(beta 公測版本)
< 返回

《地鐵角落位逸事(二)》

作者:星爺
日期:2016年7月14日

尋晚我瞓得兩個鐘,於是我第二朝起身搭地鐵返工嗰陣,特登搭返去站頭,揀咗個角落位挨住嚟瞓。瞓瞓下聞到陣脂粉味,我本能上抬頭望下有無女,見到有個OL挨咗響我挨緊嗰塊玻璃度。唔知點解,佢將隻右臂夾咗響塊玻璃同佢背脊之間。

佢件黑色連身裙就好似熄咗燈嘅戲院咁,突顯出佢手背嘅白皙,而佢粉紅色嘅關節就好似雪中梅。我對眼好澀,但係佢哋闔唔埋。女人隻手纖幼但關節又唔腫脹,肌膚嘅紋理似粉但又冇皺紋。我改變策略,拎咗部電話出嚟,逼走我嘅視線,但係我一望開,醇香嘅脂粉味又將我勾返過去。我扮鼻敏感,用張茉莉花味tempo埋住個鼻時,隻手竟然開始敲起拍子,佢食指上隻銀戒聽起嚟清脆如竹。

呢一刻脂粉味衝破左用香精築起嘅堤壩,個口有浸無以名狀嘅甜味,條頸隔著塊玻璃都感覺到佢冰涼既指尖。我五感都被呢隻手侵佔,我本來已經疲累不堪嘅意識被呢隻手疲勞轟炸成傀儡。我想起身走,但係成個車廂都塞滿人,而我啱啱錯過咗我個站。

全文 353 字 (唔計英文、空格、標點)