(beta 公測版本)
< 返回

《寵物》

日期:2014年8月11日

我屋企以前都有養過寵物,不過絕大部份都係佢地自己嚟嘅,係我記憶當中,應該淨係得一隻相思雀係買返嚟啫。
唔知點解,我以前住嗰度真係有好多呢類嘅自來寵物──隻貓係自己走入嚟嘅,啲雀仔又係自己飛入嚟嘅,連兩隻受傷嘅烏龜,都係比人遺棄係我屋企門口嘅。
最先養嘅係一隻貓,不過因為係發生喺我出世之前,所以唔講嘞;而其餘嘅自來寵物就包括有三隻相思雀、一隻畫眉,再加兩隻烏龜。
先講果三隻相思先,其實最初只有一隻雀仔飛左入嚟我屋企度,跟住唔使一個禮拜,又有另一隻同類型嘅雀仔飛入黎,開頭我地成家都唔知呢兩隻雀仔係乜野品種,後尾先知道係相思雀,聽人講話相思雀好好唱口㗎喎,點知養咗成幾個禮拜,呢兩隻雀仔唔知係心情唔好定係未適應環境,總之就唔多出聲,更加唔好講話會「鬥唱」啦,後來聽人講,話原來相思雀唔可以養一對,一定要單數,重要有男又有女咁,佢地為左吸引異性,先至會大展歌喉。為咗要聽佢地唱歌,唯有買多一隻返嚟啦。
不過問題又嚟嘞,究竟呢兩隻相思雀係男定係女呢?我地應該再買多一隻男嘅番嚟吖?定係買隻女嘅返嚟呢?無計,唯有連籠帶雀咁拎去買雀粟嘅舖頭度問,最終買咗一隻男嘅番嚟,嗰個老細重教我地,話如果想隻相思唱口好啲,就要買啲草蜢餵佢先得,如果再加啲麥皮蟲就重好啲㖭。你都咪話,呢三隻相思雀自始之後真係好唱口咗好多,重活潑咗好多㖭,成日都可以見到佢地你追我逐咁,玩得都唔知幾開心。
不過可惜吖,養左幾年之後,佢地都陸續咁離開咗啦!
但係又好奇怪喎,無幾耐,又有另一隻雀仔飛咗入嚟我屋企,雖然呢隻唔係相思雀,不過都同樣係好好唱口嘅,佢就係畫眉嘞。
對比起相思嚟講,我就覺得畫眉比較有攻擊性嘞,我每次要伸手入籠幫佢換水換雀粟嘅時候,都好驚會比佢啄我──唔係講笑㗎,如果你有睇過佢對付啲草蜢嗰個兇殘嘅樣嘅時候,你都會同我一樣咁驚左佢。
可能我實在太驚啦,所以後來我哥哥都好少再買草蜢餵佢啦,淨係比佢食雀粟,久唔久先餵麥皮蟲同蘋果比佢食,呢招又真係好似好得喎,呢隻畫眉嘅攻擊性又真係好似無以前咁勁。
其實係養呢幾隻雀仔嘅同時,我屋企重有養另外一種動物,就係烏龜嘞。
最先係有一隻條尾比人淥到甩晒皮嘅烏龜匿埋咗係度鐵閘旁邊,我媽咪見到佢咁可憐,咪執佢番嚟養囉,點知呢隻野,越養越肥,後來重肥到啲手手腳腳都縮唔晒入個殼度,人地話「老鼠拉龜,無掟埋手」,哈,我屋企呢隻?縮到對手就縮唔到對腳,縮得個頭嚟就突咗條尾出嚟。都唔知點解佢會咁肥嘅,我哋都無比到啲咩佢食呀?都淨係水同白飯啫,咁都養得佢咁肥咁大隻。
不過咪睇佢肥到咁,其實佢嘅動作都不知幾咁敏捷,每次一到食飯時間,佢一見到我哋放底嚿飯落個兜度,佢就會嘭嘭聲咁衝過嚟--真係衝過嚟㗎,然之後就會好開心咁三扒兩撥將嚿飯食晒落肚,有時如果佢覺得唔夠飽,佢重會抬高個頭眼甘甘咁望住你,要你比多嚿飯佢食㖭。
所以話呢,呢隻大牛龜唔單止肥屍大隻,重係一隻好聰明、好惡死嘅大牛龜!
點解會話佢聰明呢?除咗佢識得望住你要你比多啲飯佢之外,佢重識得自己幫自己製造一個冬暖夏涼嘅舒適環境。
以前我哋屋企好窮㗎,夏天淨係可以開住把風扇吹住啲熱風,冬天就自己着多兩件衫保暖啦,邊度有錢可以買冷氣機、暖風機呢啲野呀!
但係呢隻大牛龜就唔同啦,佢係夏天嘅時候,就識得匿埋係雪櫃底涼冷氣,到咗食飯嘅時候,佢先至會由雪櫃底走出嚟食野,食完野佢又會匿番入個雪櫃底度嘆冷氣;到咗冬天,佢就會自動自覺咁走去「地主公」度──因為嗰度有盞燈照住會暖啲呀嘛,嘩,真係要幾舒服有幾舒服呀,羨慕得我吖!有時捉佢入浴室幫佢沖涼,佢重會張個頭伸向花灑嘅位置,然後眯起對眼嚟享受花灑淋浴,嘆得佢吖。
講完佢聰明嘅一面,依家就講埋佢惡死嘅一面嘞!
原先我地都唔知佢係咁惡死㗎,後來因為我哥哥執咗另外一隻受咗傷嘅金錢龜番嚟養,呢隻大牛龜先至將佢惡死嘅一面暴露出嚟。
自從我地養埋另一隻金錢龜之後,開頭以為大牛龜可以有個伴唔使咁悶啦,點解呢隻大牛龜就成日都恰隻金錢龜,例如次次食野嘅時候,呢隻大牛龜都會整走隻金錢龜,要等佢可以自己一個食完食罷之後,先至准隻金錢龜去食野佢食剩果啲野,又例如佢見到我地同隻金錢龜玩,佢又會衝過嚟迫走隻金錢龜,總之就好似一個小朋友咁,乜野都要自己霸住晒,唔肯同第二隻龜一齊分享。
好幾年之後呢個情況先叫做有少少改善,原因並唔係呢隻大牛龜善良咗,而係佢已經太老啦,老到眼又矇耳又聾,手腳又慢,所以先迫唔走隻金錢龜咋。
寵物始終都無人咁長命,尤其是我屋企啲寵物都係自來寵物,佢地嚟到我屋企嗰時已經唔知幾大年紀嘞,通常養得幾年,佢哋都已經係走到生命嘅終點,即使係果兩隻烏龜,都之不過前後養咗十幾年。
當我屋企搬咗嚟依家呢度之後,就再無呢啲自來寵物啦。

全文 1726 字 (唔計英文、空格、標點)
備註: 港語學第一屆廣東話徵文比賽
作者:艾莉絲