(beta 公測版本)
< 返回

《幫阿媽揀相》

作者:雞絲陳
日期:2017年3月4日

阿媽每次去旅行之前嘅一兩日,都會扁晒嘴楚楚可憐咁走嚟同我講:「阿女…☹️ 我部手機呀…☹️ 啲相呀…☹️ 你可唔可以幫我飛晒佢哋落一度呀…☹️ 我驚我去旅行冇位影相呀…☹️」佢講緊嘅即係幫佢backup手機嘅相,騰啲空位出嚟俾佢影新相。
 
「你部相機呢?拎嚟睇下?你部相機張卡大把位喎…仲可以影千幾張,夠唔夠?」
「咁係咪即係平均一日可以影一百張?☹️」
「一日一百張乜都夠啦?」
「……我唔知呀。咁手機呢?仲有幾多位?☹️」
「媽點解你唔用部相機啫?我哋買俾你你又唔用。」
「我唔識用部相機呀…用唔慣…☹️」
 
佢個樣真係好可憐,而我又真係幾錫佢(我覺得lol),所以即使我其實有啲攰,同埋有少少嫌麻煩,都係會話:「…………好啦好啦,你兩樣拎晒嚟啦,我幫你搞啦。」
 
然後我用咗兩三個鐘幫佢喺相機SD card同手相micro SD card幫佢backup咗六千張相。重點係:我呢個孝女仲幫佢啲相分埋folder!!!唉睇返佢次次去完旅行影完相返嚟都唔識攞返相機啲相(一年幾前去旅行嘅相仲喺相機SD card sosad),難怪佢prefer用手機影,影完至少有得睇返orz。
 
雖然好攰,但如果可以令阿媽安心知道相機同手機都有好多memory俾佢影相、又入返佢要聽嘅歌俾佢travel時聽,開開心心咁去玩,都係值得嘅。
 
幫阿媽set電子嘢真係好煩。明明佢本身又唔係讀得書少又算係個專業人士理解能力同學習能力絕無問題,偏偏對住電子產品就總係話「唔識唔識」「好難好難」「唔學唔學」「幫我幫我」…🙄 一方面覺得好麻煩,另一方面又覺得佢走嚟嗲我都幾可愛。電子產品嘅嘢,買得俾阿媽,就要幫佢set好晒所有嘢係常識…
 
而家清下位都唔算煩,佢玩完返嚟叫我再backup都唔算煩,最恐怖係佢會話「你教我點樣喺電腦啲相度睇相同揀相吖」…講緊佢自己影埋影埋啲旅行相生活相都上萬張(佢係唔係都影咗先咖,乜都撳掣乜都話唔捨得del),仲未計佢向我哋幾兄弟姊妹追討咗好耐嘅N年前家庭旅行相…而陪佢揀相嘅意思係:開部電腦,開返佢folder啲相出嚟,逐張陪佢睇下keep定delete…然後…就沒有然後了…通常佢揀咗個零鐘就會好攰話要瞓覺,然後過一輪又係咁追我陪佢搞相…
 
阿媽想要啲咩,我點會唔知?佢想要嘅只係隨時可以用手機影相同聽歌,又隨時可以回味下啲舊相。要滿足佢唔難,只係煩。我知道只要我親自幫佢將啲相分好晒類(甚至我幫佢決定邊啲keep邊啲del,乾淨俐落;又或者幫佢精選啲相方便重溫) 然後幫佢入返一撮靚相落手機,佢就會好開心~我就…我就大工程啲囉。>_<
 
頭先搞咗一陣,我已經叫佢瞓先,因為實有排搞。
 
「媽你瞓先啦。」
「咁我瞓喇~?😍」
「嗯。」
「你唔好搞咁夜呀,整唔到就由佢啦…😔」
「得啦…」
「咁我瞓喇~☺️」
「媽,你覺唔覺得自己好幸福咖?」
「我覺咖。☺️」
「你覺得自己有咩咁幸福?🤔」
「我啲仔女好錫我囉~☺️」
「我都覺。」
 
算你啦,都知自己身在福中~
 
我成日都同阿媽講:「你老豆又咁錫你,你老公又咁錫你,你啲仔女又咁錫你,你知唔知自己真係好幸福啊?」其實我都唔係想咁就阿媽咖咋(我老豆夠錫我咯我阿哥細佬夠就我咯我都俾人錫慣咖),佢有時有啲位真係唔太make sense sosad(十個阿媽有九個都應該係),但老豆咁錫佢咁就佢,我覺得我只能繼續錫佢保護佢囉,唔係都唔知佢點算。🙄

全文 1024 字 (唔計英文、空格、標點)