(beta 公測版本)
< 返回

《廣東話趣》

日期:2014年7月28日

我哋生活喺粵語世界,耳聽、口講、眼睇、手寫都用到廣東話。傾計、罵人、拍拖甚至審犯,如果用得到適當嘅粵語詞彙,必定可以表達到有趣得嚟又清楚易明。既然我哋成日開口埋口講嘅都係廣東話,大家一定唔會對自己母語嘅歷史姻緣陌生。但係根據我最近嘅小型調查,好多好多兩廣人都唔知粵語點莅咖……

約略講吓粵語(Jyùtjyú)歷史。由先秦時期,粵語嘅胚胎已經成型,叫做「上古粵語」,係嶺南糹言糹(mān)人嘅口頭語言。秦始皇廿九年攻打南方百越、開通秦鑿河(依家叫靈渠),令粵語文化開始擴散開去北方一帶。秦始皇死咗之後,佢個囝秦二世掌政。二世二年,秦國縣令趙陀擁兵自立,建南越國,兩國君主著力推行中原嶺南兩地交流,當時嘅粵語同中原話相差唔大。之後嗰六百年,粵語都冇乜改變。直到南北朝、元朝,外族入侵並且統治中原,大量中原人逃難落莅南方,令粵語同中原話再次融合,變到幾乎一樣噤滯。不過到左明清兩朝,中原古話自己退化,甩左大量韻味,得番-n同-ng兩個;冇哂入聲字詞,抑揚頓挫盡失。至於粵語,因為外國佬大多數喺廣州經商,所以就被人叫做廣東話多,講下講下,依家得番好少數人叫我哋母語做「粵語」。

正正係因為頌保留住噤多入聲詞同韻味,廣東話變成繼韓文好似喊交之後,另一個有獨特風味嘅東亞語言。之但係廣東話有趣嘅,並唔完全喺特有嘅咬字發聲動作,生鬼嘅字詞都令有好耐歷史嘅粵語詞語風韻猶存、同造就咗部分現代粵語詞彙嘅精彩之處。

真係唔話得,我哋嘅俗語、歇後語、文獻數量遠遠超過其他東亞語言。尤其廣東話嘅歇後語,聽唔明嘅就覺得係謎語,聽得明就識得笑。經常使用呢啲歇後語,可以加強語氣、增加趣味,甚至要罵人嘅,一用咗歇後語,語意深刻,入木三分,同時緊張氣氛蕩然無存,呢啲都係其他語言做唔到嘅。就單睇呢幾個例子,就可以知道粵語歇後語究竟有幾盞鬼:灶君跌落鑊——有精神;神仙放屁——不同凡響;甩頭筆——唔捨得;天堂尿壺——全神貫注;山藥——噏得就噏;枕頭木蝨——包咬頸。有啲甚至會令你又好笑,又好嬲,等你破涕而笑。

廣東話頌有一個特色——詞簡意賅。相比起其他使用方塊字嘅語言,廣東話嘅詞彙明顯比較精簡。同樣一個頭,人哋叫腦袋瓜;同樣一個𨋢槽,人哋叫升降機機房。 一句「唔該出走廊同我撳𨋢落樓,快!」,去到普通話就變左做「麻煩你出去小胡同,幫我按升降機,我要下樓,快點!」十二個字變成二十個字,你都咪話唔煩呀。

粵語嘅形容詞認真豐富。單講顏色,我哋就有紅噹噹、黃芩芩(kām)、青鴉鴉(bï)、烏卒卒、黑咪鼆(mï mäng)、綠油油、金劃劃、白雪雪(syüt)白森森(sāi)等等。呢啲形容詞不但可以將各種各樣顏色講得生靈活現,而且大大增加講廣東話嘅趣味。當一聽到呢啲粵語形容疊詞,我哋即刻就會聯想到有嗰種顏色嘅事物。比如話一聽到白森森(sāi)嘅樹林,就會啉到北歐國家冬天又白又滑嘅樹林;人哋話金劃劃,我哋就好似聽到用手指刮舊金屬「劃劃」嘅聲。講人嘅都有:高棟棟、矮啲得、肥飩飩(tān)、瘦猛猛、生歐歐、死咕咕、香噴噴、臭肨肨(päng)……數之不盡。

哈,可能講到呢度你已經笑緊,因為呢堆詞語,正正就係黃俊英同楊達《廣東話趣》呢段粵語相聲嘅對白。相聲係一種民間說唱曲藝,北京、天津同南京分別喺相聲三大發源地,原本由北京話同中華民國國語(南京音)演繹。但係當相聲傳入嶺南地區,竟然青出於藍而勝於藍。用廣東話嚟演繹相聲小品,趣味性大增,而且備受兩廣人嘅愛戴。

黃俊英係相聲方言化嘅拓荒者之一,因為細個參加過第一屆全國曲藝匯演,俾相聲藝術深深吸引,所以就立志將北方嘅相聲「南粵化」。廿五年之後,黃俊英同楊達、林運洪、崔靈霄等朋友,就帶頭成立咗「廣州相聲藝術團」,有好深厚曲藝功底嘅黃俊英就做藝術團團長。由於普通話同廣東話嘅音調、發音都唔同,黃俊英同其他曲藝演員一起,修改劇本、湊齊韻腳,務求可以將廣東話生動有趣嘅一面,展露俾所有觀眾睇。就噉樣,笑聲就傳遍咗廣東城鄉千家萬戶。

廣東話嘅有趣之處,莫過於繞口令。「黐線雌性蜘蛛枝蜘蛛絲痴住枝樹枝」(cïsîn cïsîng zïzyü zï zïzyüsï cï zyù zï syùzï);「郵差叔叔送信純熟迅速送出」(yāucäi süksük sôngsûn sūnsòuk sûncük sôngcüt);「宜家學緊如家嘅姨媽而家去宜家傢俬買而家啱用嘅宜家傢俬」(yïgä hòkgãn jyūgä gê yīmä yïgä hûi yïgä gäsï mâi yïgä ngämjùng gê yïgä gäsï)。唔講到你脷打結已經好啦。所以話呢,「廣東話的確夠妙,盞鬼兼得意,聽吓粵曲猛噤𡁻,你我哈哈笑……」

廣東文化博大精深,粵文、粵語、粵曲、粵詩粵詞個個都噤有趣。廣東文化博大精深,正所謂「入得廚房,出得天堂」,粵語稱得上一種文化豐富嘅語言,講得、寫得、睇得、聽得。要保護自己語言文化,講多啲、寫多啲就已經可以推廣同保留我哋獨有嘅文化,仲易過冇牙佬食豆腐啦!

全文 1564 字 (唔計英文、空格、標點)
備註: 港語學第一屆徵文比賽作品
作者:黃卓僖