(beta 公測版本)
< 返回

《仔呀仔,你第時千祈唔好學佢》

作者:賴叔
日期:2017年1月26日

做人老豆有個好處,就係從頭學習人體生長嘅過程,實用性高過中學讀幾年 biology 。半個月甩臍帶、兩個月識望自己雙手、五個月識轉身⋯⋯唔係賴B ,我唔會知道呢啲時序同 milestones 。

呢兩晚同賴太講起,做家長就好似打機咁,難度一關比一關高。最初只係需要考慮三樣嘢:食、痾、瞓。然後開始慢慢疊上去,例如話四肢機能嘅發展、五官係咪靈敏,然後半歲之後開始容易生病,一歲準備入讀幼稚園⋯⋯

Well ,我知道一講到入學問題就會好大爭議。有人主張畀 BB 返 playgroup 學交際應酬,有更多人為子女報讀 N 班方便入讀心儀幼稚園,有更更多人想佢哋讀到好嘅小學銜接上 Band 1 中學,最終讀大學、搵好工、食好西。至於呢條漫漫長路,究竟要始於一歲、半歲定係出世甚或射精前舖砌、籌備,認真豐儉由人。

早前有報道提到數學神童沈詩鈞,九歲入浸大讀書,13 歲讀完學士及碩士,今年 18 歲去咗美國 UCLA 做助理教授。我望望沈詩鈞幅相,再望望賴B ,然後心諗:
「仔呀仔,你第時千祈唔好學佢。」

18 歲就做到一般人可能廿幾卅歲先做到嘅事,當然係非凡成就。但並唔係人人有咁嘅天資去行條 superhighway ,行呢條 fast fast fast track (因為真係好快所以要講三次) 亦不無代價:賴叔九歲嗰陣仲喺社區中心同其他同學打緊乒乓波六分四, 13 歲嗰年見到同學買咗本夕樹舞子寫真集但係冇舉報畀老師知, 18 歲沒戴錶不過有時間喺大學宿舍打通宵麻雀。

而呢啲與同輩一齊成長嘅經歷,塑造咗你同我嘅性情、人格,亦係往後敘舊或同學婚宴上攞嚟回味嘅話題。如果人生走得太快、太早成為人生大贏家,無可避免就輸咗呢啲看似平凡唔值錢,但其實跟你一世可以帶埋入棺材嘅回憶。

當然我知好多家長唔係咁諗。唔係邊得嚟一位精神科醫生分享家長帶小朋友嚟睇病、配藥提升專注力?為嘅都係考好每一個試,無論係 TSA 、 BCA 定係 NBA ,總之入到名校就不惜一切。即使西藥傷肝又燥熱又有副作用。

但我都係相信道法自然。人體好奧妙 (唔係做乜有「人體奧妙展」?) ,人腦仲奇妙到令人類可以發明文房四寶同行房四寶,以及其他水電煤、衣食住行等日常所需。之不過,即使再延年益壽,人生拉長到一百一十歲,體能同精神上嘅衰退都係必然發生。呢個係每種生物生老病死嘅自然過程。

正如一開始講, BB 成長有唔同階段,半歲左右學識坐直個人、一歲前後學識行路,總有啲人早啲、有啲人遲啲,總有 outliers 存在。但如果話為咗要贏,就三歲學奧林匹克數學、六歲精通三國歷史、九歲識講七種語言,十二歲通曉整個管弦樂團嘅各種樂器,我會問:有咩用?

日出而作,日入而息,係正常人嘅起居習慣。同樣地,三歲學 ABC 、六歲讀「花,紅花,一朵紅花,這是一朵紅花」,學習之餘保存童真玩狐狸先生幾多點、打孖寶兄弟電子遊戲、十一二歲開始注重儀表學人 gel 頭 chok 樣,咁先至係路。你有冇見過一班中坑圍埋玩紅綠燈或者拋手巾?冇,因為童年過咗去就唔會返轉到,社會世俗亦唔容許成年人幾廿歲人仲戇鳩鳩玩估領袖。返工仲估唔夠? 18 歲扑扑趣,如果咁早已經為人師表,可能,有啲沒趣。

仔呀仔,你慢慢嚟。繼續享受下啜奶嘴、啜手指,同埋聽老豆啲 #腐乳紙 爛 gag 然後笑出聲。知唔知雀仔跌落水會畀咩嘢沖走?係鼻水呀~

#其他爛gag請留意返腐乳紙hashtag
#時光會迫你這副萬金之軀
#競逐世上各樣乜乜之最
#你若決定要做最尾一名絕對允許

全文 1113 字 (唔計英文、空格、標點)