(beta 公測版本)
< 返回

《大多數人都係本土派》

作者:擇言
日期:2015年11月1日

其實大多數人都係本土派。

我嘅本土係香港,唔會細到係鴨脷洲,亦唔會係大到成個嶺南,成個東南亞。大愛包容嘅人,佢哋只不過係將本土概念無限擴大,去到成個地球;大中華膠,就係認為中國都係佢哋嘅本土。

本土嘅界線點樣畫呢? 好主觀,要靠你自己嘅觀察,好睇你用咩方法去做判斷,自己人、自己地方係啲乜。

例如我識一啲人,鍾意用膚色去分。於是黃皮膚黑頭髮嘅就係自己人。又有啲人用語言去分,寫漢字嘅就係自己人。或者同我同聲同氣又係自己人。仲有啲人用出生地去分。例如喺香港領土嘅就係自己人。再有啲人用立場去分。例如支持民主就係自己人、支持八九民運又係自己人。又有人用文化水平,同自己有咁上下文化嘅就係自己人。仲有啲人用身體特徵去分,有眼耳口鼻就係自己人。

搵到自己人係邊啲,就好易搵到自己地方嘅界線。

但係無論你用邊個方法,其實你都係做緊一種樣式辨認(pattern recognition)。呢個分類嘅目的,就係搵出兩類因素:①中咗就係自己人,②中咗就非我族類。呢個係好困難嘅過程。因為冇一個定義好嘅正確答案。呢個係一個自我尋找嘅過程。隨住經歷嘅變化,你會慢慢改變呢兩類因素嘅構成同比重。

好似我細個嗰時會覺得黑人就非我族類,黃黃地又唔係咁白就自己人。人越大,發現自己對自己嘅定義要仔細啲,飲食、行為、語言、共同經歷等等,逐漸加咗落去我對自己人嘅判斷方式度,慢慢形成咗一套唔可以三言兩語講出嚟嘅認同矩陣。

因為呢個係每個人分開經歷嘅過程,難免我嘅自己人,唔等於另一個自己人嘅定義,我嘅本土,同你嘅本土,就算重疊,因為判別方式唔同,邊界亦都肯定會有分別。當然就住唔同嘅議題,甚至可以一個人都分開幾套對自己人,對本土嘅分類法。

不過即使係噉,我都會尊重每一個為自己嘅判斷。如果你嘅本土涵蓋得好闊,闊到超越香港,只要你真心噉諗,你大可以貢獻你心目中關心嘅地方。

不過如果你心目中嘅本土係細啲嘅範圍,但係又要成日關心住非本土嘅地方而忽略自己,噉我就會覺得你虛偽㗎喇。

有人叫呢啲做大愛。你可以當愛係檸茶,而愛嘅行為係篤檸檬,檸檬有限,你攞個紅A膠筒裝茶,篤到個筒穿都唔會整到檸茶出嚟。所以大愛就即係無愛。日日講大愛呢種人我係相當鄙視嘅。

全文 789 字 (唔計英文、空格、標點)