(beta 公測版本)
< 返回

《魚蛋嚟咋嘛》

作者:雞絲陳
日期:2017年1月5日

OT完返到屋企,見枱面有飯有餸,仲有啲未淥嘅菜同餃。媽媽一見我返嚟,就叫我自己叮飯,然後開爐淥菜俾我食。
 
媽:(一路夾啲菜同餃落煲)咦,仲有粒丸嘅?(夾埋粒丸落煲)唔怕啦你食埋佢啦,一粒咋嘛~
我:咪住先,你嗰粒咩丸嚟?俾我望下先!
媽:黑椒…唔知乜丸啦,是但啦落咗喇~
我:我好似望到佢係花枝丸定八爪魚丸喎…我唔食咖喎~(按:我淨係鍾意食魚蛋,唔鍾意食墨魚丸同佢啲朋友。)
媽:你當佢係魚蛋就得~
我:下邊有得當?!
媽:同魚蛋咪一樣,都係嗰啲嘢,都係加工嘢,都係假肉~
我:…所以呢?
媽:所以都係假咖囉~咁嗰粒你可以當係魚蛋就得~
我:…唔可以囉…
媽:熟晒喇我熄火喇你自己夾。最衰我刷咗牙,如果唔係我幫你食咗佢。一係你叫細佬幫你食?
我:(咁啱見細佬行出廳)喂你食唔食嗰粒嘢?
弟:而家唔食喇,飽。
我:嗰粒其實係咩丸?
弟:好似係黑椒花枝丸之類啦。
我:阿媽叫我當佢魚蛋囉…🙄
弟:嘿。😏
我:(嗌入房)媽!花枝丸呀!都話我唔食花枝丸咯~
媽:(嗌返出廳)魚蛋嚟咖!
我:…
媽:一粒咋嘛食咗佢啦,魚蛋嚟咖~
我:…
 
我繼續食飯,過咗十分鐘——
 
媽:(嗌出廳)食咗粒魚蛋未呀?
我:勉強呑咗啦…
媽:有冇咁委屈呀?魚蛋嚟咋嘛~
 
Okay you win.
 
而我覺得有時我都同阿媽一樣咁無敵。🤔

全文 405 字 (唔計英文、空格、標點)