(beta 公測版本)
< 返回

《點樣鼓勵屋企人投票?》

作者:雞絲陳
日期:2016年8月18日

好多同輩朋友都會話:叫屋企人投票好煩。啲上一代好多都唔理政治、唔識政治,又或者已經俾泛民搞到好灰心同犬儒,覺得「冇用嘅,做乜都係咁咖啦,投票都冇用啦,少我一票唔少啦」。今日我想分享下我點樣「教育」家中兩老、點樣鼓勵佢哋投票。
 
首先,其實我唔會將屋企收到嘅選舉通函掉晒佢掉淨自己支持嘅候選人嗰張。我會由得佢哋成疊咁放喺茶几或餐枱,等屋企人有意識就快到立法會選舉,知道「係喎,而家係競選期,嚟緊就要揀個嚟投」。你成疊掉晒佢,得返一份擺喺度,反而冇乜意思,屋企人根本唔會睇,可能只係當平時人哋sip信箱嘅宣傳單張咁無視。就算你房門、書枱、餐枱、雪櫃全部貼晒你撐嗰個候選人嘅單張,喺屋企人眼中,嗰件都係「你個人嘅事」(最多咪知你好buy呢個政治人物,咁點啫);但如果你俾佢見到屋入面好多通函,反而可以提返佢呢個選舉係「選民嘅事、香港人嘅事」。
 
不過點樣擺都可以有啲技巧嘅。我嘅做法係將我支持嗰啲貼喺雪櫃(可以連埋張投票通知卡),當係提自己9月4日去投票,同埋低調咁俾屋企人知你buy邊個。至於其餘嗰疊,我會將最柒或最賤嗰啲擺面(前提係你知道你屋企人都唔buy佢),啲扮溫和扮中立呃得下上一輩嘅就收埋少少(等屋企人少啲猶疑嘛lol)。總之,我唔係要舖天蓋地咁用單一候選人嘅單張洗佢哋腦,我只係要佢哋有意識 i. 就嚟選舉、ii. 佢哋有責任投票、iii. 有啲候選人好唔掂、iv. 我其實有心水有睇法有取態,有人問我我就會講。
 
同樣道理,喺社交媒體唔好瘋狂share單一候選人或政黨嘅宣傳片/論壇片/政綱出嚟,咁樣做對於非政治宅嚟講係非常噁心同厭煩,硬銷得嚟太煩膠。反而可以試下share下其他區一啲你欣賞(至少唔討厭)嘅候選人俾佢哋,作用同樣係提醒佢就嚟到選舉,同埋俾佢知道「嗱其實都有啲候選人幾okay喎」——俾返少少希望佢哋嘛,唔係佢哋繼續以為嚟嚟去去都係班泛民老屎忽,仲邊有心機諗投邊個。我舉個例:我屋企係新界東嘅,但咁啱有晚同爸媽睇咗一陣九龍西論壇喎,佢哋又對大陸朱好好奇喎,咁其實大陸朱有幾掂有幾正係唔關我哋呢啲新東人事,但我見到網上流傳大陸朱寫政綱手字好靚嘅圖,都會share俾佢哋睇,旨在keep住remind佢哋:就嚟選舉喎!人哋九龍西有個阿伯出嚟選喎幾掂咁喎!我哋都可以留意下新界東有咩選擇喎!——咁囉。
 
另外嗰啲喺佢哋睇本候選人簡介或電視論壇時隨時standby「指引家長」、適時解話同debrief就唔多講啦,基本嘢嚟。我明白有時係好冇耐性咖,我家兩老都搞亂區議會同立法會嘅選區咖,咁點啫?唔通鬧佢一輪港豬之後不屑同佢論政咁咩~梗係溫柔解答,等佢知道去投票、盡公民責任嘅門檻其實唔高啦。至於講到話出晒面肉緊拉票喎?其實我都會做,但唔係咁早做…多數去到臨尾幾日就直接講喇,私下whatsapp拉票都指名道姓咖喇,仲要預返少少buffer俾佢哋消化同研究政綱(如果佢有心望幾眼)。當然啦如果你屋企啲長輩本身就好關心政治,好肯討論,甚至你覺得佢哋有機會再幫你拉啲上一代嘅票,咁就早游說早著啦~(我屋企人唔得啫,太早餵太多嘢好易反彈~我只能慢慢嚟,逐啲滲~)
 
我講嘅唔係咩獨到見解、唔算係咩策略,只係少少心得,未必人人適用。重點係:呢啲招數係我呢啲平日孝順又與人為善嘅人先用得著,嗰啲日日屌人港豬懵撚嘅人學唔嚟。為政治而斷六親嘅人,再有高見再有洞察力都冇用——都冇游說對象——所以我不嬲唔鼓勵大家同非政治宅(唔好成日港豬港豬咁難聽)劃界劃得太清咖。

全文 1190 字 (唔計英文、空格、標點)