(beta 公測版本)
< 返回

《星期日睇波》

作者:賴叔
日期:2017年1月29日

網球四大滿貫之一嘅澳洲網球公開賽,由 9 號種籽同 17 號種籽對壘。唔講你會以為係啲咩黑馬選手對決,但其實戲碼係 35 歲嘅瑞士球王費達拿,對西班牙泥地王拿度。

呢兩條友一時瑜亮,早五年真係風雲雄霸天下咁嘅格局。但歲月催人,拿度雖然只係 30 歲但都周身傷而影響表現,球壇一哥早就唔係呢兩位大佬。

亦因為咁,呢場激戰到第五盤嘅經典對決,就顯得更有英雄遲暮、虎落平陽嘅味道。《英雄本色》名句「我冇做大佬好耐喇」,放喺兩位昔日一哥身上完全適用。

場波落筆時仲打緊第五盤,但形勢上由拿度佔優。話說喺我開電視嗰陣拿度大分輸緊一比二,但係第四盤成功打破費達拿發球局,加上費達拿多次無壓力之下犯錯 (尤其是正手) ,結果第四盤拿度贏六比三。及後費達拿短暫離場接受治療,返出嚟第五盤首個發球局就失手,係傷患影響表現,定係被迫和嘅壓力影響心情?我相信係前者。

What so ever ,我都唔係專業網球球迷,睇場好波,睇兩位高手過招點樣鬥少犯錯同埋迫對手犯錯,真係技術嘅較量,係有今生冇來世的說。

全文 369 字 (唔計英文、空格、標點)