(beta 公測版本)
< 返回

《星期日休息》

作者:賴叔
日期:2016年9月12日

休咩息,根本呢排都冇得抖。立法會選戰結局消耗咗人一個通宵都唔夠,仲要等埋晏晝先點完票唱出票王鄺俊宇嘅片尾曲,攰死人咩。

之後幾日,網上繼續有零星炮火,但係當大家覺悟地面 offline 嘅風吹草動遠比網上 online 戰火連天來得有影響力之後,網上嘅餘震收視恐怕比起 ViuTV 閒日下晝啲卡通片更低。認真關注,感覺會好似巴士迷、鐵路迷咁,外人覺得你好沉迷好專業,但佢哋只關心幾點有車搭,唔好同佢哋講啲咩車隊調動或者訊號 Config ,冇人想知。

諗返自己喺七月尾開始關注同投入時間係咁出文,初衷係想一紙風行令多啲人睇到主流以外嘅評論同觀眾點。睇返啲 stats ,唔係話完全冇用嘅,起碼有啲讀者睇完會 tag 佢啲朋友然後佢啲朋友會回應。又或者 篇文有 share 然後有人睇。

Facebook Pages 嘅 reach 數製造一個憧憬畀大家,就係你以為篇嘢有成千上萬嘅人睇到,但睇到、「立下眼」、掃過定係細讀, Facebook 唔會答到你。所以, Reach 數其實係「頂多有咁多咁多人睇到」,變相係一個打擊而非鼓勵。

而家各行各業都想借助互聯網,原因係慳錢。但從政者,其實唔慳得咁多。腳踏實地落區生根,開辦事處見居民,呢啲 physical presence 實實在在,同留喺網上打口水交嘅分別,相信就係同住家人與網友嘅分別。

不過賴叔又唔係從政 (係就死得啦) ,冇以上顧慮。嚟緊應該會恢復正常模式,例如話間中發下噏風 (有人話呢啲叫書寫人性) ,間中講下時事,間中去返友 page 講金融財經。呢度其實好似以前啲 blog 咁,讀者多多益善,少少無拘。最緊要係,我唔係旨意呢度開飯,或者博取其他機會食多碗飯。因為,一旦講錢,好多嘢都會變得好肉酸,程度係,小學教育電視用顯微鏡影住嘅寄生蟲咁核突。

寄生蟲寄生喺寄主而攝取養份,好聽叫雨露均沾,唔好聽,就係黐金糠;寄生而對寄主構成傷害,更加係損人不利己嘅行為。因為一旦寄主瓜柴,自己都要搵定後路,否則死路一條。做人如果冇自己嘅存在意義同價值,諗諗下,真係好可悲。 Pathetic , you know ?

全文 655 字 (唔計英文、空格、標點)