(beta 公測版本)
< 返回

《不做第一,也不做最後——強國見聞錄》

日期:2014年8月5日

由細到大,你總會聽到長輩有好多句俗語,其中一句就係「執輸行頭,慘過敗家」,不過呢句嘢唔一定啱曬,特別喺強國。嗱,我無叫你要包尾啊!因為包尾一樣唔好,甚至更慘!
當你要去一個比較遠嘅地方行街,正常你都唔會行幾個鐘馬路,或者都甚少俾幾百蚊搭的士㗎?咁正常嘅選擇都係地鐵或者巴士啦!地鐵唔係度度都可以去到,而且班次通常比巴士密,所以都無乜特別好講。
都係講巴士,正常你早上或者遲上車,都唔會有好大影響。不過部巴士逼少少,得返幾個位坐同企。因為你求坐心切,坐左落去嗰個裝喺車輪上面,而完全無腳位嘅位上面……發覺一切已經太遲啦!因為當你坐,啊唔係,半踎半坐,你想落返去企嘅時候,其他人已經堆到你無得落返地啦!不過你遲上車嘅結果都唔會好得好多,甚至更慘。當你做尾二嗰個上車,雖然你無得扶扶手(呢個時候,你已經唔需要扶手啦!),不過你仲可以享受下司機專用嘅180°大銀幕。不過當你最後一個上車,你就真係好慘。因為你真係有機會俾司機問候。嗱,話口未完,就聽到有司機問候企車門嘅乘客啦:「你這個兔崽子,給我站到後面去」。哇,聽完之後,我真係倒抽一口涼氣。雖然無叫你要同個客鞠躬(你都唔好咁做,縱壞晒啲客),不過「今時今日咁既服務態度係未夠㗎」,居然公然問候乘客?喺啲正常地方,肯定俾人踩到上天花板啦!算,費事同你嘈,反正我都就落車啦!
落車之後,咁好彩要去嘅地點就係對面,又咁好彩,對面嘅紅綠燈又長期都紅燈,你都無機會行過去。即係話要「中國式過馬路」先過到去!做第一個過馬路嘅,你需要好大勇氣,因為你一行,其他人就會跟你,你行得慢少少嘅,就會俾司機響安催你行快啲!不過若然你最後一個過馬路,難保你俾啲「我爸是李剛」嫌你阻定,車死你喎,反正你最後一個過,又無證人,唔車死你,容乜易俾你告啊?況且佢老竇官夠大,你咬佢食啊?
排除萬難,終於都過到馬路啦!行街行到咁上下,肚餓要醫肚。見到一間酒樓,若然間酒樓拍晒烏蠅,你入到去,揾你老襯都係常識啦!點知間酒樓又鬼咁多人,逼爆全場喎!咁襯等緊位嘅時間入面,就去揾下有無其他有嘢食嘅地方啦!有啊!有一間有大把位,仲要肯定唔會揾你老襯嘅餐廳——M記。「咁好,你仲唔入去?」當然,我地腸胃功能咁好,當然唔需要食埋啲過期肉,以毒攻毒,幫助排毒啦!最後,我地決定繼續等……
落返來之後,我終於知道點解大陸人咁鍾意落香港掃貨啦!不過連我地自己都未顧掂自己,點再俾貨你地呢?你地放過我地香港人啦!

全文 864 字 (唔計英文、空格、標點)
備註: 港語學第一屆廣東話徵文比賽
作者:黃日朗