(beta 公測版本)
< 返回

《我哋活喺一個殺子時代》

作者:雞絲陳
日期:2017年3月22日

我哋活喺一個殺子時代,而「子」即我哋。
 
十幾歲二十歲嘅,連環自殺,甚至每日跳一個。「大人」無動於衷,或曰:垃圾,唔捱得,咁易死。
 
二十出頭嘅,走上街頭關心社會,一個一個被捕,一個一個被囚禁。「大人」話:垃圾,愚蠢,抵死。
 
我哋嘅生活,變成每一日都睇住自己嘅同輩跳樓,或被捕被判刑。生離?死別?喺同學朋友之間已經要經歷。你問我哋慣唔慣?點會慣,點會冇感覺,但呢啲事已經多到令人窒息,開始俾唔到反應。自己成長或者已經好辛酸,再見住身邊嘅人一個一個都係咁,點會對人生有盼望?近年好多八九十後、千禧後患有情緒病,然後啲「大人」話:睇開啲啦,點解成日諗埋一便?
 
生我哋出嚟,然後想盡辦法壓迫我哋,趕絕我哋。唔反抗,死路一條;反抗,隨時活囚。
 
你睇下學校?睇下公司?望下個社會?細路係啲乜?後生仔係啲乜?係俾「大人」用嚟互相比較競爭嘅工具,唔跟「大人」嘅計劃,或者達唔到標,就係垃圾——我每晚都聽到隔籬屋咁樣鬧自己小朋友,鬧佢蠢,鬧佢串錯字,鬧佢咁夜都未做完功課,鬧到佢喊然後鬧佢喊,最後再加幾句「我唔要你喇,你好乞人憎」。到啲細路長大,出嚟做嘢,有幾多間公司啲babyboomers老屎忽唔係不停打擊啲後生?話佢大學畢業都係nothing所以只值10k,話佢唔加班加到入廠都係冇做好呢份工;後生嘅只係老一輩用嚟賺錢自己袋嘅工具。想結婚?想置業?我哋幾努力都冇用,租到個細單位有屋瞓已經叫叻喇。「大人」係點?係可以自己狂炒樓,有幾層豪宅喺手,炒炒賣賣放租收租。一路好威咁講自己置業心得,一路笑:「第日想買樓可以問下我意見吖,袋錢入你袋。不過,你哋呢代買唔到樓咖喇,哈哈哈。」呢啲人,我見過,我真係見過。
 
個社會唔公義,啲制度唔合理,你知我知當權者同既得利益者都知。後生嘅被欺壓,人人都知,但既得利益者唔會出聲,上晒岸嘅視若無睹。後生嘅唔係因為垃圾、無所事事所以出嚟抗爭搞事。只係,好可悲地,我哋一無所有,所以我哋冇嘢輸。我哋唔怕爭取完公義之後自己會蝕底咗賺少咗,因為我哋原本就係乜都冇。我哋求啲咩?求一個可以安居嘅地方,求我哋嘅同輩或師弟妹唔好死,求存咋。
 
今日庭上見到好多大學生。其實好難想像呢個年代做學生就係要出入法院,不停咁聽住自己嘅朋友面臨拘捕、控訴、刑責,仲要俾好多訴訟費。今日支持完呢個,下個星期又到另一個,再下星期繼續有,呢堆上完庭又有另一堆俾人拉。日頭支持完被捕嘅朋友,夜晚又見到新聞有啲後生嘅跳樓。後生仔女,真係應該過咁嘅生活咩?自己即使暫時安然無恙,感覺都係苟且偷生。呢啲生活好難過。
 
唔想見到自己、後輩或我哋嘅下一代冇晒生存空間,所以好多人走出嚟爭取,想扭轉個制度,但係咁就已經有罪,冇傷到任何人嘅都要坐兩三年。其他未被捕嘅,其實大家都心知自己只係好彩——又或者唔使幾耐就拉到自己。有好多戰友已經判咗入監,我哋更加唔可以放棄,唔可以變得犬儒安逸,如果唔係佢哋就係白付代價。
 
好無力,好沮喪,但我好怕兩三年後呢啲戰友出返嚟,見到嘅香港依舊;更怕我哋到時將一切合理化,甚至成為殺子幫兇。今日我哋悲慟、憤慨;兩年、或三年後,我哋可唔可以喺戰友面前抬起頭迎接佢?所謂抗爭去到今時今日,好多人已經知道咩嘢work、咩唔work,知道有啲嘢係需要等待,而等待嘅過程仲我哋需要裝備自己——包括思想上、論述上同關係網絡上。老老實實,呢兩年幾發生咁多事,每次我哋都會話:「嗯,要努力,要學多啲嘢,要操fit啲。」但好多時拖下拖下,又會開始懶。呢段時間,戰友一個一個上庭、判罪、判刑,其實我哋再冇懶嘅空間。兩三年時間喺獄中一定好漫長,但對我哋呢班囚室外嘅籠中鳥嚟講,其實可以好快過——day day need work、間唔中去下旅行散心,咁就過咗。到時候再問返呢個問題:「我哋可唔可以喺戰友面前抬起頭迎接佢?」我希望我可以。
 
有朋友話,會好好鍛鍊身體,留有用之軀,他日或許有用。有朋友話,會好好讀書,充實自己,爬上高位,他日或許可以有啲影響力。有朋友話,會好好賺錢儲錢,建立事業,他日或許可以喺戰友義士出獄時幫佢哋有工做,解決咗生活所需先。希望我哋都搵到自己努力嘅方向,知道自己為咩而做。設若有成功之日,亦千萬唔好忘記呢一班率先為我哋付咗代價嘅人。
 
除咗抗爭路上嘅戰友,仲有一代俾迫害嘅莘莘學子。短期內可能我哋止唔住自殺潮,但唔好放棄為自己同佢哋爭取一個正常嘅香港。留有用之軀,係要做有用嘅事。所有嘢都返返去嗰個point:要變好,要變強,但要繼續善良。
 
早就唔期望有「大人」願意瞓身為後生一代爭取或改變任何事,呢個係一個青年人必須自救和支撐同輩活下去嘅殺子時代。同道諸君要活下去,永遠唔好苟且偷生。到我哋變成「大人」,到我哋有更多impact可以同嗰班殺子嘅人抗衡,到我哋真係一步一步扭轉到社會令佢變得更美好更宜居,都千其唔好變成我哋鄙視嗰種「生子為殺子」嘅人。

全文 1664 字 (唔計英文、空格、標點)