(beta 公測版本)
< 返回

《深耕細作》

作者:雞絲陳
日期:2016年4月18日

近期搬屋,一直提自己要改選民登記地址。放工見到選舉事務處嗰啲選民登記街站,梗係埋去填啦,用佢啲紙好過用我啲紙就嘛(市儈到呢)。:0) 填完自己嗰份交埋,又拎多幾張blank form俾屋企人。
 
去到大埔墟,聽到有人自己擺街站嗌咪。得佢一個人,望落又唔係七八九十後,即係應該唔係 #Vote4U。裝下佢個易拉架,係用舊咖易拉架貼啲A4紙上去,就開咗個一人街站。
 
個師奶好落力嗌咪,叫人記得登記做選民、登記咗嘅記得check下自己地址係咪updated,又叫人記得提身邊親友都要登記/更新資料。
 
我一路買砵仔糕一路聽佢嗌咪,好好奇佢係邊派人——你知啦而家好多乜盟物盟咖嘛,睇下邊堆人有做實事都好呀,熱普城有做,本民前青政同啲傘後組織有做,眾志列陣就好似唔多覺啦柒下柒下玩泥沙。我望一望個貼咗A4紙就嘅舊易拉架,最底遮唔到嘅email,係choywingmui唔知乜。咦咁熟嘅個名?一個師奶、大埔墟、擺街站、冇人幫...... 🤔
 
Google查證,果然,佢就係舊年區選喺大埔墟單挑民建聯李國英嘅蔡咏梅。我記得嗰期有啲文章,正係話呢位師奶好勇、好勤力、但佢係區選各區云云獨立候選人之中,最冇人幫嗰個——好多獨立候選人都有自己團隊(frd底都係競選團隊吖,我都有參與過咖不過唔喺大埔),唯獨是呢個師奶真係可謂冇人冇物。據聞到最後幾日先有啲後生仔睇唔過眼幫下佢手。
 
最後,民建聯李國英1096票,師奶蔡咏梅865票。呢啲真係雖敗猶榮。
 
但今日,當我見到呢個師奶時,我先發覺佢唔係淨係區選時先可敬。唔係淨係因為冇資源冇人脈都令到44%票所以可敬;佢可敬在佢冇hit and run,佢真係默默揼石仔。
 
好多候選人落選後就會消失於社區(其實當選嘅上咗任你都會見佢唔到)——有政黨背景嘅咁做,你明,因為好多政客都只當選舉係投資(或投機?),曝下光cap下水就夠,輸咗梗係唔會再同你做嘢;獨立候選人咁做你都會明,大佬人哋要繼續打返牛工,本身參選又已經動用咗好多人力物力,輸咗更加唔會有太多空間同你做地區工作,未必係完全消失,但可能換個形式同角色繼續努力。所以,我見到蔡咏梅今日一條友喺度嗌咪(後嚟見到佢仲有一個後生義工幫手派表),我係幾驚訝。
 
我唔知蔡咏梅九月會唔會又出嚟選啦,我又唔知佢政治取態其實係近邊派啦。點都好啦,至少我記得呢個師奶唔係搏上鏡永續消費光環或彈出彈入嗰啲人。我會記得佢有做嘢。
 
---
師奶都咁落力,大家都一齊捉啲朋友登記/update地址啦。
 
唔好諗住搬咗屋就懶改地址啊。就算你搬嚟搬去都係同一個屋苑諗住選區冇變到時照去投票,萬一你被抽中核對資料而你收唔到寄去舊屋嘅信,冇覆選舉事務處嘅話,你係會被剔除選民資格咖——我老豆之前就係咁...... 所以盡量幫屋企人男女朋友check清楚佢啲資料係咪準確呀,我唔想你好似我之前咁,拉到老豆嗰票點知佢去到票站先知自己俾人剔除咗選民資格...... 🙄
 
5月2日前要登記/更改資料呀!得返14日咋!
 
---
#我是方丈 選民登記填表機: https://kbfl.org/voter
 
已登記選民可以到選舉事務處網站 https://bit.ly/HKvotercheck 確保資料準確,有錯嘅話可以用同一份表格更新資料~

全文 1027 字 (唔計英文、空格、標點)