(beta 公測版本)
< 返回

《暗瘡法西斯》

作者:星爺
日期:2017年2月15日

我後生嗰陣成面都暗瘡印,唔係因為我疏於打理,而正正係因為我好在意面上嘅暗瘡,所以照鏡一見到就會擠走佢哋,搞到我成塊面都係暗瘡喇(la1)。不過呢,我在意嘅唔係自己嘅儀容,而係接受唔到塊面有瘡,嚴格嚟講,應該係接受唔到瘡裡面嘅膿水先啱。每個人心底裏其實都接受唔到自己體內有自己唔鍾意嘅外物,好想將佢哋擠走,網上擠黑頭影片之所以大受歡迎就係因為呢個道理。點解我明知會留疤都要擠暗瘡?因為我寧願皮膚上有疤痕,都唔想皮膚下積膿脂。

擠暗瘡嘅感覺個個人都唔同,好睇佢對痛感同外物嘅態度。有啲人天生受虐癖,特別鍾意擠壓痛到極點,膿泡爆開嗰下解放嘅感覺。有啲人純粹係壓力大手痕,想經痛覺解壓,原理同介手或者搣嘴唇差唔多。我對擠瘡呢個動作無咩感覺,擠嗰陣亦都無咩快感。我純粹係接受唔到皮下嘅膿水咁解,所以我關心嘅只係呢個動作嘅效果。每次擠完呢我都有少少安心,同唔太虔誠嘅信徒祈完習慣性嘅禱文一樣,因為我又擠走咗我裡面嘅數之不盡外敵嘅其中一份子。

同樣道理,我老婆之前勾搭咗我姐夫。我接受唔到自己屋企入面有我唔鍾意嘅外物,所以將佢哋擠走。而家我凌晨四點秤住兩大袋垃圾,丟落城門河。我寧願坐監,都唔想屋檐下積膿脂。

全文 451 字 (唔計英文、空格、標點)