。人情味慢慢甩色,取而代之嘅,係灰色嘅天空。我真係唔想再出街睇到依一切嘅改變,但係,無論我想定唔想,一切都唔由我控制,一切都唔由我出聲,一切都唔由我決定,因為我唔係大地主,我唔係發展商,我唔係政府,我只係一個人。

全文 1603 字 (唔計英文、空格、標點)
備註: 港語學第一屆廣東話徵文比賽作品
作者:安德烈