(beta 公測版本)
< 返回

《子非魚,勿屌魚之樂》

作者:賴叔
日期:2016年11月9日

美國選民投票畀 Donald Trump ,舉世跌眼鏡,香港都有好多政經名人好激動,一副「我不能接受」嘅模樣。

大家嘅意外,大部份由民意調查造成嘅錯覺而起。民調訪問得嘅,比較多數係城市人,有樣本誤差在所難免,更莫講話口投乜乜乜,票投物物物嘅口不對心受訪者。

美國人尚且利害攸關而為選情咬牙切齒,香港人,茶餘飯後攞嚟講下就恰如其份。既然係一場誤會,一笑置之就好。講到美國選民智商有問題,甚或連帶質疑整個民主制度,大可不必。

子非魚,焉知魚之樂?美國幅原廣闊,紐約、洛杉磯等大都會,同鹽湖城、鳳凰城、達拉斯等中西部城市已經係兩個世界。更莫講話鄉下地方務農畜牧嘅美國人。喺佢哋眼中,係侮辱女性大鑊啲定係用私人電郵處理公務大鑊啲,你真係知?奧巴馬八年求變,城鄉之間嘅觀感如何,你又有幾清楚?單憑選舉結果加上自己眼中對 Donald Trump 狂人嘅印象而論斷美國人 educated 同 being dumb 並重,未免太便宜。

如果仲係唔明,大可換個位思個考。香港人喺中共治下有苦自己知,但喺外人眼中,不論係大陸人抑或係歐美洋人,要理解香港人對於民主、自由、文化等領域同中共嘅衝突,都唔係睇一兩單新聞就有深入體會。英國《金融時報》 FT view 日前評論港獨/自決思潮觸動中共神經,含蓄地勸香港人安份守己乖乖地就同共共相同無事,香港人看在眼內作何感想?

一諗過,再回想美國大選結果,停一停,你會知道事出必有因, Donald Trump 既然係美國人按美國制度自己做嘅選擇,予以尊重,就好。

全文 506 字 (唔計英文、空格、標點)