(beta 公測版本)
< 返回

《奴隸班》

日期:2014年6月27日

有雞先定有蛋先?根據進化論,係有雞先。咁有讀書先定考試先?你會話:「冇讀書點考試呀!」但係冇考試你又會唔會讀書呀?咁讀書究竟係為咗讀書?考試?定其實係為咗錢?我就真係睇唔透。

點解要讀大學呀?「因為要搵份筍工囉!」咩叫筍工?高人工得嚟又 hea 咪係囉,冇個學歷又點搵筍工呀。不過事實就係,畢業就等於失業,點解?冇經驗吖嘛,學士學位通脹,一個招牌趺落嚟都躑死幾件大學生啦。一畢業就想年薪過千萬,梗係要讀啲有市場嘅科啦,首要就係考好個公開試......考唔好咪讀個副學士頂住當先囉。筆者作為一隻啱啱畢業嘅阿蘇雞(副學士生),呢兩年「大學」生涯真係學到唔少嘢,除咗知識之外,比較入腦嘅反而係社會現實。

「呀,又要同我檯上面嘅書博命喇,今晚又唔使瞓喇......」考試季節影張檯頭相加幾句係常識啦下話,唔擺上網邊有人知我有溫過書咁勤力呀。上一上個分享網真係成個網都係影住叠「碌屎」嘅相,出街又真係會見到四圍都係擺叠碌屎喺到吹水嘅學生,睇嚟佢哋真係溫得好辛苦,所以依家抽少少時間出嚟吹水、影相。

不過講開又講,真係唔明點解要通宵溫書咁勤力,第二日重有精神去考試,唔通佢哋平時唞得太多所以依家唔使瞓?筆者呢啲 hea 人夜晚就鍾意瞓覺,唔會溫書嘅。叫我學清華大學啲學生由朝溫書溫到晚,行路又要趕頭趕命,為咗擠啲時間出嚟做多一條題目,咪傻啦,你不如一槍打死我啦。呢啲咁唔平衡嘅生活,當中會錯過咗幾多嘢,咁樣做人有咩意思?讀大學係學自立,唔係學做奴隸。

不過阿蘇仔唔考好個試又點繼續升學呢,有人表示:「唔該淨係教啲考試出嘅嘢,其他嘢我冇興趣,唔考嘅學嚟托咩!」唔考嘅嘢對你當然係冇即時嘅作用啦,因為你考試用唔著,咁又再證明,讀書真係為咗考試。最慘嘅我諗都係嗰班講師,因為一放 grade 嗰陣,個個都以為自己會滿分:「各位觀眾,伍條煙!」點知有一隻 B 嗰陣就鏟到個講師上天花板,跟住就叫人唔好揀呢個殺手(Killer),講到你爛grade(拎到唔係你想要嘅分)就代表全世界都會爛咁,不如檢討吓自己好過,邊處有咁多懷才不遇呀。子曰:「學而不思則罔,思而不學則殆。」我諗呢句已經過時,應該用:「學而唔考則廢,考而冇學則伏。」

哲學家成日研究一個行為究竟係一種手段,用嚟達到特殊目的,定本身已經係目的。如果用返上面個例,好明顯多數人都將讀書視為一種手段,用讀書嚟換考試高分,再用考試個分嚟換張好沙紙,再用張沙紙換份筍工,再用份工賺錢,再用錢......真係數到貳零肆陸都未數完。可能有人會話:「咁有咩錯先,個個係咁㗎啦。」冇錯,係冇錯。錯嘅係考試制度,錯嘅係奴性,錯嘅係階級觀念,錯嘅係資本主義。鄙人認為讀書就係為咗讀書、學嘢同研究,如果硬係要將佢視為一種手段嘅話,咁就係用嚟瞭解世界、人類、自己、搵出真理,同「進化」。

之不過依家教育發展半日萬里,就算考得唔係咁好嘅阿蘇雞(累積平均分(cGPA)冇叁點伍),都唔使愁之後嗰兩年冇書讀,因為大學知道市場所求嘅係一個學士學位,唔係副學士!所以有特製嘅「貳加貳」課程計劃畀學生,即係兩年副學士加兩年銜接學士學位,嘩真係抵到爛,加加埋埋用肆年就讀到一個自資學士學位返嚟,同出面高人一等嘅資助學士真係冇分別(咁濟)!話明自資,梗係冇政府教資會嘅資助啦,相對上價錢貴啲係正常嘅,重可以隔壹兩年就加吓你價,話晒個價同資助學位爭咁遠都有市場喎,梗係要賺盡你啦。學某位高級講師話齋:「碗麵由卅蚊加到卌蚊,你可以選擇唔食嗰碗麵。」又幾有道理嘅,話晒依家嘅自資學位同一件奢侈品;學院同商場嘅角色都係一樣,滿足客人需要嘅同時,滿足自己嘅荷包。今次真係,大學幫你日日賺。

但係實際上碗麵係由卅蚊加到伍廿蚊,外校阿蘇雞嚟讀銜接分分鐘重要補學分,補補吓可能貴過讀碩士,真係當堂得啖笑。就算你哋班學生去抗議加學費,或者要求公開數簿畀你哋拎去燒,都係冇用,因為佢知道你哋焗住一定要畀錢佢,唔讀都讀咗一半,可以去得邊到呀?當然有啲學院會凍結現有學生嘅學費,淨係加潛在客戶嘅價,但係係咪就等於你可以啓動可加可加機制?「冇錢呀?問政府借囉!」政府係好樂意借錢畀大家讀書嘅(資助就免喇)。

各位大客小心喇,近排傳出某大學旗下嘅專上學院有計劃會賣盤,原來咁都有得賣,唔係賣幢學校出去,而係賣啲學生同教師出去,真係夠晒創意。一眾學生當然出言反抗將教育當成商品嘅做法,有人重表示擔心張證書唔係由嗰間大學頒授。咁人哋嚟幫襯你梗係想要你嘅產品啦,唔係我就轉咗會啦,係咪?所以該大學都唔應該違約,計我話應該最少頒埋今屆。大家揀去讀你旗下嘅專上學院,都係因為你個名夠響,張沙紙可以幫到佢哋霸氣升學啫,點可以未滿約就拍拍囉柚閃咗去呢,轉咗手去間奀嘢到張沙紙會眨值,出事家嘛,到時冇人收我咁點算呀!不過睇嚟呢間大學真係冇錢使,連上堂版碩士都話要加價,重要話唔可以係全港最低。咁講法,如果,我話如果咋,間間都話唔可以全港最低,咁咪會越加越貴,間間喺到鬥貴,到時真係你讀埋我嗰份囉。根據食麵論嚟講一個奴隸都可以選擇做逃兵嘅,唔使揀喇,我呢啲窮人食唔起碗麵架喇,都係聽首「麵麵麵」頂住檔先算。不過老老實實,冇市場又邊有供應商吖,講到尾,大家都係為咗搵餐晏仔有讀書先定有考試先呀?我諗應該係......有商機先囉。

吖,既然學士通脹,不如我哋開個副碩士或者碩士先修班咯......

全文 1865 字 (唔計英文、空格、標點)
備註: 港語學第一屆廣東話徵文比賽參賽作品
作者:Gagsonian