(beta 公測版本)
< 返回

《「好想去日本感受下地震」,我屌你老母》

作者:林璃蝶
日期:2016年5月25日

2016年4月14日熊本地震,後來證實為前震,4月16夜更強烈嘅本震襲來。當時,我身處日本,不過放心,我無事無受傷,一切安好。

香港人一向好幸福,無乜天災,人禍反而多。以前七八十年代有颱風可能都會出事,近年除咗啲特登去追浪出事嘅傻仔之外,基本上留喺安全地方都唔會有人命傷亡,仲分分鐘多半日假添。曾經有幾個細路喺電視機面前講話想紅雨黑雨,希望唔洗返學。童言無忌,相信每個人細個嗰時都曾經咁諗,到大個咗知道天災會引起幾大麻煩,先會開始鐘意晴天(當然唔想返工嘅心情係一樣嘅)。

香港無天災,所以香港人輕視天災,我明,但係唔好同我講想感受地震!!!!!我見到咁嘅post真係嬲到想喊!!!!!你知唔知日本因為地震死咗幾多人?知唔知餘震令人幾精神不安?熊本地震對熊本同大分有幾大傷害?熊本城頂爛哂,阿蘇神社無咗,益城町嘅公公婆婆一生嘅財產同回憶瞬間變成頽垣敗瓦,有個後生仔喺地震時正正喺阿蘇大橋上嘅揸緊車,就從此下落不明。大學入面重要嘅研究樣本爛哂,Golden Week無哂觀光客,溫泉嘅水變成黃色。而熊本地震嘅傷亡亦遠遠不及2011年嘅東北大地震⋯⋯

地震時避難無水無電無飯食,廁所無得沖水所以啲人寧願飲少啲,結果因為身體缺水加上精神緊張而被送院。即使地震過後已經一個月,當地居民仍然每日受餘震困擾,有數以千計人因為痛失家園而住喺避難所。突然之間無自己嘅屋企係一件好痛苦嘅事,幸福嘅香港人永遠唔會明。

話想感受地震,唔係on9,係仆街。就算你咁諗,都唔好咁樣講,仲要寫上Facebook,拜託。我唔想有台灣人同日本人見到,覺得香港人全部都係冷血嘅仆街。講嘢之前用下個腦,諗多少少諗遠少少。Brain is awesome, I wish everyone has one.

間唔中台灣地震,香港人感受到少少地震,就好興奮咁話Feel到張凳郁咗1mm仲即刻post上Facebook。希望大家都明白,你感受到嘅一少震,同時喺某個地方嘅震度係幾百幾千倍。地震對你嚟講係1秒嘅事,對好多人嚟講,係一世嘅事。

全文 663 字 (唔計英文、空格、標點)