(beta 公測版本)
< 返回

《好來好去》

日期:2014年8月6日

拍拖,人生一大環節,對某啲人嚟講,同時等於一大樂趣。呢個世界真係好大,但係得男女兩款;或者有幾種性向,但係人人都需要,至少,想要,拍拖。話知你拖手、握手定舉手,總之就係要癡住既一對手。
簡單啲講,拍拖,好鬼重要。呢個過程裡面,雙方一齊經歷更多,相知,相愛而相守。互相磨合,接受對方,然後融為一體。戀情長久而又恩愛既情侶,通常會俾人話有夫妻相添,夠曬甜蜜。為左成就童話裡面王子公主令人羨慕既故事,幾多人前仆後繼搶閘脫離單身,努力咁追求幸福。
可惜而家係速食既年代,冇人有時間慢慢去感受,去經驗,去愛。仆黎仆去,就想要啲捷徑或者秘訣。都係既。青春就係最大既本錢,點會有人承擔得起揀錯人、嘥時間面阻阻既風險呢?於是大把戀愛節目、無數既戀愛專家好似雨後春筍咁標出嚟,三唔識七既人都以指教你為己任,對你指指點點:教。你。愛。
號外!號外!想知點樣有型有款,吸引紅顏知己?上網問人啦。想知點樣講我愛你好聽啲,提升表白成功率?買本書啦。久而久之,可能個個都覺得捧住本戀愛聖經就坐定笠六無走雞,可以大安旨意。喂,夠鐘洗面醒下喇。世上邊有咁多美滿結局或者初戀一條龍?大把人拍拖拍拖,拍完又拍,偏偏遲遲未泊岸。如果係咁,除左大家不斷練習、掛喺口邊,神聖既三字咒語:我愛你;應該仲有最邪惡、最殘忍既四字魔音---壓軸登場既:我唔愛你。
短短四粒字,就好似匿埋喺角落既惡鬼,隨時出現吞噬愛戀裡面棉花糖一樣既美夢。又算係除左人身攻擊之外,最威既語言武器,一把心頭既利劍。記得自相矛盾既典故,有個楚國人喺街市賣矛同盾。首先佢讚個盾話:「我呢塊盾非常堅固,咩鋒利既野都整唔爛佢。」過左一陣,又讚佢既矛話:「我呢支矛係最鋒利既,冇野係佢整唔爛既。」有人即刻就問:「咁用你支矛吉你塊盾既話,結果會係點呢?」如果代入翻愛情嚟睇,大概我愛你就係當中所指最好最堅固既盾,而我唔愛你就係最好最鋒利既矛。兩個火星撞地球,但命中註定,矛會毫無保留咁,吉穿塊盾。因為再多句曾經既我愛你,都及唔上一擊既重創。
‘我唔愛你。唔再愛喇。’
聽到既人,自然五雷轟頂,欲哭無淚。咁講既人呢?係唔係就輕鬆到爆,拍下手走人?大把書講追人技巧、營造拍拖情調、分分鐘結婚生仔都教埋你;不如搵人教路點講好果四個字。啊哈,無人提,無人問,無人想知啊,係咪因為無人關心自己拋棄既對方呢;好似掉垃圾果陣,再好心機既家庭主婦,都唔會打好膠袋蝴蝶結或者整好個形狀先安心送出去---話明係掉、係放手,緊係避瘟疫咁款,想快快手搞掂,一係就唔上心敷衍了事。
等陣!講句老土既:停一停,諗一諗先。要知道覆水難收,而且講我唔愛你唔係貪得意念口黃,代表住完結,由拍拖拖手,變成放棄放手。更加有意思既就係,我唔愛你雖然係我愛你既對立面,但係都有佢既意義同價值。甚至係背負既責任。
世俗啲講,我唔愛你,就失去左一個全天候樹窿、隨身提款機、人肉抱枕。仲有大把著數都一齊冇曬,好唔抵架。不過記住,由你講出口果下,你地就兩清,無拖無欠。唔好再當人奉旨對你好,要求多多。最好有事唔好麻煩人地,因為人地正努力適應失去你既生活,係你放手先。至於‘我唔愛你,不過你仲有用’呢種諗法請腐爛喺你個腦度,唔愛既就光明正大去行自己早就揀左既路,放過對方,果個失勢既弱女(男)子。
最好,再見亦唔係朋友。對方依然對你有感覺,而你瀟灑講完唔愛就返去同人做朋友,呃邊個啊?得閒約出嚟玩煮飯仔?俾少少誠意啦,當人地係咩呢。後備對象?即棄水泡?啊抑或而家流行既收兵呢。始終一齊過,咁就封做將軍啦,好冇?哈謝主隆恩。抑或預備定他日我若未娶,你若未嫁,愛火重燃既情節啊?唔好再自導自演扮大情聖喇。就算你係天之驕子、輝煌神女,都冇資格亂咁收割人地赤誠既心。
‘我每一下心跳,都係為左你。無限純粹。’呢個承諾你唔稀罕既話,請讓座,相信大把人會捧喺手度珍惜。
唔愛喇。再見啦。......咁就再也不見。
可能有人會話:我唔愛喇,但係我都要時間習慣,所以有時過火左,唔係想玩人兼唔俾佢死心。又有人會話,始終一齊過,無謂太絕情,佢纏住都盡量俾少少溫柔佢啦。
咁諗好易明,不過,唔好諗多左。就算喺段關係裡面,對方幾卑微,當你放手既時候,呢種不平等條約已經解除左。佢係一個獨立既個體,唔需要你過問,更加唔需要你施捨。為左大家好,如果放手,請徹底。
要溫柔既話,請你喺講唔愛講分手既時候,多番幾分尊重,已經足夠。因為人就係鐘意作踐自己,當你放手,對方越會死扯唔放。留幾分尊嚴俾佢,等佢知道佢係一個有價值既人,等佢可以多少少力量企番起身。記得佢以前有幾好嗎。你唔愛佢係事實,但係你會想佢好,想祝福佢。唔係惺惺作態,但係你有惻隱之心,你都會想見番佢意氣風發個樣。因為當初你就係愛上佢咁耀眼,係平凡中既不平凡。
咁樣對自己都好。俾自己少少時間去思考,唔係再靠天書,亦唔好急住投入下一段精彩演出。反而感受下唔愛既雲淡風輕,體會由愛變成唔愛既絕望同埋過後既灑脫。今次唔係大團圓結局,但係下次一定會更好。因為你盡力之餘,亦無愧任何人。
搞咁多野,只係為左,有始有終。唔難吖。一段自己都有經營過既關係,試問你點捨得虎頭蛇尾呢?假如一首好甜蜜既歌,註定要變成兩套悲傷既戲,都要係套自己以後願意睇番既好戲。講我愛你就好似演奏明確輕快既大調,咁就等自己做一個全面既音樂家啦,就算親口講出我唔愛你,好似彈緊陰沉哀怨既小調,都要好來好去---禮貌而疏遠。
邊個話世界無童話,只係人有時麻木到,只係識得踐踏。或者你愛佢,或者你唔愛;無論如何,都應該有一個結果。
如果愛,請深愛。
如果唔愛,請走開。
有始有終,先可以迎接下一首美妙既樂章啊!

全文 1969 字 (唔計英文、空格、標點)
備註: 港語學第一屆廣東話徵文比賽作品
作者:逆向雨