(beta 公測版本)
< 返回

《音樂盒》

日期:2014年6月24日

咩係音樂盒呀? 望住宜家香港啲音樂盒,我真係睇唔清又測唔透。

咩係音樂盒呀?音樂盒,係人間文明裡面最美妙嘅藝術品。只要輕輕力扭動一下佢,佢就會好似比人注入左生命力咁,不停咁流出輕快又動人心弦嘅樂曲。一個個咁精細既音樂盒,其實帶住一首首由作曲家精心編寫嘅樂曲,仲有一個個工匠係背後嘅巧手同埋心思。

咩係音樂盒呀?咪好似我地呢個城市嘅學生咁樣囉!呢啲音樂盒都係獨一無二咁樣出廠,而係背後扭動佢地嘅,係對呢啲未來社會棟樑嘅期盼同埋對果份遙遠「夢想」嘅堅持。但係,現實又邊有咁簡單咁理想啊。經過左12,甚至15年嘅完全無間斷咁樣轉動,我聽到嘅唔再係果種又清脆又悠揚悅耳嘅樂曲,而係好似一個老人家嘅吶喊咁——既沙啞,又充滿住空洞,但又夾雜住一啲我聽唔明嘅北方語言,仲有令我更加一頭煙嘅「尊重同包容」。呢啲音樂盒,依然會繼續存在,繼續無意識咁轉動;隨住時間嘅流轉,慢慢逝去到虛無縹緲嘅歷史長河裡面,最後連個影都冇。

咩係音樂盒呀?咪好似我地呢個城市啲官僚咁樣囉!要知道,就算一個音樂盒外表幾咁燦爛奪目、音樂聲幾能安慰人心都好——音樂盒永遠冇可能理解咩叫「人性」。一於少理背後操控呢啲音樂盒嘅手係邊個、係點樣,我企係呢啲音樂盒前面,聽到嘅唔再係啲天才作曲家所寫嘅磅礴大作,而係好似中間比有惡魔吞噬嘅感覺嘅節拍污染左,再混埋一啲有喜感嘅昇平調子,重複又重複咁演奏成為一首首充滿「愛」同埋「真誠」嘅樂章。

咩係音樂盒呀?咪好似你、我同埋佢嘅生活咁樣囉!係呢個龐然大物,但其實空無一物嘅金融中心裡面存在嘅音樂盒,全部都冇曬對啲音樂家嘅批評、清理曬對啲工匠嘅不滿、唔見曬嘗試打開個蓋喘口氣嘅勇氣。而果啲路過欣賞下藝術品嘅觀眾,全部都帶住歡樂同埋喜悅嘅心情,完全冇攰或者受夠嘅感覺。呢啲觀眾同埋啲音樂盒,係呢個城市裡面一齊合力咁奏起左一首叫做「和諧穩定、安居樂業」,同埋用銀紙同權力做音符嘅美妙樂章,帶領香港向住我地光輝發展嘅未來好大步咁向前行,真係值得我地熱烈地彈琴熱烈地唱呀。

全文 742 字 (唔計英文、空格、標點)
備註: 港語學第一屆廣東話徵文比賽參賽作品
作者:jackdeverenz