(beta 公測版本)
< 返回

《謙卑唔係用口講呀,係做出嚟呀》

作者:雞絲陳
日期:2016年4月19日

我讀傳意(好似係),我梗係知道遣詞用字背後全部反映緊動機心態階層乜乜物物。有時戒甩一啲字,學下用多啲某類字,又真係可以幫人調整心態(洗腦咋嘛),甚至影響佢日後嘅抉擇取態。就好似我哋會話人唔應該講「返大陸」,唔應該講「內地」咁;戒下戒下真係會本土啲,知自己係邊度人,唔會認錯根。
 
本來用少啲「幫」、「捐」、「救」呢啲字係冇問題嘅,等大家aware下,唔好一番好意卻不自覺將自己放咗喺好優越嘅位置嘛,希望喺分享(哇差啲講咗禁語「幫人」)嘅時候對方(哇差啲講咗禁語「受助對象」)心裡面唔會唔舒服嘛,唔會覺得你係睇唔起佢可憐佢施捨佢嘛。「分享」呢個字用得好呀,大家平等嘛,冇話邊個強邊個弱邊個要人幫嘛,有好嘢開心share嘛。
 
但當有啲人用字法西斯到一個點,將所有唔識得喺字面上將「幫/捐/救」轉化為「平享」呢兩粒字嘅人都鬧一餐唔歡迎佢參與你哋啲行動,睇唔起唔識同你哋用同一種語言嘅人,我就會覺得——哇hi你真係同大家平起平坐呀冇覺得自己特別高尚呀。
 
謙卑唔係用口講呀,係做出嚟呀。唔係透過鬧人做咩擺得自己唔夠卑微而去顯示自己謙呀——當你擺出個大佬格出嚟鬧人唔夠謙卑時,well你三隻手指指返住自己囉。刻意將自己形象降低,嚴禁人喺任何情況下講「幫/捐/救」呢啲你覺得反映關係有高低、不對等嘅字,可能係因為,你真係覺得自己好偉大好優越——喂你唔覺得自己係superior嘅使乜強調自己「其實」同人平等?多番刻意同人講:「我唔係捐助你呀,我冇能力幫你呀,唔好當我救世主呀,我同你分享咋,記住呀係分享咋,唔係幫呀,我而家有多呀我同你分享呀」,其實亦係不停提醒人:「我同你唔同架,不過你唔好諗我哋有幾唔同啦。」sosad。

全文 578 字 (唔計英文、空格、標點)