(beta 公測版本)
< 返回

《問號‧歎號‧省略號》

日期:2014年7月20日

問號、歎號同省略號,或者就係香港人嘅寫照。
回歸前,香港人嘅內心,充滿一連串嘅問號︰「一國兩制得唔得㗎?五十年不變係咪真㗎?河水會唔會侵犯井水㗎?《基本法》可唔可靠㗎?」
回歸之後,香港人以一連串嘅感歎號嚟消解內心嘅不快。
「你做嘅民意調查成日話特首民望下滑,再咁落去,我會『陰乾』你。」
唉!學術自由冇咗!
「你地too simple, sometimes naïve!」
嘩!江主席發火!
「為《基本法》廿三條立法係好㗎,信我喇!葉局長唔會呃你地嘅。」
哈!葉局長要落台!
財政司司長偷步買車。
豈有此理!
七一上街抗議。
五十萬人!好!
曾特首接受富豪款待,坐私人飛機,住總統套房。
唉!千年道行一朝喪!
「做男人嘅,應該要有膊頭,做公職嘅,就應該要有腰骨。」
僭建事件一爆出,原來一切都係太太嘅主意,好諷刺!
「宜家再冇唐營,再冇梁營,只有香港營。」
講得好!但唔代表做得到!

十五年嚟,香港人穿插喺問號同歎號之間。因為不平則鳴,我們化解咗一次又一次嘅危機。的確,香港呢塊彈丸之地,並唔係乜嘢都有,但至少仲有一啲自由,特別係言論自由。呢個係最難能可貴嘅。唔理你係乜嘢黨派,唔理你嘅立場係左係右,但係香港總算容得下。
所謂「海納百川,有容乃大」,國家要進步,胸襟廣闊最為重要;一國兩制呢個偉大嘅構思,正正就係包容嘅象徵。一國可貴,兩制就更可貴。作為香港人,我地必須堅持言論自由嘅價值,仲要終身捍衛佢!
喺捍衛嘅同時,我地不妨以省略號作為工具。有啲道理好難一時三刻就能夠講清楚,有啲難題亦唔係一時三刻就可以解決。省略號嘅可貴,在於言有盡,意無窮,不論係官係民,不論係邊個黨派,發聲嘅時候,固然要據理力爭,但亦都要留有餘地,咁樣先至有進步嘅空間,呢個先至係省略號嘅精神!
但願大家都能夠「省略」嗰啲非理性嘅爭論,全心全力去化解各種社會上嘅「問號」,咁樣大家先至能夠「歎歎」世界!

全文 627 字 (唔計英文、空格、標點)
備註: 港語學第一屆廣東話徵文比賽參賽作品
作者:廖銘輝