(beta 公測版本)
< 返回

《【愛國者】【平行世界嘅陶傑】》

作者:星爺
日期:2017年1月12日

我唔怕同你講,雖然響溫哥華出世長大,但父母耳濡目染之下,我自認係個好愛國嘅中國人。就好似尋日我去超級市場買生果,秉承著華夏兒女「攞得唔好嘥」嘅精神,我特登收埋隨身袋住嘅環保袋,特登去用超市附送嘅透明膠袋。將膠袋自鐵圈一手搣出嚟嗰下,將薄膜撕開嘅觸感同聲音響我全身共振。我興奮到感覺到自己嘅心跳,因為響嗰一刻,我唔單止係搣咗個膠袋咁簡單,我仲同祖國修復咗塊失地咁。

好可惜我畀錢嗰陣露咗底。正當我效法祖國人民「憎人富貴厭人貧」嘅處世態度,懶懶閒咁,帶著蔑視嘅眼光,好似餵動物園長頸鹿咁將手裡面嘅銀紙塞俾月薪肯定唔夠一萬蚊嘅收銀員時,我竟然不自覺地同佢笑咗笑、講左句「唔該」!當我見到自己用雙手去接散紙嗰陣,我已經意識到自己嘅錯誤,發覺心底裡面西方嘅偽善湧咗出嚟。我好想嘔,於是急急腳,拎住袋橙,就跑咗出去,擁塊面落最近嘅死氣喉度,好似閉咗好耐氣咁大啖大啖將廢氣泵入身體。我吞吐住天朝人民每日呼吸嘅空氣,同祖國大地天人合一。

跟住可能我舒服得滯,稍有尿意,於是行咗去間麥當勞。去佢個廁所唔買嘢食,夠著數啦掛。我好滿意咁行咗出街,見到有對貌似同胞嘅母子,阿媽扶住個仔條腰,個仔條褲除到落腳踝。我起初都唔係幾明佢哋做緊乜,直至我見到個細路相腿之間有條小水柱。我嗰下真係呆咗,我從來都未見過咁authetically chinese嘅事。正所謂「道在尿溺」,字正腔圓如央視主播一樣嘅普通話配住尿柱著地嘅達達聲,我嗰吓就好似見到上帝一樣。我差啲想攞部手機出嚟影低佢珍藏,但係內心總係有種莫名其妙嘅羞恥心壓制住我。

【純屬虛構呀,我正牌新界仔嚟】

全文 582 字 (唔計英文、空格、標點)