(beta 公測版本)
< 返回

《外星人襲香港》

作者:星爺
日期:2017年2月24日

「你覺得外星人點解會嚟香港?」

雖然佢搭開呢班船返工,但係博士睇落都仲係面青青咁。佢冇接到我遞畀佢嘅望遠鏡,只係雙手扶住架大飛嘅欄杆,低頭望住鐵鏽色嘅海浪。

「我冇信心可以估到佢哋嘅動機,或者咁講,你唔覺得外星人同人類一樣,每個動作背後都有動機呢個假設好自大咩?」
「咁我真係好難想像到有「人類」以外嘅思考模式。」
「咁係因為你,唔係,係我哋都未見過自己以外嘅同輩。就好似電影漫畫入面嘅外星人往往只係笠咗公仔衫嘅人類,實際行為舉止同我哋係冇分別。」
「猩猩、海豚、鯨魚呢啲唔係都好聰明、好有靈性架咩?」

艘船拋咗一拋,博士扶咗一扶佢副眼鏡。外星人到過嘅遺址啲天氣似乎特別唔穩定。

「咁係因為我哋孤獨得滯,就好似女人嫁唔出,聖誕節留響屋企同隻貓傾偈一樣。」

佢苦笑咗下,我亦唯有陪佢笑一下。

「遺址裡面好多違反物理定律或者現今解釋唔到嘅怪象。博士你之前咪響都發現到一粒完全冇表面阻力嘅石仔,可以話係推翻咗科學界舊有嘅學說。咁你自己又點睇遺址入面嘅現象同文物?」
「你哋記者個個都係咁,你哋只係會俾個題目我哋,然後叫我詳細解釋或者俾意見,根本就冇心機同我傾計。」佢可能覺得自己講得過火咗,又再笑咗一下,以笑遮醜。
「可能真係職業病嚟,唔係一時三刻改變到。」
「唔係嘅,覺得自己係宇宙中心嘅職業病咪響一夜之間被完全消滅囉。」

我笑咗一笑,諗唔到有咩好講,可能佢真係有少少寂寞,但係記者同專家之間條界線始終唔係咁易破冰,唯有同岸邊架滿鐵欄嘅橋咀島影張相。我哋艘船駛過咗個插住警告牌嘅浮標,船家指住艘駛緊埋嚟嘅警艇。博士響褸袋拎咗張許可證,纜響自己條頸度。

「我唔覺得外星人係特登留禮物俾我哋,或者係為侵略地球做前期準備。都係嗰句,唔好睇得自己咁高。」
「換言之,背後係無咩因由?」今次輪到我苦笑咗下,佢俾啲咁嘅答案我,我點spin都spin唔到份特刊出嚟架喎。
「你有冇睇過一本叫Roadside Picnic嘅小說?」
「我淨係聽過個名咋。」仲要係啱啱由佢口中。
「外星人係嚟燒嘢食。試想像一個露營熱點,大東山又好,東龍島又好,有一班大學生秤住一袋二袋嘅嘢食嘢飲,褲袋裡面裝著手機,背囊裡面裝著風箏同帳幕。佢哋起火,搭營,一路飲住啤酒,燒嘢食燒到第二朝日出先走。響呢個漫長嘅夜晚,樹叢裡面嘅小動物、枝頭上面嘅雀仔、石頭底下嘅昆蟲靜靜雞望住呢班巨人。佢哋唔知佢哋做緊乜,亦都唔知佢哋背後有咩意圖。佢哋見到啲咩?佢哋只係見到一堆濕透嘅炭屎、隨風飄揚嘅膠袋、仲沾著醬汁嘅骨頭、發泡膠盒同保鮮紙、閃令令嘅鋁罐、甩皮甩骨嘅紙鷂同燒盡嘅蚊香。」
「你覺得外星人隨處揼垃圾駛唔駛罰五千?」
「我覺得執法嗰個應該會係外星食環署。」我哋大家笑咗一笑。

警衛快艇駛到嚟我架大飛旁邊,博士show咗佢張許可證俾個實Q。我習慣性將我張咭片遞畀博士,佢呆咗一呆,放咗落褸袋。當我艘大飛掉頭返西貢嘅時候,我回頭望下博士架快艇,發現佢唔係駛得好遠。我向佢揮一揮手,之後透過望遠鏡隱約見到船上都有個揮緊手嘅人影。

全文 1051 字 (唔計英文、空格、標點)