(beta 公測版本)
< 返回

《嫲嫲打電話俾恩恩》

作者:雞絲陳
日期:2015年9月16日

阿嫲好似從來冇打過俾我,通常都係我哋打俾佢——但都好少,因為佢撞聾,就算面對面講嘢佢戴咗助聽器我哋都要好大聲,可想而知喺電話講十句佢都聽唔到幾多句,我哋仲要用盡氣力大嗌,先傳遞到「我係邊個,我今日幾點上嚟探你」呢個簡單訊息。有咩上到佢屋企再講啦。
 
咁阿嫲打到嚟,梗係都要聽啦,用咗成分鐘佢先搞得清自己打咗俾邊個。
 
嫲:喂?你係邊個呀?阿B呀?
我:(大聲)唔係呀!嫲嫲!我係恩恩呀!
嫲:喂?邊個話?水Dee呀?定阿B呀?你係邊個呀?
我:(大聲)嫲嫲!我係恩恩呀!恩恩呀!我係恩恩呀!
嫲:哦…你係恩恩呀?水Dee個女呀?
我:(大聲)係呀!嫲嫲!我係恩恩呀!
嫲:哦…我搵唔到你老豆呀…打咗兩日電話都搵佢唔到…佢做咩事呀?去咗邊呀?
我:(大聲)下?嫲嫲!我唔知呀!可能佢做緊嘢聽唔到你電話呀!我叫佢打返俾你丫!
嫲:哦…拿…我問候下你呀…你有冇男朋友呀?
我:(大聲)下!冇呀!嫲嫲!
嫲:哦…拿,我介紹個男人你識…
我:(靜音)……
嫲:30歲…啱啱搬嚟我呢邊嘅…同佢阿媽,兩母子住,早兩日嚟過我度坐…
我:(靜音)……
嫲:喺__返工,人工每個月__蚊…係搵得唔多,不過人品好似唔錯…
我:(靜音)……
嫲:你幾多歲呀?
我:(唔知咩聲)27呀…
嫲:今日呀,有啲姑娘嚟同我做運動呀,伸展嗰啲呀,48歲呀,都未結婚呀…
我:(唔知咩聲)哦…
嫲:佢問我有冇男人介紹俾佢呀…我話梗係冇啦…佢48歲,要搵啲50幾歲架啦…我淨係識呢個30歲架咋…啱啱搬嚟…
我:(靜音)……
嫲:拿…如果你覺得啱嘅,我過去坐下…問候下人,問下家宅,有冇兄弟姊妹…了解下咁…
我:(唔知咩聲)哦…嫲嫲…遲啲先算啦…
嫲:唔係呀…趁阿嫲仲喺度,幫你問下丫嘛!
我:(唔知咩聲)係嘅…嫲嫲…係嘅…
嫲:我嗰日就問佢,介紹嘅女仔俾佢好唔好,好靚女嘅,佢就喺度笑,唔出聲,我覺得呢個男仔幾純品…
我:(靜音)……
嫲:咁我幫你問下啦…我過去坐下…佢都覺得啱嘅你哋搵日過嚟我度坐下,見下面…
我:(唔知咩聲)唔使架喇…嫲嫲…到時先算啦…
嫲:唏!我去問下咋嘛,咪睇下人哋點樣囉,佢唔答應咪算囉,由佢囉…
我:(唔知咩聲)係嘅…嫲嫲…係嘅…
嫲:唔…好啦!呢個電話號碼係你架嘛?唔係你老豆架嘛?唔係你細佬架嘛?咁我打返呢個電話號碼搵你…
我:(唔知咩聲)好…好…係嘅…嫲嫲…
嫲:好啦,你老豆呀,唔知點解我搵佢唔到呀!我掛住佢呀!佢之前成日買嘢食上嚟探我架嘛!你話俾佢聽呀,嫲嫲掛住佢呀,搵佢唔到呀…
我:(大聲)係!好!嫲嫲!我叫老豆打俾你!我會同佢講!我會叫老豆打俾你!
嫲:唔…好啦…咁係咁啦…唔講喇…拜拜…
我:(大聲)係!嫲嫲拜拜!

全文 811 字 (唔計英文、空格、標點)