(beta 公測版本)
< 返回

《談生日》

日期:2014年7月18日

生日快樂! 我啱啱過咗我嘅廿五歲生日。

每個人出生之後,每年都會有生日呢一日,(二月廿九號出世嘅另計),因為生日就係出生嘅紀念日,紀念住自己又大咗一歲。有人會覺得生日都係普通嘅一日,大一歲亦即係又老咗,無咩好慶祝;亦有人覺得呢一日好特別,能夠無驚無險又大一歲啦,所以好值得紀念,應該同自己嘅家人、朋友、自己最愛嘅人過呢一日。無論你認為要唔要慶祝都好,呢一日每年都會有,或者可以諗下點樣 「處理」呢一日,其實都好有趣。

用到「處理」呢兩個字,就證明過生日都可以好唔簡單。首先,打開新一年嘅日曆,都會搵下自己出生嗰一日,想睇下究竟係唔係紅日,呢個舉動通常係想知道生日嗰日自己會唔會要學/返工,最好唔駛啦。記得我曾經睇過一篇新聞講話而家嘅八十後九十後會自製生日假期,自行放假罷工一日。有人話佢地無心工作,點可能做到社會嘅棟樑同主人翁,只要諗下呢班人都會覺得驚,點解要講到生日大晒呢?我覺得又唔駛講到咁嚴重嘅,佢地嘅行為,只不過係一早想搵日放假,最好有個靚啲嘅名目唔返工囉,明唔明?

第二,邊個會記得我生日呢?拿…拿…拿…阿爸阿媽一定記得嘅,因為佢地生你架嘛! 所以佢地一定排咗頭位,問題就係其他同事/朋友邊個會記得呢?仲有就係佢地記得又有咩重要性呢?如果一個人覺得生日係同其他日子唔同嘅,就肯定會想人地記得呢日,希望人地對自己好啲呀嘛,唔難理解嘅,最好就請食飯、送禮物咁囉,噢,仲有記得幫我同生日蛋糕影返幅相呀,我要貼上面書比人睇下我有幾幸福。咁樣嘅話,點樣可以令人地記得我嘅生日呢?方法唔係無嘅,睇住嚟啦。最直接嘅方法係同人講,但係香港人又未必會揀呢款,因為好似好貪心咁,比人知道咗自己嗰日,就可能要人破費。如果唔想咁直接,不如用下社交網站幫幫手啦,最好就係喺生日嗰欄,填番自己嘅生日囉,唔想比人知幾多歲嘅咪唔列個年份出嚟,但係至少嗰月同日都出到喎,都夠正啦。到時到候,面書就會提下人,喂,某某生日啦!至於同事方面,如果公司有人會負責幫同事搞慶祝生日嘅,恭喜你啦,唔駛開聲都有人同你慶祝,知道有呢一日就唔好請假,呵呵。我曾經聽過朋友講,有同事借意要另一個同事幫手影身份證,就係想人地知道自己生日。雖然聽落都覺得怪怪地,但係佢都無非想人知姐,所以要出呢一招囉。事實上,人愈大,你會發現會為你送上生日祝福,同你親口講句生日快樂嘅人都唔係咁多,通常都係電話嘅短訊或者面書上嘅訊息。唔駛上社交網頁都記得你生日嘅,除咗你爸媽,就一定係你嘅好朋友,試諗下,無人有責任記得呢啲嘢,唔駛人提都記得,一定係唔簡單,可能係男女朋友,或者係相識多年嘅友達。

第三,生日食咩好呢?生日正日,如果要慶祝一番,都要諗下食啲咩嘅,中餐、西餐,自助餐等等,最好就唔好常餐同快餐,喂,大個咗,都唔會再去快餐店開生日會啦,仲快餐?平時食唔夠?食咩係一回事,邊個比錢先?如果同男女朋友食,都會想對方比錢嘅,佢請我啦,一日姐。如果同一班朋友出去,就可能係眾人夾錢請你。咦,點講都好啦,生日嗰個人好似好著數。但其實呢啲「免費膳食」係要還嘅,因為之後都會輪到人地生日。

第四,生日會有咩禮物收呢? 生日有時都會有人送生日禮物,記得有人話「最好就係想要好耐嘅嘢,實用啲,如果唔係又會多件垃圾放喺屋企。」生日禮物,都係想收嘅人開心,亦係代表送嘅人嘅一份心意,有人願意花心思送禮物比你,其實收到啲咩都應該開心啦。

最後,就係驚喜呢個問題。曾經試過有人明知道自己嘅朋友會送一個生日蛋糕比自己,但都會扮驚喜眼濕濕咁話:「哇! 我真係估唔到,多謝你地。」很有趣,呢份驚喜係扮比邊個睇? 當然就係送蛋糕嘅朋友。我身邊亦有朋友試過生日凌晨12點,有人敲門送蛋糕,聽落好似好開心,事實上當時生日嘅主角已經著咗睡衣,瞓到一半,睡夢驚醒,出嚟開門,睇下咩事。驚喜,係驚定係喜,只係一線之差。

想生日過得開開心心,都唔一定要唔返工、全世界知你生日、食飯、收禮物同扮驚喜。咩都唔諗,正正常常返工,唔駛特登話比人地知你生日,當電話傳來朋友親口講嘅一句「生日快樂」,其實有時比起食咩飯、收咩禮物,更加令人心甜,情況就同情侶間細細聲喺耳邊講一句「我愛你」一樣,一期一會。

全文 1485 字 (唔計英文、空格、標點)
備註: 港語學第一屆廣東話徵文比賽
作者:陳曉琳