(beta 公測版本)
< 返回

《在水一方》

日期:2014年8月8日

今晚通頂拍攝,我哋拍攝組留喺一個古蹟文物入面,依座文物位處郊野,係一座過百年歷史嘅抽水站,出面係海,對面係山,山上有條路,好似一條帶咁,而屋後面有座山,山上有一幢豪宅。
我同一名小姐坐喺工具箱上,佢係我「好朋友」,知道我今日嚟喱度開工後,佢死都要跟住嚟,話要幫手之類,我只好俾佢跟嚟。
講真,佢幫唔到咩手,佢成日望住幢豪宅好耐,我問佢咩事,佢冇回答,走開咗。
佢走到海邊,拎住枝煙,我偷拍咗佢,一個吸煙嘅女人,令我有啲聯想……
十年前,有個十四歲左右嘅女仔,佢喺夜晚發咗個夢,夢裏面,佢見到一名廿幾歲嘅女人,依個女人係個大美女,身材豐滿,魅力沒法擋,依個女人同個女仔玩,佢哋跑嚟跑去,非常之開心……
開心嘅時間過得特別快,個女仔醒咗,佢發現頭先嗰啲影像原來係夢,佢好失望,好希望頭先嘅畫面係真,嗰日日頭,佢特別空虛,百無了賴,不知所措。
嗰個女人佢認識,但個女人唔識得佢,佢好想發奮圖強,希望透過自己嘅努力,去換取嗰個女人嘅注意。佢想學樂器,但一直冇機會,而家,佢就算要日日捱麵包,都希望有足夠嘅錢,能夠學琴,終於,佢付諸實行,到琴行學琴。
學琴嘅日子一啲都唔好過,相比其他人細細個就學音樂,佢已經算比較大嗰個,手指自然唔夠人哋靈活,學得自然比較慢,仲要同班小朋友一齊迫入琴行,令到佢好尷尬,不過,年紀大始終有啲著數,對住啲音符樂理之類嘅嘢,中學生嘅理解能力肯定比小學生高,而且唔似得班小朋友咁,被屋企人迫住學,佢係甘心情願嘅,至少呃唔到老師。
除咗學琴外,讀好啲書都可以話係最實際嘅事,當時仲係暑假,佢已經將下年嘅課本讀過至少一次,佢嘅努力,的確令成績有明顯進步。
佢嘅努力得到唔少人嘅讚賞,有一日,佢知道嗰個女人搬咗去嗰幢豪宅,佢就日日過嚟,由於豪宅門口唔俾閒雜人等聚雜,所以佢選擇喺抽水站到,由下面望上去,希望望到嗰個女人嘅蹤影。
今日,佢唔再堅持當日嘅夢想,冇再學琴,學業成績冇嗰時咁好,不過,佢依然好迷戀嗰個女人,我唔知佢見過嗰個女人有幾多次,亦唔知道剛才嘅嘢有幾多成係真,我只係知道,喺我面前嗰位小姐,佢經歷好多嘢,佢個背影,充滿憂傷。
終於拍完,佢主動過來幫我收拾啲嘢,到咗要走嗰時,佢堅持要留喺到,我只好喱埋一角睇住佢,佢一直望住嗰幢豪宅,過咗一陣,佢走,我都跟住佢,不過,好快就唔見咗佢嘅蹤影。
之後,我再冇見過佢一面,我諗,佢會唔會跟住嗰個女人,去咗一個連佢都唔知嘅地方呢?不過幾日後,我睇報紙,知道嗰日拍戲嘅抽水站失靈,運作唔到,有人話係個抽水站太舊,亦有人話係有兩個女人喺嗰到死咗,之後發生鬧鬼事件,連警方想調查到調查唔到。至於死者係唔係我「好朋友」,我唔敢講,但我敢肯定嘅係,我飲嘅水多咗緊血味,好唔舒服,成個城市嘅人都有類似感覺。

全文 978 字 (唔計英文、空格、標點)
備註: 港語學第一屆徵文比賽作品
作者:袁廸旗